5 Bondye i aksepte tou ladorasyon​—Eski i vre?

Sa ki petet ou’n tande: “Zis parey diferan santye ek semen i anmenn ver menm destinasyon, i annan en kantite semen pour ariv kot Bondye. Sak dimoun i bezwen rod son semen pour ariv kot Bondye.”

Ki Labib i dir: Nou devret senser dan nou ladorasyon, pa zis fer krwar ouswa fer li avek lipokrizi. Zezi ti montre bann sef relizye dan son letan akoz Bondye ti’n rezet zot, i ti dir: “Ezai ti byen profetize lo zot, ipokrit, kan i ti ekri: ‘Sa pep, i onor mwan avek zot labous, me zot leker i lwen avek mwan.’” (Mark 7:6) Pourtan, zis senserite tousel i pa sifi pour ki Bondye i aksepte nou ladorasyon.

Zezi ti fer sa kler kan i ti denons bann defo dan ladorasyon bann sef relizye ek zot bann disip. I ti dir sa konsernan zot: “Zot ladorasyon i initil, zot ansenny bann konmannman ki’n fer par zonm.” (Mark 7:7) Zot ladorasyon ti “initil” ouswa anven akoz zot ti pe promot zot prop tradisyon relizye olye fer sa ki Bondye ti’n demann zot.

Labib pa siport sa lide ki i annan plizyer semen ki anmenn ver Bondye, plito i dir ki i annan zis enn menm. Matye 7:13, 14 i dir: “Antre par laport etrwat! akoz laport i larz, semen i fasil ki anmenn perdisyon, e i annan bokou ki pas par la. Me laport i etrwat, e semen i difisil ki anmenn dan lavi, napa bokou ki trouv li.”

Konn laverite i kapab ed ou: Mazinen ki mannyer ou ti pou santi si ou ti’n fer lantrennman pour plizyer mwan pour en paryaz taye, ou’n fini premye dan sa lakours e apre sa ou ganny diskalifye akoz ou’n kas en lareg ki ou pa ti konnen. Petet ou ti pou santi ki tou ou zefor ti anven. Eski en keksoz parey i kapab arive avek nou ladorasyon pour Bondye?

Zapot Pol ti konpar ladorasyon avek en konpetisyon atletik, i ti dir: “En atlet pa ganny kouronnen si i pa’n swiv bann regleman.” (2 Timote 2:5) Nou ganny laprouvasyon Bondye kan nou “swiv bann regleman” pour ador li, setadir nou ador li dan lafason ki li i oule. Nou pa kapab swiv nou prop semen pour al ver Bondye zis parey en atlet pa kapab tay kot i oule e ekspekte ki i pou ranport laviktwar dan en lakours.

Pour fer plezir Bondye, nou devret fer sir ki nou ladorasyon pa enplik okenn mansonz lo li. Zezi ti dir: “Bann vre ladorater [pou] ador Bondye an-espri e an verite.” (Zan 4:23) Parol Bondye, Labib i montre nou sa vre semen ki anmenn ver Bondye.​—Zan 17:17. *

[Not anba lo paz]

[Ekstre lo paz 8]

Eski tou larelizyon i montre dimoun konman pour ador Bondye lafason ki li i oule?