5 Modimo o Amogela Borapedi ka Moka bjo bo Tšwago Pelong—Na ke Therešo?

Seo o ka bago o se kwele: “Go fo swana le ge ditsela tše dintši di lebiša lefelong letee, go na le ditsela tše dintši tšeo di lebišago go Modimo. Motho yo mongwe le yo mongwe o swanetše go ikhweletša tsela yeo e mo lebišago go Modimo.”

Seo Beibele e se rutago: Re swanetše go rapela ka pelo ka moka, re pheme go ikgakanya le boikaketši. Jesu o ile a botša baetapele ba bodumedi ba mehleng ya gagwe lebaka leo ka lona Modimo a bego a ba lahlile, ge a re: “Jesaya o porofetile ka mo go swanetšego ka lena baikaketši, bjalo ka ge go ngwadilwe gwa thwe: ‘Batho ba ba nkgodiša ka melomo, eupša dipelo tša bona di kgole le nna.’” (Mareka 7:6) Lega go le bjalo, go rapela go tšwa pelong feela ga go re nee kgonthišetšo ya gore Modimo o tla amogela borapedi bja rena.

Jesu o dirile gore se se bonagale gabotse ge a be a pepentšha bofokodi bjo bogolo borapeding bja baetapele bao ba bodumedi gotee le balatedi ba bona. O ile a bolela mantšu a Modimo a a lebišitše go bona, a re: “Ke ga lefeela ge ba dutše ba nthapela, gobane ba ruta ditaelo tša batho e le dithutatumelo.” (Mareka 7:7) Borapedi bja bona e be e le bja “lefeela,” goba bjo bo se nago mohola, ka gobane ba be ba etiša ditlwaelo tša bona tša bodumedi pele ga seo Modimo a se nyakago.

Go e na le go thekga kgopolo ya gore go na le ditsela tše dintši tšeo di amogelegago tša go rapela Modimo, Beibele e ruta gore go na le tsela e tee feela. Mateo 7:13, 14 e re: “Tsenang ka kgoro e tshesane gobane tsela e išago tshenyegong e petleke e bile e phatlaletše gomme bao ba tsenago ka yona ke ba bantši; anthe kgoro e išago bophelong ke e tshesane gomme tsela ya yona e pitlagane, le gona ke ba sego kae ba ba e hwetšago.”

Kamoo go tseba therešo go go thušago ka gona: Akanya kamoo o bego o tla ikwa ka gona ge o be o feditše dikgwedi o itlwaeletša go tsenela lebelo la monabo o motelele gomme wa fetša maemong a pele lebelong leo, eupša wa se hwetše moputso ka gobane o tshetše molao o itšego o sa tsebe. O be o tla bona maiteko a gago ka moka e bile a lefeela. Na go ka direga selo sa mohuta wo borapeding bja rena go Modimo?

Ge a be a tswalanya borapedi bja rena le phadišano ya mabelo, moapostola Paulo o ngwadile gore: “Ge e ba motho a phenkgišana dipapading, ga a rwešwe mphapahlogo ka ntle le ge a ka phenkgišana go ya ka melao.” (2 Timotheo 2:5) Re amogelwa ke Modimo ge re mo rapela “go ya ka melao,” ke gore, ka tsela yeo a e amogelago. Re ka se ikgethele tsela yeo e lebišago go Modimo go fo swana le ge mokitimi a ka se kitime moo go nyakago yena gomme a letela gore go thwe ke mothopasefoka.

E le gore re kgahliše Modimo, borapedi bja rena ga se bja swanela go ruta maaka ka yena. Jesu o itše: “Tate o nyaka ba bjalo gore ba mo rapele.” (Johane 4:23) Re ithuta tsela ya kgonthe e lebišago go Modimo ka Lentšung la gagwe, Beibele.—Johane 17:17 *

[Mongwalo wa tlase]

[Ntlhakgolo go letlakala 8]

Na madumedi ka moka a ruta batho go rapela Modimo ka tsela yeo a e amogelago?