5 Ginabaton sang Dios ang Tanan nga Sinsero nga Pagsimba—Matuod Bala Ini?

Ang mahimo nabatian mo: “Subong nga madamo sing dalan pakadto sa isa ka destinasyon, madamo man sing dalan pakadto sa Dios. Ang kada isa dapat magpili sang iya dalan pakadto sa Dios.”

Ang ginatudlo sang Biblia: Dapat nga sinsero kita sa aton pagsimba, nga wala nagapakitakita ukon nagapakunokuno. Pero, indi buot silingon nga kon sinsero kita, batunon na sang Dios ang aton pagsimba. Ginsilingan ni Jesus ang mga lider sang relihion sang iya panahon kon ngaa ginsikway sila sang Dios: “Si Isaias sibu nga nagtagna tuhoy sa inyo nga mga salimpapaw, subong sang nasulat, ‘Ini nga katawhan nagapadungog sa akon sa ila mga bibig, apang ang ila tagipusuon malayo sa akon.’”—Marcos 7:6.

Ginpaathag ini ni Jesus sang ginbuyagyag niya ang panguna nga rason kon ngaa sala ang pagsimba sang mga lider sang relihion kag sang ila sumulunod. Ginpatuhoy niya sa ila ang ginsiling sang Dios: “Wala sing pulos ang ila padayon nga pagsimba sa akon, bangod ginatudlo nila subong mga doktrina ang mga sugo sang mga tawo.” (Marcos 7:7) Ang ila pagsimba “wala sing pulos,” bangod ginauna nila ang ila tradisyon sangsa ginapatuman sang Dios.

Wala ginatudlo sang Biblia nga madamo sing paagi sa pagpalapit sa Dios, sa baylo ginatudlo sini nga may isa lang ka dalan. Ang Mateo 7:13, 14 nagasiling: “Magsulod kamo sa makitid nga gawang; bangod masangkad kag malapad ang dalan nga nagapadulong sa kalaglagan, kag madamo ang nagasulod nga nagaagi sa sini; samtang makitid ang gawang kag masipot ang dalan nga nagapadulong sa kabuhi, kag pila lamang ang nakatultol sini.”

Kon paano makabulig sa imo ang paghibalo sang kamatuoran: Ibutang ta nga nagpraktis ka sing binulan para mag-entra sa maraton, kag ikaw ang first place. Pero wala mo mabaton ang premyo kay may nalapas ka kuno nga pagsulundan. Mahimo magbatyag ka nga kanugon sang imo pagpangabudlay. Posible bala ini matabo sa aton pagsimba sa Dios?

Ginpaanggid ni apostol Pablo ang aton pagsimba sa kompetisyon sa sports. Nagsulat sia: “Kon ang isa magpaindis-indis sa hinampang, indi sia makabaton sang purongpurong kon wala sia magpaindis-indis suno sa mga pagsulundan.” (2 Timoteo 2:5) Mapahamut-an naton ang Dios kon simbahon naton sia “suno sa mga pagsulundan,” ukon sa paagi nga iya ginabaton. Indi puede nga kita ang magpili sang aton dalan pakadto sa Dios subong nga indi puede nga bisan diin lang madalagan ang isa ka atleta kag paabuton niya nga madaug sia.

Para mapahamut-an ang Dios, dapat wala sing kabutigan ang aton pagsimba. Si Jesus nagsiling: “Ang matuod nga mga sumilimba magasimba sa Amay sa espiritu kag kamatuoran.” (Juan 4:23) Paagi sa Biblia, mahibaluan naton ang husto nga dalan pakadto sa Dios.—Juan 17:17. *

[Nota]

[Blurb sa pahina 8]

Ang tanan bala nga relihion nagatudlo nga simbahon ang Dios sa paagi nga iya ginabaton?