5 E Talia e le Atua Tapuaʻiga Uma e Faia ma le Faamaoni—Pe e Moni?

Aʻoaʻoga atonu na e faalogo i ai: “E pei lava ona tele auala e taunuu i le mea e tasi, e faapena foʻi ona tele auala e tau atu i le Atua. E tatau ona saʻili e le tagata lona lava auala e tau atu i le Atua.”

Le aʻoaʻoga a le Tusi Paia: E tatau ona tatou tapuaʻi ma le faamaoni, ae ʻalofia le taufaasesē ma le faafiaamiotonu. Na fetalai Iesu i taʻitaʻi lotu i ona aso i le māfuaaga ua teena ai i latou e le Atua: “O outou o tagata faafiaamiotonu, ua moni ai le valoaga a Isaia e pei ona tusia e faapea, ʻUa āva mai nei tagata iā te aʻu i o latou laugutu, a ua mamao ese lava o latou loto mai iā te aʻu.’” (Mareko 7:6) E ui i lea, e lē faapea e na o le iai o se uiga faamaoni, ona mautinoa lea e talia e le Atua la tatou tapuaʻiga.

Na faamanino mai e Iesu lenei manatu, ina ua ia faaalialia le māfuaaga autū e sesē ai le tapuaʻiga a taʻitaʻi lotu, ma a latou tagata lotu. Sa ia faatatau atu iā i latou upu a le Atua, e faapea: “E lē aogā la latou tapuaʻiga o loo fai mai iā te aʻu, auā ua faavae a latou aʻoaʻoga i mataupu a tagata.” (Mareko 7:7) Sa “lē aogā,” pe e leai se uiga o la latou tapuaʻiga, ona sa faamuamua a latou tū faalelotu nai lo faatulagaga a le Atua.

Nai lo o le lagolagoina o le manatu e tele ni auala talafeagai e faalatalata atu ai i le Atua, ua aʻoaʻoina mai i le Tusi Paia e faapea e na o le tasi le auala. Ua faapea mai le Mataio 7:13, 14: “Ia outou ulu atu i le faitotoʻa vaitiiti, auā e vatele ma lautele le auala e tau atu i le faaumatiaga, ma e toʻatele foʻi i latou e ui ai. Ae e vaitiiti le faitotoʻa ma e lauitiiti foʻi le auala e tau atu i le ola, e toʻaitiiti foʻi i latou o ē e maua.”

Aogā o le iloaina o aʻoaʻoga moni: Seʻi mafaufau i ou faalogona pe afai na e toleni mo le tele o masina, ina ia auai i se tamoʻega o se malafoni ma sa e manumalo ai, ae mulimuli ane na faalēaogāina ona sa e solia ma le lē iloa se tasi o tulafono o le tamoʻega. Atonu o le a e mafaufau ua maʻimau au taumafaiga. Pe e mafai ona tupu se mea faapena i la tatou tapuaʻiga i le Atua?

I le faatusaina o la tatou tapuaʻiga i se tagata e tauvā i ni taaloga, na tusi le aposetolo o Paulo e faapea: “Afai foʻi e tauvā se tagata i ni taaloga, e lē faapaleina o ia seʻi vaganā ua tauvā e tusa ai ma tulafono.” (2 Timoteo 2:5) E tatou te maua le finagalo malie o le Atua e ala i le tapuaʻi iā te ia “e tusa ai ma tulafono,” o lona uiga, o le auala e fiafia iai o Ia. E lē mafai ona filifilia e i tatou lava le auala e tau atu i le Atua, e pei lava ona lē mafai e se tagata tamoʻe ona filifili so o se auala e manaʻo iai, ae faatalitalia e manumalo i le tamoʻega.

Ina ia faafiafia le Atua, e lē tatau ona aafia la tatou tapuaʻiga i aʻoaʻoga pepelo e uiga iā te ia. Ua faapea mai Iesu: “O ē o loo i le tapuaʻiga moni, latou te tapuaʻi i le Tamā i le agaga ma le upu moni.” (Ioane 4:23) E tatou te aʻoaʻoina le auala moni e tau atu i le Atua mai i lana Afioga, le Tusi Paia.—Ioane 17:17. *

[Faaopoopoga i lalo]

[Ata i le itulau 8]

Po o aʻoaʻoina tagata e lotu uma ina ia tapuaʻi i le Atua i le auala e fiafia i ai o Ia?