Nääk jyënäˈändë: “Duˈun extëm jyaˈˈaty kanäägë tuˈu parë njäjtëm mä tuˈugë lugäär, nanduˈun jyaˈˈaty kanäägë tuˈu parë njäjtëm mä Dios. Niduˈuk niduˈugë jäˈäy këˈëmë nyëˈë tyuˈu tpäädët”.

Biiblyë tyukniˈˈixë: Tsojkëp nDiosˈawdäjtëm tuˈukˈää tuˈukjot ets kyaj wingëˈëy agëˈëy. Jesus ojts tˈanëëmë ja diˈib nyiwintsënˈäjttëbë relijyonk tiko netyë Dios kyaj kyupëkëdë: “Miitsëty diˈibë nayˈandijëdëp es jyikyˈattë tëyˈäjtën mëët, yajxon ja Diosë kyugäjxpë Isaiië mnimaytyakë [...] ko dëˈën tkëxjääy: Tyäˈädë jäˈäy xywyintsëˈkëpts wingëˈëy agëˈëy, per ja jyot wyinmäˈäny jagam yˈity mä ëjën” (Markʉs 7:6). Per oy tuˈugë jäˈäy tjaˈˈawdatyë Dios tuˈukˈää tuˈukjot, kyaj yëˈë tˈandijy ko yajtukjotkëdäˈägëp.

Ko duˈunë Jesus tˈanmääy ja wintsëndëjk mëdë jyaˈayëty, ta ttukˈijxy mä nety tyëgoytyë. Ets ojts tˈanëëmë wiˈixë Dios jyënaˈany: “Nitii tkatsooty ko nyayˈandijëdë es xyjaˈˈawdattëts. Yëˈë tukˈëxpëjktëp diˈibë yˈanaˈamënˈäjtypy jeˈeyë jäˈäyëty” (Markʉs 7:7). Nëgoobë nety Diosˈawdattë mët ko yëˈë nety pyanëjkxtëp ja kostumbrë diˈib myëdäjttëp mä ryelijyonk ets kyaj tpadundë ja Diosë yˈanaˈamën.

Biiblyë tyukniˈˈixë ko jeˈeyë jyaˈˈaty tuk peky wiˈix mbäät nmëwingoˈonëmë Dios, kyaj jyaˈˈaty kanäk peky. Matewʉ 7:13, 14 jyënaˈany: “Tëkëdë mä ja tëjk ää xuˈutspë. Jaˈa ko wyoonyëty ja kemyˈää es ja tuˈu diˈibë nëjxp mä ja kutëgoˈoyën, es may ja jäˈäyëty diˈibë nëjxtëp jap. Per xyuˈutsëty ja kemyˈää es ja tuˈu diˈibë nëjxp mä ja jikyˈäjtënë winë xëë winë tiempë, es niwaanëty yëˈë diˈibë pyattëp”.

¿Wiˈix mbudëkëdët ko xynyijawët ja tëyˈäjtën? Okwinmay ko të mganaraty mä tuˈugë kompetensyë diˈib kanäk poˈo të xytyuundaˈaky, per ta myaˈˈanëëmë ko kyaj tsyobääty mët ko të xynyinaxy tuˈugë anaˈamënë diˈib kyaj xynyijawë. ¿Wiˈix mnayjawëdët? Mbäät mwinmay ko ninuˈun të kyatsobääty nuˈun ja mjot mëjää të xypyëjtaˈaky. ¿Mbäät nanduˈun mjaty mä mDiosmëduny?

Apostëlë Pablo ojts tˈijxkijpxyë ko nDiosmëduˈunëm extëm mä jäˈäy ttundë kompetensyë. Duˈun tkujäˈäyë: “Nandëˈën jäjtpë dëˈën yëˈë pëyëˈkijxyëbë, kyaj tˈaxäjë ja myayˈaty pën kyaj tkuytyuny extëm yaˈˈaneˈemy” (2 Timotee 2:5). Parë Dios xykyupëjkëm, nan tsojkëp nmëduˈunëm extëm yëˈë ttukjotkëdäˈägët. Mä jäˈäy pyëyëˈkijpxtë, kyaj mbäät oymyääjëty nyapëyeˈeky etsë net yajnigäjpxët ko të myadaˈaky. Nanduˈun jyaty mët ëtsäjtëm, kyaj mbäät nwinˈijxëm këˈëm ja nëˈë tuˈu etsë net nˈawijxëm parë Dios xykyupëjkëm.

Pën ntsojkëm etsë Dios xykyupëjkëm, jëjpˈam ets ja relijyonk diˈib ndukˈijtëm ak tëyˈäjtën tyukniˈˈixët. Jesus jyënany: “Ja jäˈäyëty diˈibë [...] yˈawdäjttëp ja Dios, tˈawdattët mët winë jyot jyäˈäjën es mëdë tëyˈäjtën” (Fwank 4:23). ¿Ets mä mbäät nnijäˈäjëm diˈibë tuˈu mënëjkxp mä Dios? Mä Biiblyë diˈibë Dios yˈAyukˈäjtypy (Fwank 17:17). *

[Notë diˈib noky ëxˈääy]

[Letrë diˈib miimp mä dibujë mä pajina 8]

¿Tukniˈˈijxëp tukëˈëyë relijyonk ets nˈawdäjtëmë Dios extëm ttseky?