5 Awaten ti Dios ti Amin a Napasnek a Panagdayaw​—Pudno Kadi?

Ti mabalin a nangngegmon: “No kasano nga adu a dana ken dalan ti agturong iti maymaysa a lugar, adu met ti dalan nga agturong iti Dios. Makaammo ti tunggal tao a mangbirok iti bukodna a dalan nga agturong iti Dios.”

Ti isursuro ti Biblia: Masapul a napasnek ti panagdayawtayo, saan ket nga agpampammarang ken managinsisingpet. Imbaga ni Jesus kadagiti panguluen ti relihion idi kaaldawanna no apay a linaksid ida ti Dios: “Ni Isaias mayanatup a nagipadto maipapan kadakayo a managinsisingpet, kas iti adda a naisurat, ‘Daytoy nga ili dayawennak kadagiti bibigda, ngem dagiti pusoda adayo kaniak.’” (Marcos 7:6) Ngem saan laeng a kinapasnek ti kasapulan tapno awaten ti Dios ti panagdayawtayo.

Imbatad daytoy ni Jesus idi imbutaktakna ti kangrunaan a biddut iti panagdayaw dagiti panguluen ti relihion ken dagiti pasurotda. Inyaplikarna kadakuada ti sasao ti Dios a, “Kinaubbaw nga agtultuloyda nga agdaydayaw kaniak, agsipud ta isuroda kas doktrina ti bilbilin dagiti tattao.” (Marcos 7:7) “Kinaubbaw” ti panagdayawda gapu ta ipangpangrunada ti narelihiosuan a tradisionda imbes a dagiti kalikaguman ti Dios.

Isursuro ti Biblia a maysa laeng, saan nga adu, ti pamay-an nga iyaadani iti Dios. Kuna ti Mateo 7:13, 14: “Sumrekkayo iti akikid a ruangan; agsipud ta akaba ken nalawa ti dalan nga agturong iti pannakadadael, ket adu dagidiay sumrek iti dayta; idinto ta akikid ti ruangan ken nailet ti dalan nga agturong iti biag, ket bassit dagidiay makasarak iti dayta.”

Ti maitulong kenka ti panangammom iti kinapudno: Ipapanmo nga adu a bulan a nagsanayka para iti maysa a maraton. Immuna a nakadanonka iti finish line ngem saan a sika ti bigbigenda a nangabak ta adda kano pagannurotan a sinalungasingmo. Ania ngata ti mariknam? Nalabit maikunam a sayang ti panagreggetmo. Mabalin kadi a mapasamak met dayta iti panagdayawtayo iti Dios?

Inyarig ni apostol Pablo ti panagdayawtayo iti maysa a kompetision. Insuratna: “No ti asinoman makidangadang uray pay kadagiti ay-ayam, isu saan a makoronaan malaksid no nakidangadang maitunos kadagiti pagannurotan.” (2 Timoteo 2:5) Anamongannatayo ti Dios no agdayawtayo kenkuana “maitunos kadagiti pagannurotan[na],” wenno iti pamay-an nga anamonganna. Saantay a mabalin a pilien ti bukodtayo a dalan nga agturong iti Dios, no kasano a ti tumataray dina mabalin ti agtaray iti sadinoman a kayatna sa ekspektarenna a mangabak.

Tapno maay-ayotayo ti Dios, siguraduentayo nga awan ti ulbod a sursuro a patpatientayo maipapan kenkuana. Kinuna ni Jesus: “Dagiti pudno a managdaydayaw agdayawdanto iti Ama buyogen ti espiritu ken kinapudno.” (Juan 4:23) Maammuantayo ti pudno a dalan nga agturong iti Dios manipud Saona, ti Biblia.​—Juan 17:17. a

[Footnote]

[Blurb iti panid 8]

Isursuro kadi ti amin a relihion ti panagdayaw nga anamongan ti Dios?