Tika Onongo Ingeyo?

Pingo lulok cente onongo gitye i Jerucalem i ot pa Lubanga?

▪ Ma peya Yecu oto, en ojuko tim mo marac adada ma onongo kitye ka timone i ot pa Lubanga. Baibul oloko iye ni: “Yecu . . . oryemo jo ducu ma onongo gicato wil ki ma giwilo jami i ot pa Lubanga. Oryebo meja pa lulok cente, ki kom pa lucat amam. Ci owaco botgi ni, Gicoyo ni, Oda gibilwongo ni ot me lega’; ento wun wuloko odoko boro pa luyak.”​—Matayo 21:12, 13.

Lujudaya kacel ki lurok ma gudoko Lujudaya ma gukwo i cencwari me acel onongo gicito i Jerucalem i to pa Lubanga kun gia ki i kabedo ki boma mapat pat. Ento, onongo kimito ni gucul mucoro me ot pa Lubanga ki cente ma kiye, guwil lee me atyera i wi keno tyer, ki dong gumi gityer mukene ma igi opwoyo. Pi meno, lulok cente onongo giloko cente ma nyige ma dano gibino kwede ki i kabedo mapat pat kun giloko cente ma kiye, ento lulok cente-ni onongo gigwoko mukene me culgi. Ka kwero kwer pa Lujudaya woto ki nyiko cok, lulok cente magi onongo gicibo meja i Dyekal ma Kiyubo pi Lurok i ot pa Lubanga.

Pien Yecu owaco ni lulok cente magi guloko ot pa Lubanga odoko “boro pa luyak,” nen calo onongo giburo dano kun gingolo wel matek pi loko cente.