Mä ja templë diˈib Jerusalén, ¿tiko nety jyamëtyë jäˈäy diˈib wyingugoondëbë meeny?

▪ Ja waanë nety yˈaktëgoyˈaty parë Jesus yˈoogët, ko dyaˈoˈoyë tuˈugë jotmay mä ja templë. Biiblyë jyënaˈany: “Jesus tyëjkë mëj tsäjptëjk nyabotsoty es dyajpëtseemy nidëgekyë diˈibë naty jap juuy toˈktëp, es dyajjëmbijty ja myeesëty diˈibë naty jap wyingugoondëp ja meeny diˈibë kyaj ja tsäjptëjk tjaˈˈaty, es nandëˈën dyajjëmbijty ja syiyëty diˈibë tyoˈktëp ja pak. Ta ja Jesus jyënany: Dëˈën ja Diosë jyaaybyajtën jyënaˈany: Yëˈë ndëjkëts yëˈë dëˈën mä jäˈäy [nyuˈkxtaˈaky], per miitsëty të xyajwäˈändë maˈtspë äänk” (Matewʉ 21:12, 13).

Mä primer siiglë, ko ja xëë tpääty, may ijty jyäˈttë mä ja templë diˈib Jerusalén ja judiyëty ets diˈib kyaj jyudiyëty, diˈib tsoˈondëp wiink paˈis o wiink käjpn. Pääty tsojkëp ijty twingugondët ja myeeny syentääbë mët diˈib tuump mä ja templë, parë ja kyugëbety dyaktët diˈib jëmëjt jëmëjt, tjuytyët ja jëyujk diˈib yakandëp wintsëˈkën o dyoxtët tijaty. Pääty jyamëty ja diˈib wyingugoondëp ja meeny, per nyibëjktëp ko twingugondë. Jam ijty nyaybyëjtäˈägëdë templë tëjkwiiny mä mbäät tyëkëdë ja diˈib kyaj yˈisraelitëty (Atrio de los Gentiles).

Jesus ojts tmëkmëgajpxy pënaty wyingugoondëp ja meeny mët ko ja templë dyajwäˈändë extëmë “maˈtspë äänk”. Tyäˈädë yëˈë xytyukˈijxëm ko kajaa nety tjantsy nyibëktë ko ja meeny twingugondë.