5 Ɲanmiɛn klun jɔ wafa kwlaa nga be tu be klun be su i’n su ?Ndɛ sɔ’n ti nanwlɛ?

Atrɛkpa’n amun a ti ndɛ nga le: “Nán atin kunngba yɛ be kwla fa su kɔ lika kun ɔn. I kunngba’n Ɲanmiɛn sulɛ wafa’n sɔnnin. Ɔ fata kɛ sran kun bɔbɔ kunndɛ i Ɲanmiɛn sulɛ wafa liɛ.”

Ndɛ nga Biblu’n kan’n: Ɔ fata kɛ e tu e klun e su Ɲanmiɛn. Nán maan gblɛ annzɛ dunman klolɛ’n tran e Ɲanmiɛn sulɛ’n nun. Zezi kannin sa nga ti yɛ Ɲanmiɛn yili i blɛ su Ɲanmiɛn sulɛ wafa’m be kpɛnngbɛn’m be blo’n, i ndɛ kleli be. Ɔ seli be kɛ: “Dunman klofuɛ mun, amun wun ndɛ bɔ Ezai klɛli’n ti nanwlɛ, afin ɔ klɛli i kɛ: ‘Sran nga’m be kɛn i be nuan bui su kɛ be bu n sran, sanngɛ be anwlɛn’n nun-man n su.’” (Mark 7:6) Sɛ e waan Ɲanmiɛn klun jɔ e wun’n, nán e wun ase ngunmin yɛ ɔ fata kɛ e wla e su i ɔ.

Zezi kleli sɔ weiin. Ɲanmiɛn sulɛ’n nun’n, like trele nga Ɲanmiɛn sulɛ wafa’m be kpɛnngbɛn sɔ mun nin be su sufuɛ’m be yo m’ɔ timan kpa’n, ɔ tuli i ɲin. I waan Ɲanmiɛn nuan ndɛ yɛ’n ti be liɛ. Ndɛ sɔ’n se kɛ: ‘Be manman min ngbɛn, [afin] be kle like nga sran’m be kan’n kɛ ɔ ti Nyanmiɛn mmla’n.’ (Mark 7:7) Be Ɲanmiɛn sulɛ’n yoli “ngbɛn,” afin ninnge nga be yo be Ɲanmiɛn sulɛ’n nun titi’n, be yoli be cinnjin trali like nga Ɲanmiɛn waan be yo’n.

Biblu’n kleman kɛ Ɲanmiɛn klun jɔ i sulɛ wafa kwlaa su. Sanngɛ ɔ kle kɛ nga i klun jɔ su’n ti kunngba cɛ. Matie 7:13, 14 se kɛ: “An sin anuan fii’n nun, afin sɛ be sin anuan tɛtrɛ’n nun’n, be kpɛn atin dan’n bɔ i awieliɛ ti nyrɛnnɛn’n nun, yɛ be nga be fa atin sɔ’n su’n, be sɔnnin. Sanngɛ anuan nin atin nga be sin nun-ɔn be nyan nguan’n be ti kaan, yɛ be nga be kunndɛ be wun i’n, b’a sɔn-man.”

Wafa nga nanwlɛ’n i silɛ’n kwla yo amun ye’n: Maan ɔ yo amun kɛ amun a fa anglo kaka b’a siesie be wun kɛ amún kó sí wanndilɛ akplowa sa. Kpɛkun kɛ bé sí akplowa’n niɔn, amun yɛ amun dun mmua juli ɔ. Sanngɛ be waan amun a fɔn wanndilɛ’n nun mmla kun ti’n, be su faman akatua’n be manman amun. Kusu nn amun siman mmla sɔ’n laa. Sɛ ɔ yo sɔ’n, ɔ kwla yo amun kɛ amun kleli amun wun yalɛ ngbɛn. ?Ɲanmiɛn i sulɛ’n nun’n, i sɔ sa kunngba’n kwla ɲan e wie?

Akoto Pɔlu fali e Ɲanmiɛn sulɛ’n sunnzunnin wanndilɛ akplowa silɛ. Ɔ klɛli i kɛ: “Sran ng’ɔ wanndi’n, sɛ w’a wanndi-man kɛ be kleli i’n sa’n, ɔ nyan-man wanndilɛ sɔ’n nun like.” (2 Timote 2:5) Sɛ e su Ɲanmiɛn kɛ ɔ ‘kleli e’n sa’n’ yɛ i klun jɔ́ e wun ɔn. Kɛ bé sí wanndilɛ akplowa’n, sɛ sran kun w’a wanndiman w’a sinman lika nga be kleli i nun’n naan ɔ sin kan i bɔbɔ klo’n, ɔ su ɲanman akatua’n. I kunngba’n, Ɲanmiɛn i sulɛ nun’n, sɛ e waan i klun jɔ e wun’n, nán e bɔbɔ e klunklo ajalɛ liɛ’n su yɛ é fá ɔ.

Sɛ e kunndɛ kɛ Ɲanmiɛn klun jɔ e wun’n, ɔ fataman kɛ gblɛ tran wafa nga e su i’n nun. Zezi seli kɛ: “Be bɔ be koto e Si’n bo be mɛnmɛn i sakpa’n, bé kóto i bo bé mɛ́nmɛ́n i be akunndan’n nun nanwlɛ nun.” (Zan 4:23) Biblu’n m’ɔ ti Ɲanmiɛn nuan Ndɛ’n i nun yɛ e kwla suan Ɲanmiɛn i sulɛ kpafuɛ’n niɔn.—Zan 17:17. *

[Ja ngua lɛ ndɛ’n]

[Ndɛ kwle, bue 8]

?Ɲanmiɛn sulɛ wafa’m be ngba yɛ be kle sran’m be kɛ be su Ɲanmiɛn kɛ nga Ɲanmiɛn fa klo’n sa ɔ?