5 Llapan religionkunatam Diosqa chaskin ¿Rasumpatsuraq o manatsuraq?

Wakinkuna niyanqan: “Imanömi huk sitioman chänapaqqa atska nänikuna kan, tsënöllam Diosmampis tukïnöpa chëta puëdentsik. Cada nunam imanöpis chänampaq kaqtaqa akrakunan”.

Biblia yachatsikunqan: Diostaqa adoranantsik shonqupita patsëmi y manam llutallatsu ni shimillapatsu. Unë witsan pushakoq religiösokunatam Jesus alli claro musyatsirqan adoracionninkunata Dios mana chaskinqanta, kënömi nirqan: “¡Ä, alli tucoq nunacuna! Rasontam profeta Isaiaspis qamcunapaq Dios nishqanta queno escriberqan: ‘Que nunacunaqa shimincunallawanmi respetamaq tucuyan; Peru shonquncunachoqa manam yarpäyämanpistsu[‘]” (Marcos 7:6). Rasumpa kaqchöqa, llapan shonquntsikwan sirvenqantsikllaqa manam Diosnintsik munanqannö adorëkanqantsiktatsu rikätsikun.

Pushakoq religiösokuna y pëkunata qateqkuna mana alli rurëkäyanqantam Jesusqa mana mantsashpa rikätsikurqan. Pëkunapaq Diospa Palabran kënö ninqantam nirqan: “Nunacunapa costumbrincunallata yachatsicuyaptinmi, adorayämanqanpis sirwintsu” (Marcos 7:7). Diospa mandakïninkunapitapis más precisaqpaqqa churayaq costumbrenkunatam, tsëmi Diosta adorayanqampis ni imapaq sirverqantsu.

Tukïnöpa Diosman chänapaq kaqtaqa Biblia manam yachatsikuntsu, sinöqa huknöllapa kanqantam. Mateo 7:13, 14 textom kënö nin: “¡lmeca quichqui puncupa yecoqno cayë! Porqui imeca jatun puncupa yecurir, anchu nänipa ewaqnomi infiernuman [“ushakëman”, NM] atscaq euquicayan. lmeca quichqui puncupa yecurir, llanulla nänipa ewecaqnomi wiñe cawaquita tarintsic, y wallcaqllam tse nänipaqa ewayanpis”.

¿Imanötaq yanapashunki rasumpa kaqta musyanqëki? Këman yarpäri, ëqinëkipaq atska killakunapa yachakushqa kankiman, y tsëpitana cörrenqëkichö ganëkunkiman, pero premiotaqa qoyäshunkimantsu huk reglamentota mana cumplishqa kaptiki. ¿Imanöraq sientekunkiman? Llapan kallpachakunqëki envänolla kanqantachi pensankiman. ¿Manatsuraq tsënölla Diosta adoranqantsikwampis pasakunman?

Diosta adoranqantsiktaqa huk carrëratawanmi apóstol Pablu igualatsirqan, tsëmi kënö qellqarqan: “Tsenollam corir gananacoq nunapis, llapan reglamentucunata mana cumplerqa premiuta chasquintsu” (2 Timoteu 2:5). Adoracionnintsikta Dios chaskinampaqqa, “llapan reglamentucunata[m]” cumplinantsik, huk parlakïchöqa pë munanqannömi adoranantsik. Huk carrërachö cörreqqa manam munanqampatsu ëwakun, tsëta rurarqa pë gananqanta niyänantaqa manachi shuyaranmantsu. Tsaq tsënöllam noqantsikpis Diosman chänapaq nänitaqa kikintsiktsu munanqantsikmannö akrakunantsik, tsënö rurarqa manachi Diosnintsik chaskimänata shuyarashwantsu.

Dios munanqannö adoranapaqqa, religionnintsikchö manam ni ima ulikï o llullakuy kanmantsu. Jesusqa kënömi nirqan: “Rasonpa adoraqkuna[qa] adorayanqa Teytata espirituchow i rasonkaqchow[mi]” (Juan 4:23, QKW). Y, ¿mëchötaq Diosnintsikpita rasumpa kaqta yachakushwan? Palabran Bibliallachömi (Juan 17:17). *

[Päginapa ura kuchunchö willakï]

[8 kaq päginachö ninqan]

¿Llapan religionkunatsuraq yachatsikuyan Dios munanqannö adoranapaq?