Masarakamto ti “Mismo a Pannakaammo iti Dios”
Umadanika iti Dios
Masarakamto ti “Mismo a Pannakaammo iti Dios”
INYURNOS ni Jehova a Dios a magun-odtayo ti maysa a nakapatpateg a gameng, ket kayatna a masarakantayo dayta. Daytoy a gameng saan a mangipaay iti material a kinabaknang, no di ket iti banag a di magatang ti amin a kuarta ditoy lubong—ti natalna a panunot, pannakapnek, ken naragsak a biag. Ania daytoy a gameng? Ilawlawag daytoy ti sasao ni masirib nga Ari Solomon a nailanad iti Proverbio 2:1-6.
Dinakamat ni Solomon daytoy a gameng kas ti “mismo a pannakaammo iti Dios”—ti kinapudno maipapan iti Dios ken dagiti panggepna a naipalgak iti Biblia. (Bersikulo 5) Adda sumagmamano a saklawen daytoy a gameng.
Pudno a sursuro. Sungbatan ti Biblia dagiti saludsod nga: Ania ti nagan ti Dios? (Salmo 83:18) Ania ti mapasamak no mataytayo? (Salmo 146:3, 4) Apay nga addatayo ditoy? (Genesis 1:26-28; Salmo 115:16) Nakapatpateg ti sungbat dagitoy a saludsod.
Nainsiriban a balakad. Ibaga kadatayo ti Biblia ti kasayaatan a wagas ti panagbiag. Kasano nga agpaut ti panagasawam? (Efeso 5:28, 29, 33) Kasano nga agbalin a manakem dagiti annak? (Deuteronomio 6:5-7; Efeso 6:4) Kasano a masarakam ti naragsak a biag? (Mateo 5:3; Lucas 11:28) Panagkunam napateg ngata ti mapagtalkan a balakad maipapan kadagitoy a banag?
Umiso a panangmatmat iti Dios ken iti personalidadna. Ti Biblia ti kangrunaan a gubuayan ti umiso nga impormasion maipapan iti Dios. Ania a kita ti persona? (Juan 1:18; 4:24) Maseknan kadi kadatayo? (1 Pedro 5:6, 7) Ania ti sumagmamano kadagiti nagsayaat a kababalinna? (Exodo 34:6, 7; 1 Juan 4:8) Panagkunam napateg ngata a maammuam ti umiso maipapan iti Namarsua?
“Ti mismo a pannakaammo iti Dios” ket talaga a naespirituan a gameng. Kasano a masarakam? Maammuam ti sungbat iti Proverbio kapitulo 2, bersikulo 4 ta inyarig ni Solomon daytoy a pannakaammo kadagiti “nalmeng a gameng.” Panunotem daytoy: Ti nalmeng a gameng saan nga agparang lattan kadatayo no di ket pagreggetantayo a biroken dayta. Ti pannakaammo iti Dios ket mayarig iti nalmeng a gameng a naikali iti Biblia. Masapul nga agreggettayo a mangbirok iti dayta.
Inlawlawag ni Solomon no kasano a mabirokantayo ti “mismo a pannakaammo iti Dios.” Ti sasao nga ‘awatem ti sasaok’ ken ‘pagannayasem ta pusom’ ipakitada a masapul nga ipapusotayo ti sasao ti Dios. (Bersikulo 1, 2) Ti sasao nga ‘agpukkaw,’ ‘itultuloymo a sapulen,’ ken ‘itultuloymo a biroken’ ipamatmatda a masapul nga agbannog ken sipipinget nga agreggettayo. (Bersikulo 3, 4) Tapno mabirokantayo dayta a gameng, masapul a sipapasnek ken naimpusuan nga adalentayo ti Biblia.—Lucas 8:15.
No kasta ti aramidentayo, sigurado a tulongannatayo ni Jehova. “Ni met laeng Jehova mangted iti sirib,” kuna ti bersikulo 6. Babaen laeng iti tulong ti Dios a naan-anay a matarusantayo dagiti kinapudno iti Biblia. (Juan 6:44; Aramid 16:14) Masiguradom a no naimpusuan a sukimatem ti Sao ti Dios, masarakamto ti “mismo a pannakaammo iti Dios”—ti gameng a naan-anay a mangpabaknang iti biagmo.—Proverbio 2:10-21. a
Singasing a Basaen iti Biblia iti Oktubre:
[Footnote]
a Iyaw-awis dagiti Saksi ni Jehova iti intero a lubong ti libre a panagadal iti Biblia kadagiti mayat a mangtarus iti dayta. Birokem ida iti lugaryo wenno agsuratka iti mayanatup nga adres iti panid 4.
