5 Gado feni en bun kaba te sma e anbegi en nanga wan krin ati​—A sani dati tru?

Kande yu yere sma e taki: „Neleki fa furu pasi e go na a srefi presi, na so furu pasi de di e tyari sma go na Gado. Ibri sma musu feni en eigi pasi go na Gado.”

San Bijbel e leri wi: Wi musu anbegi Gado nanga wan krin ati, èn wi no musu hoigri te wi e anbegi en. Yesus ben taigi den kerki fesiman fu a ten fu en fu san ede Gado no ben feni den bun. A ben taki: „Un hoigriman, a profeiti Yesaya ben abi leti di a ben taki fu unu na ini Gado Buku. A ben taki: ’A pipel disi e gi mi grani nanga den mofo, ma den ati de farawe fu mi’” (Markus 7:6). Ma te wi e anbegi Gado nanga wan krin ati, dan dati no wani taki ete dati a o feni na anbegi fu wi bun.

Yesus ben tyari disi kon na krin di a ben sori san ben de a moro prenspari sani di meki taki na anbegi fu den kerki fesiman nanga den bakaman fu den no ben bun. A ben sori san Gado ben taki fu den: „Na fu soso den e tan anbegi mi, bika na den komando fu libisma den e leri trawan” (Markus 7:7). Na anbegi fu den ben de „fu soso” fu di den ben feni taki den gwenti fu den prenspari moro den sani di Gado ben aksi fu den.

Bijbel no e leri taki furu pasi de di e tyari sma go na Gado, ma na presi fu dati a e leri taki wán pasi nomo de. Mateyus 7:13, 14 e taki: „Pasa go na ini a smara doro. A pasi di e tyari sma go na dede, bradi èn a bigi. Furu sma e waka a pasi dati. Ma a doro di e tyari sma go na libi, pikin èn a pasi fu en smara. Wan tu sma nomo e feni en.”

A wini di a abi te yu sabi san tru: Kon meki wi taki dati yu oefen omeni mun langa fu lon na ini wan streilon, èn bakaten yu wini a streilon. Ma fa yu ben o feni en efu yu e yere bakaten taki yu no o kisi a prijs fu di sondro taki yu ben sabi, yu du wan sani di yu no ben mag du. Kande yu ben o feni taki ala muiti di yu du ben de fu soso. Yu denki taki wan srefi sortu sani kan pasa nanga yu te yu e anbegi Gado?

Na apostel Paulus ben teki na anbegi fu wi gersi nanga wan wega. A ben skrifi: „Te wan sma no e prei na a fasi fa a wega musu prei, a no e kisi wan kransi” (2 Timoteyus 2:5). Gado sa feni na anbegi fu wi bun te wi e anbegi en na wan fasi di e kruderi nanga a wani fu en. Wi srefi no kan bosroiti fa wi wani anbegi Gado, neleki fa wan sma di e lon na ini wan streilon no kan go lon na iniwan presi pe a wani, èn fruwakti ete fu wini a streilon.

Efu wi wani taki Gado feni na anbegi fu wi bun, dan wi no musu bribi den lei di sma e taki fu en. Yesus ben taki: „Den tru anbegiman o anbegi a Tata nanga yepi fu a santa yeye èn nanga yepi fu san tru” (Yohanes 4:23). Gado Wortu, Bijbel, e leri wi sortu anbegi Gado feni bun.​—Yohanes 17:17. *

[Futuwortu]

[Prenspari pisi na tapu bladzijde 8]

A tru taki ala kerki e leri sma fu anbegi Gado na wan fasi di a feni bun?