Yu Save Long Dispela?
Yu Save Long Dispela?
Bilong wanem ol man bilong senisim mani ol i stap insait long tempel long Jerusalem?
▪ Paslain liklik long Jisas i dai, em i stretim wanpela samting nogut tru i bin kamap long tempel. Baibel i tok: “Jisas . . . i rausim ol man i wok long baim na salim ol samting insait long tempel. Na em i kapsaitim ol tebol bilong ol man i wok long senisim mani na ol fom bilong ol man i wok long salim ol pisin balus. Na em i tokim ol: ‘Rait Holi i tok: “Ol bai kolim haus bilong mi olsem haus bilong mekim beten.” Tasol yupela i mekim em i kamap olsem ples hait bilong ol stilman.’ ”—Matyu 21:12, 13.
Long taim bilong ol aposel, ol Juda wantaim ol arapela man husat i bihainim lotu Juda, ol i save kam long planti narapela kantri na taun, na ol i save go long tempel long Jerusalem, na ol i save bringim tu ol koin bilong ol ples bilong ol. Tasol ol i mas yusim mani i stret bilong baim takis bilong tempel, baim ol animal bilong mekim ofa, na mekim ol narapela ofa. Olsem na ol man bilong senisim mani i save sasim ol fi bilong senisim ol narapela narapela mani ol man i bringim. Long taim bilong ol bikpela de bilong lotu bilong ol Juda, ol man bilong senisim mani i save sanapim ol tebol insait long tempel long Banis Bilong Ol Man Bilong Ol Arapela Lain.
Taim Jisas i krosim ol man bilong senisim mani olsem ol i mekim tempel i kamap “ples hait bilong ol stilman,” dispela i makim olsem ol i bin sasim bikpela mani tru long wok ol i mekim.
Bilong wanem ol man long taim bilong Baibel ol i bin laikim tru ol diwai oliv?
▪ Ol diwai oliv na ol gaden wain em sampela tasol bilong ol gutpela samting God i bin tok promis long givim long lain bilong em i stap gut long em. (Lo 6:10, 11) I kam inap long nau, ol man i sindaun long ol hap we ol diwai oliv i gro long en, ol i laikim tru ol dispela diwai. Em inap kamapim planti kaikai insait long sampela handret yia na i no gat planti wok bilong lukautim diwai. Diwai oliv inap kamap gut long graun i gat planti ston na em i no inap i dai maski i no gat ren inap longpela taim. Sapos ol i katim diwai, as bilong en inap kru gen na bihain em i kamap bikpela.
Long bipo, ol man i save yusim skin na lip bilong diwai oliv olsem marasin bilong daunim sik fiva. Na susu i save kamaut long olpela han bilong diwai oliv, smel bilong en i olsem vanila na ol i save yusim bilong wokim pefium. Tasol ol man i laikim tru dispela diwai, long wanem, ol i save kisim ol sid na oil bilong en olsem kaikai. Taim ol pikinini oliv i mau, olgeta wan wan sid i save pulap tru long oil.
Wanpela gutpela diwai oliv inap kamapim 57 lita oil insait long wanpela yia. Ol i bin yusim oliv oil bilong laitim lam, mekim ol wok bilong lotu na ol narapela bung, rapim long bodi na gras, na rapim long sua o long skin bilong man i kisim bagarap.—Kisim Bek 27:20; Wok Pris 2:1-7; 8:1-12; Rut 3:3; Luk 10:33, 34.