Kuti Mwasanga “Ukwishiba Lesa”
Palameni Kuli Lesa
Kuti Mwasanga “Ukwishiba Lesa”
YEHOVA LESA alitupeela icuma icacindama nga nshi, kabili alafwaisha ukuti tucisange. Ici cuma tacingalenga umuntu ukuba umukankaala, lelo kuti calenga ateka umutima ku fintu ifyo akwata, ukukanasakamikwa, no kuba ne nsansa. Kabili nangu umuntu engakwata indalama ishingi shani, te kuti ashite ifi fintu. Bushe ici cine cuma e cinshi? Icasuko kuti twacisanga mu mashiwi yalandile Imfumu ya mano Solomone ayalembwa pa Amapinda 2:1-6.
Solomone alandile ukuti ici cuma “kwishiba Lesa,” e kutila icine icaba muli Baibolo icilanda pali Lesa ne fyo afwaya. (Icikomo 5) Muli ici cuma mwaliba ifintu ifingi.
Amasambilisho ya cine. Baibolo ilasuka amepusho pamo nga aya: Bushe Lesa nani ishina? (Amalumbo 83:18) Cinshi cicitika umuntu nga afwa? (Amalumbo 146:3, 4) Mulandu nshi twabela pano calo? (Ukutendeka 1:26-28; Amalumbo 115:16) Bushe batini nga mwali no kulipila pa kusanga amasuko kuli aya mepusho, ni ndalama shinga mwingapoosapo?
Ukufunda ukusuma. Baibolo ilatufunda ifyo tulingile ukucita pa kuti tuleikala bwino. Bushe kuti mwacita shani pa kuti icupo cenu cikapwa? (Abena Efese 5:28, 29, 33) Bushe kuti mwakusha shani bwino abana benu? (Amalango 6:5-7; Abena Efese 6:4) Kuti mwacita shani pa kuti mube ne nsansa? (Mateo 5:3; Luka 11:28) Bushe tamulesumina ukuti amasuko kuli aya mepusho yalicindama nga nshi?
Ukwishiba ifyo Lesa aba ne mibele akwata. Muli Baibolo e mo twingasambilila icine pali Lesa. Bushe Lesa aba shani? (Yohane 1:18; 4:24) Bushe alatusakamana? (1 Petro 5:6, 7) Mibele nshi imo iyapulamo iyo akwata? (Ukufuma 34:6, 7; 1 Yohane 4:8) Bushe muletontonkanya ukuti ni shinga mwingalipila pa kwishiba icine pali Kabumba wesu?
Ukwabula no kutwishika, “ukwishiba Lesa,” cuma icacindama. Bushe kuti mwasanga shani ukwishiba Lesa? Icasuko caba pa Amapinda 2 icikomo 4, apo Solomone alingenye ukwishiba ku “fyuma fyashikama.” Tontonkanyeni pali ici: Pa kuti umuntu asange icuma icashikama afwile ukubombesha. E fyo caba na pa kusanga ukwishiba Lesa, tufwile ukubombesha. Ici cuma cacindama cashikama muli Baibolo. Kanshi pa kucisanga, tufwile ukubombesha.
Solomone alilondolola ifyo tulingile ukucita pa kuti tusange “ukwishiba Lesa.” Amashiwi ya kuti “nga wapokelela ifyebo fyandi” na ya kuti “walwile umutima obe” yalanga ukuti tufwile ukuba no mutima wa kufwaya ukusambilila. (Ifikomo 1, 2) Amashiwi ya kuti “nga walilila,” “nga ulefifwaya,” na ya kuti “ukufifwayafwaya” yalanga ukuti tufwile ukubombesha. (Ifikomo 3, 4) Kanshi pa kuti tusange ukwishiba Lesa, tufwile ukupoosako sana amano ku kusambilila Baibolo, no kufwaisha ukwishiba ifyo tulesambilila.—Luka 8:15.
Nga twapoosako amano ku kusambilila Baibolo, Yehova akatwafwa ukusanga ici cuma. Icikomo 6 citila: “Yehova e upeela amano.” Ni Lesa fye e wingatwafwa ukumfwikisha icine icaba mu Baibolo. (Yohane 6:44; Imilimo 16:14) Icishinka ca kuti: Nga mulefwayafwaya mu Cebo ca kwa Lesa, mukasanga “ukwishiba Lesa,” icuma icacindama icikalenga imikalile yenu ukuwama kabili mukaba ne nsansa.—Amapinda 2:10-21. *
Amalembo ya kubelenga mu October:
[Futunoti]
^ para. 10 Inte sha kwa Yehova mu calo conse balasambilisha Baibolo ku bantu abalefwaya, kabili tabalipilisha. Nga mulefwaya ukusambilila Baibolo, kuti mwamona Inte sha kwa Yehova uko mwikalila nelyo kuti mwabalembela ukubomfya adresi yalinga pa yali pe bula 4.
