Ove Ankho Utyiale?

Omokonda yatyi mondyuo ya Huku mo Jelusalei ankho muna ovakumani vonombongo?

▪ Etyi ankho kuakamba katutu opo Jesus aipawe, oe wapopia konthele yotyipuka tyimwe otyivi ankho tyilingwa mondyuo ya Huku. Ombimbiliya ipopia okuti: “Jesus . . . ataatela pondye aveho ankho valandesila nokulanda mondyuo ya Huku. Wayendaula onomesa mbovakumani vonombongo, novipundi via vana valandesa onopomba. Iya evepopila okuti: ‘Tyahonekwa okuti: “Ondyuo yange maikaihanwa okuti ondyuo yomalikuambelo.” Anthi, onwe mueilinga eleva liovifuanga.’”—Mateus 21:12, 13.

Kohale ova Judeu no vokuetavela efendelo lio va Judeu ankho vatunda kovilongo ovinyingi nomapundaumbo, okuenda kondyuo ya Huku mo Jelusalei, avaetelela onombongo. Mokonda ankho vaitwa okufeta onombongo kese enima mondyuo ya Huku, nokulanda ovipako pala ovilikutila, nokulinga oviawa ovikuavo. Ngotyo, ovakumani vonombongo ankho vapondola okukumana onombongo mbavo opo vapewe onombongo mbotyilongo otyo. Tyina ovipito ovio vio va Judeu vihikapo, ovakumani ovo vonombongo ankho vapaka onomesa mbavo mondyuo ya Huku Motyitali tyo Nosindiyu.

Jesus apopila vana ankho vakumana onombongo mondyuo ya Huku okuti “mueilinga eleva liovifuanga,” tyilekesa okuti tyina ankho vakumana vaita onombongo ononyingi.