៥ ព្រះពេញចិត្ដមនុស្សទាំងអស់ដែលគោរពប្រណិប័តន៍លោកដោយស្មោះអស់ពីចិត្ដ តើពិតឬទេ?
៥ ព្រះពេញចិត្តមនុស្សទាំងអស់ដែលគោរពប្រណិប័តន៍លោកដោយស្មោះអស់ពីចិត្ត តើពិតឬទេ?
អ្វីដែលលោកអ្នកប្រហែលជាធ្លាប់ឮ: «ដូចផ្លូវជាច្រើនដែលនាំទៅដល់គោលដៅតែមួយ ក៏មានសាសនាជាច្រើនដែលនាំយើងឲ្យស្គាល់ព្រះដែរ។ មនុស្សម្នាក់ៗត្រូវស្វែងរកផ្លូវដែលខ្លួនគិតថាល្អដើម្បីស្គាល់ព្រះ»។
អ្វីដែលគម្ពីរបង្រៀន: យើងត្រូវតែគោរពប្រណិប័តន៍ព្រះដោយស្មោះអស់ពីចិត្ត មិនមែនដោយធ្វើពុតនិងលាក់ពុតឡើយ។ លោកយេស៊ូបានប្រាប់មេដឹកនាំសាសនានៅសម័យលោកអំពីមូលហេតុដែលព្រះបានបដិសេធពួកគេដោយនិយាយថា៖ «នែ! មនុស្សលាក់ពុត! គឺត្រូវណាស់ ដែលអេសាយបានប្រកាសទំនាយអំពីអ្នករាល់គ្នា ពេលគាត់សរសេរថា៖ ‹បណ្ដាជននេះគោរពខ្ញុំតែបបូរមាត់ទេ តែចិត្តរបស់ពួកគេបានឃ្លាតឆ្ងាយពីខ្ញុំ›»។ (ម៉ាកុស ៧:៦) ដូច្នេះ ចិត្តស្មោះតែមួយមុខមិនធានាថាព្រះនឹងពេញចិត្តការគោរពប្រណិប័តន៍របស់យើងទេ។
លោកយេស៊ូបានបង្ហាញយ៉ាងច្បាស់អំពីរឿងនេះ ដោយបកអាក្រាតកំហុសដ៏ធំបំផុតរបស់មេដឹកនាំសាសនានិងពួកអ្នកកាន់តាមពួកគេក្នុងការគោរពប្រណិប័តន៍ព្រះ ពេលលោកមានប្រសាសន៍ថា៖ «គឺជាការឥតប្រយោជន៍ទេ ដែលពួកគេបន្តគោរពប្រណិប័តន៍ខ្ញុំនោះ ពីព្រោះសេចក្ដីបង្រៀនរបស់ពួកគេជាបទបញ្ជារបស់មនុស្សតែប៉ុណ្ណោះ»។ (ម៉ាកុស ៧:៧) ការគោរពប្រណិប័តន៍របស់ពួកគេ«ជាការឥតប្រយោជន៍»ឬអសារឥតការ ព្រោះពួកគេចាត់ទុកទំនៀមទម្លាប់ខាងសាសនាជាអ្វីដែលសំខាន់ជាងតម្រូវការរបស់ព្រះ។
ជាជាងគាំទ្រគំនិតដែលថាមានផ្លូវជាច្រើនដែលនាំយើងឲ្យស្គាល់ព្រះ គម្ពីរបង្រៀនថាមានផ្លូវតែមួយវិញ។ ម៉ាថាយ ៧:១៣, ១៤ចែងថា៖ «ចូរចូលតាមខ្លោងទ្វារតូច ពីព្រោះផ្លូវដែលនាំទៅដល់ការវិនាសជីវិត គឺធំហើយទូលាយផង ក៏មានមនុស្សច្រើនចូលតាមផ្លូវនោះ។ រីឯផ្លូវដែលទៅឯជីវិត នោះចង្អៀត ក៏មានខ្លោងទ្វារតូចផង ហើយមានមនុស្សតិចណាស់ដែលរកផ្លូវនោះឃើញ»។
ការស្គាល់សេចក្ដីពិតជួយលោកអ្នក: សូមស្រមៃគិតអំពីកាលៈទេសៈនេះ លោកអ្នកខំហ្វឹកហាត់អស់ជាច្រើនខែក្នុងការរត់ប្រណាំងម៉ារ៉ាតុង។ លោកអ្នកបានជាប់លេខមួយ តែគេបានលុបឈ្មោះលោកអ្នកចោលវិញ ដោយសារលោកអ្នកបានបំពានច្បាប់មួយដោយមិនដឹងខ្លួន។ តើលោកអ្នកនឹងមានអារម្មណ៍យ៉ាងណា? លោកអ្នកប្រហែលជាគិតថាការខំប្រឹងរបស់ខ្លួនគ្មានប្រយោជន៍អ្វីសោះ។ តើបញ្ហានេះអាចកើតមានឡើងចំពោះការគោរពប្រណិប័តន៍របស់យើងឬទេ?
ដោយប្រៀបធៀបការគោរពប្រណិប័តន៍របស់យើងទៅនឹងការប្រកួតកីឡា សាវ័កប៉ូលបានសរសេរថា៖ «សូម្បីតែអ្នកប្រកួតកីឡាក៏មិនទទួលមកុដដែរ លុះត្រាតែគាត់បានប្រកួតតាមច្បាប់»។ (ធីម៉ូថេទី២ ២:៥) យើងអាចទទួលការពេញចិត្តពីព្រះដោយគោរពប្រណិប័តន៍លោក«តាមច្បាប់» ពោលគឺផ្លូវឬរបៀបគោរពប្រណិប័តន៍មួយដែលលោកពេញចិត្ត។ យើងមិនអាចជ្រើសរើសផ្លូវដោយខ្លួនយើងដើម្បីគោរពប្រណិប័តន៍លោក ដូចអ្នករត់ប្រណាំងដែលជ្រើសរើសផ្លូវណាក៏ដោយដែលគាត់ចង់រត់ ហើយនៅតែរំពឹងថាខ្លួននឹងទទួលជ័យលាភីទៀតនោះទេ។
យើងត្រូវរៀនសេចក្ដីពិតអំពីព្រះទើបលោកពេញចិត្តនឹងយើង។ លោកយេស៊ូបានមានប្រសាសន៍ថា៖ «អ្នកគោរពប្រណិប័តន៍ដ៏ពិតនឹងគោរពប្រណិប័តន៍បិតានៅស្ថានសួគ៌ដោយមានការដឹកនាំពីសកម្មពលរបស់លោកនិងដោយសេចក្ដីពិត»។ (យ៉ូហាន ៤:២៣) យើងអាចរៀនអំពីរបៀបគោរពប្រណិប័តន៍ពិតតាមរយៈគម្ពីរដែលជាបណ្ដាំរបស់លោក។—យ៉ូហាន ១៧:១៧ *
[កំណត់សម្គាល់]
^ វគ្គ 8 ដើម្បីទទួលព័ត៌មានបន្ថែមស្តីអំពីការគោរពប្រណិប័តន៍ដែលព្រះពេញចិត្ត សូមមើលជំពូកទី១៥នៃសៀវភៅតើព្រះគម្ពីរពិតជាបង្រៀនយ៉ាងណា?
[ឃ្លាអក្សរធំនៅទំព័រ៨]
តើសាសនាទាំងអស់បង្រៀនមនុស្សឲ្យគោរពប្រណិប័តន៍ព្រះតាមរបៀបដែលលោកពេញចិត្តឬទេ?