Tin Riyul’ e Rayog ni nge Thilyeg e Yafas Rom

DABISIY ni kam rung’ag ara kan fil ngom reb fapi ban u murung’agen Got ni kad weliyed ko fapi article ni ke yan. Yugu aram rogon, ma sana ba mo’maw’ ni ngam thilyeg e tin ni ke michan’um ngay, nib ga’ ni faanra ke n’uw nap’an ni ga ma lemnag nib riyul’.

Riyul’ nib mo’maw’ e re n’ey, ya bay boch e galesiya ni yad ma yog ndab un taareb rogonnag e machib rorad ko thin nu Bible. Ma boch i yad e yad ma guy rogon ni ngar micheged ni riyul’ e machib rorad, ya yad ma yog ni Bible e ba mo’maw’ ni ngan nang fan e thin riy, ma gathi kan ngongliy ni gubin e girdi’ ni ngar nanged fan. Machane yooren i gachalpen Jesus e dariy e skul rorad machane ur nanged fan e n’en ni i fil ngorad.​—Acts 4:13.

Rayog ni ngam dabuy ni ngam fal’eg i gay murung’agen e michan’ rom ni bochan e ga be rus nri m’ug nib war e michan’ rom. Machane, gur, ba puluw ni nge damumuw Got ngom ni bochan e ga be fal’eg i yaliy e thin rok u Bible ni ngam nang ko mang e baadag ni ngam rin’? Ya Thin rok e be pi’ e athamgil nga lanin’um ni ngam fal’eg i yaliy e thin nu Bible, ya be gaar: “Ngam nanged e tin nib m’agan’ Got ngay ni tin nib fel’, nib fel’ u wan’ Got ma rib yal’uw.”​—Roma 12:2.

Ba ga’ fan ni ngam fil murung’agen ni gathi kemus ni bochan ni ngam fil ban’en nib beech ya bochan ni rayog ni nge thil e yafas rom nge fel’. (John 8:32) Deanne, ni bay e thin rok ko bin som’on e article e ke gelnag e michan’ rok ko Thin rok Got. I yog ni gaar: “Nap’an ni kug tabab i fil e Bible mfin gu nang nrib tamilang e thin riy. Ma chiney e kug nang ni Jehovah e ir e Got rog nge Chitamag nu tharmiy ni ma t’ufegey. Kug pirieg nriyul’ ni bay fan e yafas.”

Sana kam fil e Bible kafram ma ga lemnag ndariy angin. Faanra aram rogon ma dab mu tal. Faanra kan bannagem u murung’agen Got mab mo’maw’ ni ngam nang fan e thin nu Bible, ya re n’ey e bod ni ga be guy rogon ni ngam fal’eg reb e masin ni ke kireb ni ga be fol u babyoren yugu reb e masin. Sana rayog ni ngam fal’eg yu yang riy machane ga ra tal ya kam pirieg ndabiyog ni ngam fal’eg ni ga’ngin. Machane, faan ga ra fol ko babyor riy ma aram e rayog ni ngam fal’eg fare masin.

Ere ga baadag ni ngam fol u reb e babyor nriyul’ nrayog ni nge ayuwegem ngam nang e tin riyul’ u murung’agen Got, fa? Gamad be pi’ e athamgil nga lanin’um ni nga mog ngak e Pi Mich rok Jehovah ko binaw rom ara mu yol ko address ni bay ko page 4 ko re ke babyor ney, ya nge yog ni yib be’ i guyem ngam filew e Bible ndariy puluwon.

[Blurb on page 9]

“Rayog ni ngam nanged e tin nib m’agan’ Got ngay ni tin nib fel’, nib fel’ u wan’ Got ma rib yal’uw.”​—ROMA 12:2