KISAS bo a yega di tende òf siña un di e mentiranan tokante Dios ku e seri di artíkulo akí ta refutá. Pero podisé ainda bo ta duda si bo mester kambia di religion òf nò. Esei ta di komprondé, foral si bo tin hopi tempu kaba ta kere un di e mentiranan ei.

Algun iglesia no ta animá nan miembronan pa kompará loke nan ta siña ku loke Beibel ta bisa; al kontrario, nan ta deskurashá esei. Otronan ta purba defendé nan siñansanan falsu, bisando ku Beibel ta kompliká i ku e no a ser skirbí pa tur hende komprondé. Tòg, mayoria di e disipelnan di Hesus a komprondé loke el a siña nan maske nan tabata hende gewon, sin muchu edukashon.—Echonan 4:13.

Òf kisas bo no ke analisá bo kreensianan a fondo, pasobra bo ta pensa ku esei lo por ta un muestra di falta di fe. Pero bo ta kere ku Dios lo rabia ku bo pasobra bo ke analisá su Beibel, esta, su mensahe na humanidat, pa bo por haña sa kiko ta su boluntat? Al kontrario, su Palabra ta animá bo pa analisá e Skritura personalmente. E ta bisa: “Komprobá pa boso mes kiko ta e boluntat di Dios, ku ta bon, agradabel i perfekto.”—Romanonan 12:2.

Ta masha importante pa haña sa e bèrdat tokante Dios, no djis pa siña algu nobo, sino pa bo por sa kiko bo tin ku hasi pa disfrutá di un mihó bida. Sí, e bèrdat por kambia bo bida. (Huan 8:32) Deanne, ku nos a menshoná den e artíkulo di introdukshon, ta edifiká su fe awor riba e Palabra di Dios. El a bisa: “Mi no tabata sa ku e Skritura ta papia asina kla; ta ora ku mi a kuminsá studia Beibel mi a ripará esei. Awor mi konosé Yehova, no simplemente komo un Dios sin sintimentu, sino komo mi amoroso Tata selestial. Mi bida a haña berdadero propósito.”

Kisas bo a yega di studia Beibel kaba, pero bo no a sinti ku esei a yuda bo. Si ta asina, no entregá. Ma si bo ta hasi esfuerso pa komprondé Beibel ku kreensianan robes na mente ta meskos ku trata di traha un pùzel ku un plachi robes komo guia. Lo bo por logra pega algun pida di e pùzel, pero despues bo ta legumai pasobra e pùzel no ta forma e plachi ku bo tin bo dilanti. Ma si bo kuminsá ku e plachi korekto, lo bo mira kon segun ku bo ta pega e otro pidanan, henter e pùzel ta forma.

Bo ke siña e bèrdat tokante Dios? Wèl, nos ta animá bo pa tuma kontakto ku Testigunan di Yehova den bo área òf skirbi na e adrès mas kumbiniente menshoná na página 4 di e revista akí pa bo haña un estudio di Beibel grátis.

[Komentario na página 9]

“Komprobá pa boso mes kiko ta e boluntat di Dios, ku ta bon, agradabel i perfekto.”—ROMANONAN 12:2