Si Kẹle Ọghẹnẹ

Whọ rẹ Sai Duku “Eriariẹ Ọghẹnẹ”

JIHOVA ỌGHẸNẸ o rovie uvẹ efe ologbo jọ họ kẹ omai, yọ ọ gwọlọ nọ ma woi t’obọ. Efe nana orọnikọ ọrọ ekwakwa iwo ho, rekọ o rẹ kẹ oware jọ nọ a rẹ sae rọ igho akpọ na kpobi dẹ hẹ—ududhomẹ, edẹro, gbe uzuazọ evevọwẹ. Didi efe na? Eme ọ ovie owareghẹ na Solomọn nọ e rrọ obe Itẹ 2:1-6 i dhesẹ oware nọ efe nana ọ rrọ.

Solomọn ọ ta nọ efe nana họ “eriariẹ Ọghẹnẹ”—koyehọ uzẹme kpahe Ọghẹnẹ gbe ẹjiroro riẹ wọhọ epanọ o rrọ Ebaibol na. (Owọ avọ 5) Efe nana o wo abọ buobu.

Iwuhrẹ uzẹme. Ebaibol na ọ kẹ iyo enọ wọhọ: Diodẹ Ọghẹnẹ? (Olezi 83:18) Eme ọ rẹ via kẹ ohwo nọ o whu no? (Olezi 146:3, 4) Fikieme ma jẹ rrọ uzuazọ? (Emuhọ 1:26-28; Olezi 115:16) Evaọ uzẹme, kọ who roro nọ u wo unuigho jọ nọ o rẹ sai te rọ dẹ iyo enọ nana nọ i wuzou gaga na?

Ohrẹ areghẹ. Ebaibol na ọ vuẹ omai edhere uzuazọ uyero nọ o mai woma kpaobọ. Ẹvẹ whọ sai ro ru orọo tọ? (Ahwo Ẹfẹsọs 5:28, 29, 33) Ẹvẹ whọ sae rọ yọrọ emọ nọ a jẹ jọ uvi ahwo? (Iziewariẹ 6:5-7; Ahwo Ẹfẹsọs 6:4) Ẹvẹ whọ sai ro wo evawere evaọ uzuazọ? (Matiu 5:3; Luk 11:28) Ẹvẹ who roro, eme whọ sae rọ wawo aghare ọrọ uvi ohrẹ kpahe enọ yena?

Otoriẹ kpahe Ọghẹnẹ gbe ekwakwa-aghae riẹ. Ebaibol na họ ugogo obe nọ ma rẹ jọ ruẹ evuẹ uzẹme kpahe Ọghẹnẹ. Ẹvẹ Ọghẹnẹ ọ rrọ? (Jọn 1:18; 4:24) Kọ ọ bẹ daezọ mai? (1 Pita 5:6, 7) Ekwakwa-aghae riẹ jọ vẹ họ enọ e mae viodẹ? (Ọnyano 34:6, 7; 1 Jọn 4:8) Brigho who roro nọ a rẹ sae hwa fihọ evuẹ uzẹme kpahe Ọnọ ọ ma eware kpobi na?

Avro ọ riẹ hẹ, “eriariẹ Ọghẹnẹ” ginọ efe abọ-ẹzi. Ẹvẹ whọ sai ro duku ei? Ma rẹ jọ owọ avọ 4 evaọ uzou avọ 2 orọ obe Itẹ ruẹ edhere jọ nọ a sai ro duku ei, Solomọn ọ jọ etẹe rọ eriariẹ nana dhesẹ “efe nọ a sino.” Roro kpahe onana: Efe nọ a sino ọ rẹ la no oria nọ ọ rrọ ze fihọ obọ ohwo nọ ọ rọ abọ muoma ha. O gwọlọ iruo mi omai re ma sae gwọlọ iẹe via. Ere o rrọ kpahe eriariẹ Ọghẹnẹ. Otọ ẹme na họ, a si efe nana no họ Ebaibol na. Re ma sai duku ei, o gwọlọ omodawọ mi omai.

Solomọn ọ ta oware nọ o gwọlọ nọ ma re ru re ma sai duku “eriariẹ Ọghẹnẹ.” Eme na “rehọ eme mẹ” gbe “rovie udu ra” i dhesẹ nọ ma re wo udu nọ o rẹ jẹ ẹme Ọghẹnẹ rehọ. (Owọ 1, 2) Eme na “bo kẹ” gbe “gwọlọ iẹe” i dhesẹ nọ o gwọlọ omodawọ ogaga nọ ma rẹ rọ gwọlọ eriariẹ na. (Owọ avọ 3, 4) Onana u dhesẹ nọ re ma sae gwọlọ efe na t’obọ, ma rẹ roma totọ se je roro kpahe Ebaibol na, avọ udu oruọzewọ.—Luk 8:15.

Nọ ma tẹ jowọ utioye, Jihova o ti fi obọ họ kẹ omai duku efe na. Owọ avọ 6 o ta nọ “ỌNOWO na ọ rẹ kẹ areghẹ.” Avọ obufihọ Ọghẹnẹ ọvo ma sai ro wo otoriẹ uzẹme nọ o rrọ Ebaibol na vọvọ. (Jọn 6:44; Iruẹru Ikọ Na 16:14) O rẹ sai mu owhẹ ẹro inọ: Whọ tẹ rọ udu oruọzewọ kiẹ Ẹme Ọghẹnẹ, who re ti duku “eriariẹ Ọghẹnẹ”—efe nọ ọ te kẹ owhẹ erere nọ o wo ibe he.—Itẹ 2:10-21. *

[Oruvẹ-obotọ]