5 Makgamakglhtinan Dios putum takanajla. ¿Pi xlikana?

Makgapitsi wankgo: «Chuna la anan lhuwa tiji nema kaj lakatum niku linan, nachuna lhuwa la tlan nalakgtalakatsuwiyaw Dios. Chatunu chatunu nalaksaka la nalakgtalakatsuwiputun».

Wantuku masiya Biblia: Kintakakninkan xaxlikana xliwanat, ni kaj nalimasiyayaw. Jesús kawanilh xpulalinanin takanajla tuku xlakata Dios xkalakgmakganit: «Lakgaputiyunanin wixin. Lu wa tlan ntiʼaliwa mimpalakatakan Isaías, lantla ntatsokgnit: “Wa yuma ntachixkuwitat, kaj xkilhpinkan nkilimaxkikgoy nkakni, wampi wa xnakukan, lu wa tanu xtayat[”]» (Marcos 7:6). Pero, maski xlikana kakninaniyaw Dios ni wamputun pi nakinkamakgamakglhtinanan.

Jesús chuna limasiyalh akxni kawanilh tuku nitlan xtlawamakgolh tiku xpulalinkgo takanajla chu tiku kstalanikgo. Kawanilh tuku xwanit Dios: «Na nitu xtapalh lantla nkilimaxkikgoy nkakni sampi wa ntu nkaj xlimapakgsinkan chixkuwin limasiyukgoy kxtamasiyunkan» (Marcos 7:7). Xlakata pulana xwilikgo xtamasiyunkan ni xawa xlimapakgsin Dios, xtakakninkan «nitu xtapalh» xwanit, o nitu xlitaxtu.

Biblia wan pi kaj pulaktum la tlan talakatsuwinikan Dios chu ni pulaklhuwa. Mateo 7:13, 14 wan: «Anta nkalaktanutit kxatitsu malakcha; xampi lu wa pakgtlanka xamalakcha, chu na lu wa titlanka xatiji wa ntu an kputsankgan, na lu wa lhuwa nti laktanukgo anta. Xampi luwa titsu xamalakcha, chu xatiji, na lu wa titsu wa ntu an klatamat, na lu wa tsinu wa nti ntakgskgoy».

La makgtayayan nakatsiya tuku xaxlikana: Kalakpuwanti pi chatum tiku kgosnan akglhuwa papaʼ liskujli xlakata natayani, pero xtamakxtuka kaj xlakata ni makgantaxtilh tuku ni xkatsi. ¿La xmakgkatsilh? Xlakpuwa pi nitu litaxtulh tuku liskujli. ¿Nachuna naʼakgspula la kakninaniyaw Dios?

Apóstol Pablo tamalakxtumilh kakninaniyaw Dios xtachuna la tiku kgosnankgo chu tsokgnalh: «Nti ntlajanamputun kpukgaman, ni katikgalhilh xtatakin wa lapi ni pulana xtlajanalh wa lantla xlilat» (2 Timoteo 2:5). Xlakata namakgamakglhtinan kintakakninkan Dios, chuna nakakninaniyaw «lantla xlilat», chuna la xla lakgati. Chatum tiku kgosnama nila naʼan niku xla amputun chu nawanikan pi tlajanalh. Na xtachuna, nila nakakninaniyaw Dios la akinin lakgatiyaw chu nalakpuwanaw pi nalakgati.

Komo makgapaxuwaputunaw Dios, kintakanajlakan ni xlikgalhit tuku ni xaxlikana. Jesús wa: «Xaxlikana kakninanin nalikakninanikgo xaTlat espíritu chu xaxlikana» (Juan 4:23, NM). Chu kBiblia kinkawaniyan la nalakgtalakatsuwiyaw Dios (Juan 17:17). *

[Nota nema wi kpágina]

[Tuku wan página 8]

¿Putum takanajla masiyakgo la nakakninanikan Dios?