Kua Kite Ainei Koe?

Eaa te angaanga a te aronga oko moni i te iero i Ierusalema?

▪ I mua poto ua ake i tona matenga, kua akatikatika a Iesu i tetai angaanga tau kore tikai e raveia ra i roto i te iero. Te akakite maira te Pipiria e: “Aere aturā Iesu . . . kua tuaru atura ki vao te aronga i oko atu e i oko mai i roto i te iero ra, tatipoki atura oki i te au papa o te aronga oko moni ra, e te au nooanga o te aronga i oko i te kukupa, Kua karanga atura kia ratou, Kua oti oki i te tataia, ‘E karangaia toku are, e are pure anga;’ kua akariroia io nei ra e kotou ei ‘ana no te aronga keia.’”​—Mataio 21:12, 13.

E aere mai ana te ngati Iuda e te au poroteraita ngati Iuda mei te au enua e manganui e mei te au oire ki te iero i Ierusalema, e apai katoa mai ana i te moni mei to ratou tuanga enua. Inara, ka anoanoia ratou kia oronga i te moni tei tau no te tutaki i te tero o te iero i te mataiti, i te oko i te au manu no te atinga, e tetai atu au atinga oronga ua. No reira ka taui te aronga oko moni i te moni a te tangata i apai mai kia tau ki te moni tei anoanoia no te atinga, inara ka rave ratou i tetai ei tutaki ia ratou. Kia vaitata te taime o te oroa, ka akanoo teia aronga oko moni i ta ratou kaingakai i ko i te Paepae o te Kenitara i roto i te iero.

Te akaapaanga a Iesu e te akariro ra te aronga oko moni i te iero ei “ana no te aronga keia,” te akapapu maira te reira e e maata rava ta ratou e tiati ra i te tangata.

Eaa ra te rakau orive i akaperepere maataia ai i te au tuatau Pipiria?

▪ Ko te au rakau orive e te kainga vine, tetai o te au akameitakianga ta te Atua i taputou mai ki tona iti tangata no to ratou akarongo tiratiratu kiaia. (Deuteronomi 6:10, 11) E tae mai ki teia ra, e mea akaperepere maataia te rakau orive i te au enua e tupu ra te reira. Ka uua atu rai te reira no te au anere mataiti e kare e angaanga maata i te akono. Tupu meitaki te reira i te ngai tokatoka, e te matutu i te au tuatau maro. Me tipuia te tumu, e maata te au uri ou ka tupu mai mei te au aka torotoro aere, e ka riro mai ei au tumu ou.

I te au tuatau Pipiria, e mea puapinga te pakiri e te rau no te mea e vairakau to roto ei akamaru i te maki piva. Te tapou e tae mai ana no roto i te au rara takere, e aunga vanira tona kakara, e akariroia ana ei akari pipi. Tei maata atu, i puapinga roa atu te rakau orive no te kai ta te reira e oronga maira—tona ua e te inu. Te kiko o tetai orive para okotai, e inu ua tetai apa.

Ka rauka mai mei te 15 karani (57 rita) inu i te mataiti mei tetai tumu orive meitaki. E taangaanga katoaia ana te inu orive ei inu ramepa, no te au akakoroanga akataoonga e te akamorianga, ei akamanea i te kopapa e te rouru, e ei vairakau akamaru e te akameitaki i te au puta e te pakiakia.​—Exodo 27:20; Levitiku 2:1-7; 8:1-12; Ruta 3:3; Luka 10:33, 34.