5 Inaako nin Dios an Gabos na Sinserong Pagsamba—Totoo daw Iyan?

Kun ano an tibaad naaraman mo: “Kun paanong dakol na dalan asin tinampo an pasiring sa iyo man sanang destinasyon, dakol man na dalan an pasiring sa Dios. Dapat hanapon nin lambang tawo an saiyang dalan pasiring sa Dios.”

Kun ano an itinotokdo kan Biblia: Dapat kitang magin sinsero sa satong pagsamba, na linilikayan an pagsaginsagin. Sinabi ni Jesus sa mga lider nin relihion kan panahon nia kun taano ta isinikwal sinda nin Dios: “Marahay [nanggad] an pagkahula ni Isaias dapit saindo, magña parasaguinsaguin, siring sa nasusurat, An banuaan na ini naggagalang sako sa saindang magña gñabil, [alagad] an saindang puso harayo sako.” (Marcos 7:6) Pero, an pagigin sinsero sana bakong garantiya na aakoon nin Dios an satong pagsamba.

Lininaw ini ni Jesus paagi sa pagbuyagyag nia kan pinakadepekto sa pagsamba kan mga lider na idto nin relihion asin kan saindang mga parasunod. Ipinanongod nia sa sainda an mga tataramon nin Dios: “Sayang sana an pagsaramba ninda sako, [na] nagtotokdo kan magña osipon nin tauo na pinakang togon.” (Marcos 7:7) “Sayang sana” o mayong serbi an saindang pagsamba, huling mas mahalaga sa sainda an relihiosong mga tradisyon ninda kisa sa mga kahagadan nin Dios.

Imbes na suportaran an ideya na dakol na paagi nin pagdolok sa Dios an inaako nia, itinotokdo kan Biblia na igwa sana nin saro. An Mateo 7:13, 14 nagsasabi: “Magralaog kamo sa tatang hayakpit; huli ta halakbang an tata, asin mahiwas an dalan na pasiring sa kalaglagan, asin balakid an magña nagraralaog dian. Huli ta piot an tata, asin hayakpit an dalan na pasiring sa buhay, asin diit an magña nakakakua kaiyan.”

Kun paano makakatabang sa saimo an pakaaram kan katotoohan: Imahinara an mamamatean mo kun dakol na bulan kang nagsanay para sa maraton asin ika an enot na nakatapos sa paorumbasan, alagad nadiskualipikar ka huling dai mo aram na may nabalga ka palan na reglamento. An pagmate mo sayang sana an gabos mong paghihingoa. Puede man daw mangyari an siring kaini sa satong pagsamba sa Dios?

Kan an satong pagsamba ikomparar ni apostol Pablo sa atletikong kompetisyon, sia nagsurat: “Kun an siisay man nakikipagdaogan sa karawat, dai sia kinokoronahan kun dai sia nakipagdaogan nin sono sa magña pagsosondon.” (2 Timoteo 2:5) Nakakamtan niato an pag-oyon nin Dios paagi sa pagsamba sa saiya “sono sa magña pagsosondon,” an boot sabihon, sa paagi na inooyonan nia. Dai kita makakapili nin sadiri niatong dalan pasiring sa Dios, kun paanong dai puedeng magdalagan an sarong paradalagan saen nia man gusto asin maglaom na sia pa man giraray an idedeklarar na nanggana sa paorumbasan.

Tanganing mapaogma an Dios, dapat niatong papagdanayon na an satong pagsamba mayo nin ano man na kaputikan manongod sa saiya. Si Jesus nagsabi: “An magña tunay na parasamba magsasaramba sa Ama sa espiritu asin katotoohan.” (Juan 4:23) Nanonodan niato an tunay na dalan pasiring sa Dios paagi sa saiyang Tataramon, an Biblia.—Juan 17:17. *

[Nota sa Ibaba]

[Blurb sa pahina 8]

Itinotokdo daw kan gabos na relihion sa mga tawo na sambahon an Dios sa paagi na inooyonan nia?