‘Balilinga Ukubacindika pa Kukanacita ico Ubuteko Bwalefwaya’

ILYO Adolf Hitler, kateka umukalushi, aleteka icalo ca Germany, alipokelele amakalata ayengi nga nshi. Mu 1945, ilyo abena Russia bapokele incende yashingulwike Berlin, amakalata ayengi bayatwele ku Moscow uko baileyasungila. Kalemba we lyashi lya kale, Henrik Eberle alicecetele aya makalata ayo basungile mu cikuulwa basungilamo ifya kale mu Moscow pa kuti eshibe abalembeele Hitler aya makalata no mulandu bayalembeele. Ifyo Eberle asangile pa numa ya kuceceta aya makalata, afilembele mu citabo citila Briefe an Hitler (Amakalata Balembeele Hitler).

Dr Eberle atile: “Bakafundisha na bana be sukulu, bashimapepo na ba sista, abashibomba incito na bashimakwebo abene bene, abakalamba ba bashilika ba pa menshi na bashilika fye ba buteko bwa Nazi, bonse balilembele amakalata kuli Hitler. Bamo balemucindika sana kwati ni Mesia uwafyelwe na kabili; bambi nabo balemumona ukuti ali muntu umubi icine cine.” Bushe pa makalata Hitler apokelele pali ayafumine ku bakalamba ba macalici abaleilishanya pa fyabipa ifyo ubuteko bwa Nazi bwalecita? E po yali nomba yali fye ayanono sana.

Muli ici cine cikuulwa ca ku Moscow, Eberle alisangilemo na faelo umwali amakalata ayengi ayo Inte sha kwa Yehova ukufuma mu ncende shalekanalekana isha Germany balembeele Hitler, umo baleilishanya pa fyo ubuteko bwa Nazi bwalecita. Na kuba, ba Nte ukufuma mu fyalo 50 balitumiine Hitler amakalata 20,000 na matelegramu ya kuilishanya pa fyo balecusha Inte sha kwa Yehova. Ba Nte abengi nga nshi balibekete, bambi abengi balibepeye nelyo ukufwa pa mulandu wa kubacusha ku ba Nazi. Dr. Eberle asondwelele ukuti: “Nga kulinganya impendwa ya bantu abengi nga nshi abafwile no kucushiwa mu buteko bwa ba Nazi, impendwa ya [Nte sha kwa Yehova] kuti yamoneka iinono sana. Lelo ico aba bantu babacushishe ni co balikaninine fye ndai ukucita ifyo ubuteko bwa Nazi bwalefwaya. Aba bantu balilinga ukubacindika.”