5 God Hapi Long Evri Religion—Waswe Hem Tru?

Maet iu herem: “Nomata iumi bilong difren religion, iumi evriwan worshipim sem God. Olketa religion olsem staka road wea lead go long sem ples. Man seleva nao shud chusim religion bilong hem.”

Samting Bible teachim: God laekem iumi for worship from heart. Jesus talem why God no hapi long olketa bigman bilong religion. Hem sei: “Samting wea Isaiah talem long profesi abaotem iufala hem barava fitim. Hem sei: ‘Long toktok nomoa pipol hia mekhae long mi bat olketa no lovem mi.’” (Mark 7:6) Bat for worshipim God from heart nomoa no minim God bae hapi nao long worship bilong iumi.

Jesus helpem iumi for minim diswan taem hem showimaot main samting wea no stret long worship bilong olketa religion long datfala taem. Hem talem disfala toktok bilong God abaotem olketa: “Olketa hard waka nating for worshipim mi bikos olketa sei olketa law bilong man hem teaching wea kam from God.” (Mark 7:7) Olketa “hard waka nating” for worshipim God bikos olketa tingse hem important for followim teaching bilong olketa seleva winim teaching bilong God.

Matthew 7:13, 14 sei: “Go insaed long smolfala gate, bikos narafala road hem stap wea waed and isi for wakabaot long hem and staka pipol wakabaot followim datfala road. Bat taem olketa kasem end long road hia, bae olketa dae. Samfala pipol nomoa faendem datfala gate wea smol and datfala road wea no isi for wakabaot long hem. Bat taem olketa kasem end bilong datfala road, olketa bae kasem laef olowe.” So Bible no teachim iumi God hapi long evri religion, bat Bible showimaot wanfala stretfala wei nomoa stap for worshipim God.

Savve long truth helpem iu: Tingim sapos iu training for staka month for ran insaed wanfala resis, and taem iu resis iu win. Bat then olketa sei iu no fit for kam first bikos iu brekem wanfala rul, wea iu no savve long hem tu. Maet iu feel olsem iu hard waka nating nomoa. Hao nao diswan hem semsem witim wei wea iumi worshipim God?

Aposol Paul sei wei wea iumi worship hem olsem wanfala resis. Hem sei: “Man wea tekpart long sports tu bae hard for tekem kraon sapos hem no followim olketa rul.” (2 Timothy 2:5) God hapi long iumi taem iumi worshipim hem “followim olketa rul,” wea minim iumi worshipim hem long wei wea hem nao sei hem stret. Olsem man for ranran hem no savve chusim road wea hem laek for ran followim and tingse hem bae winim datfala resis, iumi tu no savve chusim eni religion wea iumi tingse hem stret and sei God bae hapi long hem.

For God hapi long iumi, iumi mas followim olketa tru teaching abaotem hem. Jesus sei: “Olketa wea worshipim God long stretfala wei bae worshipim hem followim holy spirit and followim samting wea tru.” (John 4:23) Iumi savve lanem olketa tru teaching abaotem God from Bible.—John 17:17. *

[Footnote]

[Blurb long page 8]

Waswe, evri religion teachim pipol stret wei for worshipim God?