Olenda Solola ‘Zayi wa Nzambi’
Finama Nzambi
Olenda Solola ‘Zayi wa Nzambi’
YAVE WA NZAMBI watuvana lusalu lwantalu ye ozolele vo twasolola lo. Lusalu lwalu ke lutwasanga mavwa ko, kansi lutwasanga luvuvamu ye kiese kina ke tulendi sumba mu nzimbu ko. Nkia lusalu lwalu? E mvovo mia Solomo wa Ntinu angangu muna Ngana 2:1-6 mivananga e mvutu.
Solomo wayikila lusalu lwalu vo ‘zayi wa Nzambi,’ i sia vo, ludi mu kuma kia Nzambi ye makani mandi masonama muna Nkand’a Nzambi. (Tini kia 5) Mambu mayingi meyikwanga muna lusalu lwalu.
Malongi makieleka. O Nkand’a Nzambi uvananga e mvutu muna yuvu nze yayi: Nkumbu a Nzambi nani? (Nkunga 83:18) Adieyi dikutubwilanga vava tufwanga? (Nkunga 146:3, 4) Ekuma twinina ova nza? (Etuku 1:26-28; Nkunga 115:16) Ntalu kwa olenda futa muna vwa e mvutu za yuvu yayi yamfunu?
Tuludiku twangangu. Nkand’a Nzambi ukutusonganga e mpila yambote tulenda natina e zingu kieto. Adieyi olenda vanga kimana longo lwaku lwazinga mvu miayingi? (Efeso 5:28, 29, 33) Aweyi olenda sansila wana angangu? (Nsiku 6:5-7; Efeso 6:4) Aweyi olenda kadila ye zingu kiakiese? (Matai 5:3; Luka 11:28) Adieyi obenze, nga tuludiku twatu ke tuna mfunu ko e?
Zaya Nzambi ye fu yandi. O Nkand’a Nzambi i nkanda wantete ukutuzayisanga ludi mu kuma kia Nzambi. Aweyi kena? (Yoane 1:18; 4:24) Nga okutuvwanga kikilu o mfunu e? (1 Petelo 5:6, 7) Ayeyi i fu yandi isundidi? (Luvaiku 34:6, 7; 1 Yoane 4:8) Adieyi obenze, o zaya mambu mama mu kuma kia Mvangi eto, nga ke dina mfunu ko?
‘O zayi wa Nzambi’ i lusalu lwantalu lwa mwanda. Aweyi olenda lo sololwela? Tulenda vwa e mvutu muna Ngana kapu kia 2 tini kia 4, muna Solomo katezanesena o zayi wau ye “lusalu lwaswekama.” Badika diambu edi: O lusalu lwaswekama ke lulendi kwiza lwau mosi ko kwa muntu. Diambu tufwete vanga muna lo solola. Diau adimosi mpe tufwete vanga muna solola zayi wa Nzambi. O zayi wau muna Nkand’a Nzambi wina. Muna wo solola tufwete sia ngolo.
Solomo wasasila dina tufwete vanga muna solola o ‘zayi wa Nzambi.’ E mvovo ‘tambula mvovo miame’ yo ‘tamb’o matu’ misonganga vo tufwete tambulwilanga malongi ma Yave. (Tini kia 1, 2) E mvovo ‘bokela,’ ‘vava’ ye ‘satulula’ misonganga vo yeto kibeni diambu tufwete vanga. (Tini kia 3, 4) Muna kuma kiaki, muna solola lusalu lwalu tufwete kala ye fu kia longoka Nkand’a Nzambi ye ntim’asikila.— Luka 8:15.
Avo tuvangidi ngolo, Yave okutusadisa mu solola o zayi. E tini kia 6 kivovanga vo: “Yave ovananga ngangu.” Muna lusadisu lwa Nzambi kaka tulenda bakulwila e ludi kia Nkand’a Nzambi. (Yoane 6:44; Mavangu 16:14) Kala ye ziku vo, avo satulwidi muna Diambu dia Nzambi, osolola ‘zayi wa Nzambi’ una vo i lusalu lwantalu lulenda tomesa e zingu kiaku.—Ngana 2:10-21. *
[Mvovo Vana Yand’a lukaya]
^ tini. 10 Mbangi za Yave mu nza yawonso belongokanga Nkand’a Nzambi mu ngovo y’awana bazolele zaya oma ma Nkand’a Nzambi. Ekuma olembi mokenena ye Mbangi za Yave muna zunga kiaku yovo soneka muna fulu yiyikilu muna lukaya lwa 4 lwa Eyingidilu diadi?
