Imong Makaplagan “ang Mismong Kahibalo sa Diyos”
Pakigsuod sa Diyos
Imong Makaplagan “ang Mismong Kahibalo sa Diyos”
BUOT ni Jehova nga Diyos nga atong makaplagan ang usa ka bililhon kaayong bahandi. Kini dili makapadato, apan makahatag ug kalinaw sa hunahuna, katagbawan, ug kalipay—mga butang nga dili kabayrag sapi. Unsa kini nga bahandi? Gipatin-aw kini ni Haring Solomon sa Proverbio 2:1-6.
Gibutyag ni Solomon nga kini nga bahandi mao “ang mismong kahibalo sa Diyos”—ang kamatuoran bahin sa Diyos ug sa iyang katuyoan nga gipadayag sa Bibliya. (Bersikulo 5) Daghag bahin kini nga bahandi.
Tinuod nga pagtulon-an. Gitubag sa Bibliya ang mga pangutanang sama niini: Unsay ngalan sa Diyos? (Salmo 83:18) Unsay mahitabo sa dihang mamatay? (Salmo 146:3, 4) Nganong ania kita dinhi? (Genesis 1:26-28; Salmo 115:16) Kabayran bag salapi ang tubag nianang hinungdanong mga pangutana?
Maalamong tambag. Gisulti kanato sa Bibliya ang labing maayong paagi sa pagkinabuhi. Sa unsang paagi magmalungtaron ang kaminyoon? (Efeso 5:28, 29, 33) Unsay epektibong paagi sa pagmatutog mga anak? (Deuteronomio 6:5-7; Efeso 6:4) Sa unsang paagi magmalipayon? (Mateo 5:3; Lucas 11:28) Sa makausa pa, kabayran bag salapi kining kasaligang mga tambag?
Kahibalo bahin sa Diyos. Ang Bibliya mao ang pangunang tinubdan sa tukmang impormasyon bahin sa Diyos. Unsa siya nga Persona? (Juan 1:18; 4:24) May pagtagad ba siya kanato? (1 Pedro 5:6, 7) Unsa ang pipila sa iyang pangunang mga hiyas? (Exodo 34:6, 7; 1 Juan 4:8) Kabayran bag salapi ang tukmang impormasyon bahin sa atong Maglalalang?
Usa gayod ka espirituwal nga bahandi “ang mismong kahibalo sa Diyos.” Sa unsang paagi kini makaplagan? Ang Proverbio 2:4 mohatag natog ideya, diin si Solomon nagtandi niini nga kahibalo sa “tinagong mga bahandi.” Hunahunaa: Ang tinagong bahandi dili mobuthog iya. Kinahanglan tang maningkamot aron makaplagan kana. Ingon usab niana ang kahibalo sa Diyos. Sa pagkatinuod, kini nga bahandi natago sa Bibliya. Aron makaplagan kini, kinahanglan sab tang maningkamot.
Gisaysay ni Solomon ang angay natong himoon aron makaplagan “ang mismong kahibalo sa Diyos.” Ang ekspresyong “dawaton mo ang akong mga pulong” ug “ikiling mo ang imong kasingkasing” nagpakita nga angayng magmadinawaton ang atong kasingkasing. (Bersikulo 1, 2) Ang mga pulong nga “magasangpit” ug “magapadayon sa pagpangita” nagpasabot nga kinahanglan tang maghago sa pagpangita niana. (Bersikulo 3, 4) Nan, aron makaplagan ang bahandi, angay tang magmakugihon sa pagtuon sa Bibliya uban ang tim-os nga kasingkasing.—Lucas 8:15.
Kon ato kanang buhaton, si Jehova motabang nato. Ang bersikulo 6 nag-ingon: “Si Jehova magahatag ug kaalam.” Pinaagi lamang sa tabang sa Diyos nga bug-os natong masabtan ang kamatuoran sa Bibliya. (Juan 6:44; Buhat 16:14) Ikaw makaseguro niini: Kon sinsero kang magsusi sa Pulong sa Diyos, imong makaplagan “ang mismong kahibalo sa Diyos”—usa ka bahandi nga makahatag nimog dagayang kaayohan.—Proverbio 2:10-21. *
Sugyot nga Pagbasa sa Bibliya sa Oktubre:
[Footnote]
^ par. 8 Ang mga Saksi ni Jehova sa tibuok kalibotan nagtanyag ug libreng pagtuon sa Bibliya niadtong buot makakat-on niana. Palihog kontaka ang mga Saksi sa inyong dapit o pagsulat sa nahiangayng adres sa panid 4.
