5 Kot a Etiwa Sokkun Fel Meinisin​—Itä Mi Pwüng Ena?

Eli, iei met ka fen rongorong: “A chommong al sia tongeni fetäl wor pwe sipwe tikeri eü leeni, pwal ina usun, a chommong alen ach sipwe akkarap ngeni Kot. Emön me emön aramas epwe pwisin kütta alen an epwe fel ngeni Kot.”

Ifa äitien ewe Paipel: Mi lamot sipwe wenechar lon ach fel ngeni Kot, nge sisap likotuputup me elingepin. Jises a ereni ekkewe nöüwisin lamalam ewe popun Kot ese etiwer, iei alon: “Aisea a fen osuni usumi. Ämi oua chon likatuputup usun a fen mak: ‘Kot a apasa: Ekei aramas ra asamoluei ren kapas chök nge leluker a fokun toau seniei.’” (Mark 7:6) Iwe nge, esap weween pwe Kot epwe etiwa än emön fel ngeni ika pwe a chök letip wenechar.

Jises a affata ena ren an pwäraalo ewe äkkäeüin popun mi mwääl än ekkewe nöüwisin lamalam me nöür kewe aramas fel ngeni Kot. A erä pwe a weneitiir alon Kot keei: “Esor lamoten ar fel ngeniei, pun kapasen ar afalafal mi kapasen aramas chok.” (Mark 7:7, TF) A lusmwääl me “esor lamoten” ar fel pokiten ra aücheani eörenien ar lamalam lap seni ar repwe föri met Kot a kütta seniir.

Ewe Paipel ese äiti ngenikich pwe a wor chommong alen ach sipwe fel ngeni Kot, nge a apasa pwe a wor eü chök. Iei met Mattu 7:13, 14 a apasa: “Oupwe tolong lon ewe asam mi pwangekükün! Pun a pwangemong ewe asam o chömong ewe al mi ale ngeni feiengau esemüch, nge chokewe mi fetal won ra chomong. Nge a pwangekükün ewe asam o chökükün ewe al mi ale ngeni manau esemuch. Mi wor ekoch chök aramas mi fetal won ei al ngeni manau.”

Om silei ewe enlet epwe älisuk: Anchangei mwo, epwe met meefiom ika ka rensü ükükün fitu maram pwe kopwe fiti eü marosong. Iwe, a fis ewe marosong nge en ka nampa eü, iwe nge, ra erenuk pwe kosap angei ewe winnen nampa eü pwe ka atai och allükün ewe urumwot nge kese tepereni. Eli kopwe meefi pwe a lamot mwääl meinisin minne ka achocho ngeni. Iwe, epwe pwal tongeni fis ei sokkun lon ach fel ngeni Kot?

Paul a apöpöfengeni ach fel ngeni Kot me eü kitir lon urumwot, iei makkeian: “Eman chon kitir mi sä lon eu kitir esap tongeni angei winnan, are esap aleasochisi allükün kitir.” (2 Timoti 2:5) Sipwe angei än Kot chen ika sipwe “äleasochisi” ekkewe allük a isetiw. Emön chon ssä ese tongeni angei winnan ika a älleasolapa ekkewe allükün urumwot. Pwal ina usun, sise tongeni apwapwaai Kot ika sia pwisin filatä ifa usun sipwe fel ngeni.

Ren ach sipwe apwapwaai Kot, a lamot ach fel ngeni epwe limelimöch me sisap lükü och pworaus mi chofona usun i. Jises a apasa: “Chon fel mi enlet repwe fel ngeni ewe Sam fän emmwenien an we manaman mi fel o ewe enlet.” (Jon 4:23, NW) Sia käeö usun ewe al mi enlet ngeni Kot seni an we Kapas, ewe Paipel.​—Jon 17:17. *

[Pwóróus fan]

[Ekis Pwóróus lón pekin taropwe 8]

Itä meinisin lamalam ra asukula nöür aramas le fel ngeni Kot lon ewe napanapen fel i a pwapwaiti?