Kont Taf?
Għala kien hemm is-sarrafa tal-flus fit-tempju taʼ Ġerusalemm?
▪ Ftit qabel mewtu, Ġesù tkellem dwar inġustizzja kbira li kienet qed isseħħ fit-tempju. Il-Bibbja tgħid: “Ġesù . . . keċċa ’l barra lil dawk kollha li kienu qed ibigħu u jixtru fit-tempju, u qaleb l-imwejjed tas-sarrafa tal-flus u l-bankijiet taʼ dawk li kienu jbigħu l-ħamiem. U qalilhom: ‘Hu miktub, “Dari tissejjaħ dar tat-talb,” imma intom qed tagħmluha għar tal-ħallelin.’”—Mattew 21:12, 13.
Lhud u proseliti Lhud tal-ewwel seklu vvjaġġaw minn ħafna artijiet u bliet lejn it-tempju f’Ġerusalemm, u kienu jieħdu magħhom muniti tal-lokal tagħhom. Madankollu, huma kellhom jużaw muniti aċċettabbli biex iħallsu t-taxxa annwali tat-tempju, biex jixtru xi annimali għas-sagrifiċċju, u biex jagħmlu offerti volontarji oħrajn. B’hekk, is-sarrafa tal-flus kienu jsarrfu l-flus li n-nies kienu jieħdu magħhom minn postijiet differenti f’muniti aċċettabbli, imma kienu jżommu parti mill-flus bħala ħlas. Hekk kif kienu joqorbu l-festi Lhud, dawn is-sarrafa tal-flus kienu jarmaw l-imwejjed fil-Bitħa tal-Ġentili tat-tempju.
Il-kritika taʼ Ġesù li s-sarrafa tal-flus kienu qed jagħmlu t-tempju “għar tal-ħallelin” b’mod evidenti tindika li l-flus li kienu qed jieħdu għas-servizzi tagħhom kienu m’ogħla s-sema.
Is-siġar taż-żebbuġ għala kienu taʼ valur b’mod partikulari fi żminijiet Bibliċi?
▪ Is-siġar taż-żebbuġ u l-għelieqi bid-dwieli kienu fost il-barkiet li Alla wiegħed lin-nies tiegħu jekk jibqgħu leali lejh. (Dewteronomju 6:10, 11) Sal-lum, is-siġra taż-żebbuġ hi stmata ferm fi nħawi fejn tikber. Tistaʼ tipproduċi ħafna frott għal mijiet taʼ snin mingħajr ħafna attenzjoni. Siġra kultivata tistaʼ tiffjorixxi saħansitra fix-xagħri u tiflaħ perijodi spissi taʼ nixfa. Jekk is-siġra titqaċċat, l-għeruq itellgħu diversi friegħi li jistgħu jikbru fi zkuk ġodda.
Fi żminijiet Bibliċi, il-qoxra u l-weraq tas-siġra kienu taʼ valur għax kienu jintużaw bħala mediċina li setgħet tnaqqas id-deni. Il-gomma tar-raża li ddemmaʼ minn friegħi qodma u li għandha riħa taʼ vanilja kienet tintuża biex issir il-fwieħa. Madankollu, is-siġra kienet tintuża l-iktar bħala sors taʼ ikel—iż-żebbuġ tagħha u speċjalment iż-żejt tagħha. Żebbuġa misjura mingħajr għadma hi nofsha żejt.
Siġra tajba tistaʼ tagħti daqs 57 litru żejt kull sena. Iż-żejt taż-żebbuġa kien jintuża wkoll bħala fjuwil għal-lampi, għal skopijiet ċerimonjali u reliġjużi, bħala prodott kosmetiku għall-ġisem u għax-xagħar, u bħala mediċina biex idewwi l-ġrieħi u jserraħ it-tbenġil.—Eżodu 27:20; Levitiku 2:1-7; 8:1-12; Rut 3:3; Luqa 10:33, 34.