Mu Sutelele Ku Mulimu

Mwa Kona ku “Ziba za Mulimu”

JEHOVA MULIMU u boni teñi kuli lwa fumana sifumu sa butokwa hahulu mi u bata kuli lu si fumane sifumu seo. Sifumu seo ha si tahisi maluwo a kwa mubili, kono si tahisa kozo, ku kolwa ka za na ni zona mutu, ni ku pila bupilo bo bunde ili lika ze sa koni ku lekiwa ka masheleñi. Ki sifumu sa mufuta mañi se si taluswa fa? Kalabo i fumaneha kwa manzwi a Mulena ya butali Salumoni a kwa Liproverbia 2:1-6.

Salumoni u talusa kuli sifumu seo ki ku “fumana ku ziba za Mulimu” ili ku talusa niti ka za Mulimu ni milelo ya hae ka mo i patululezwi mwa Bibele. (Timana 5) Sifumu seo, si kopanyeleza likalulo li sikai.

Lituto za niti. Bibele i alaba lipuzo ze swana sina ze: Libizo la Mulimu ki lifi? (Samu 83:18) Kiñi ze ezahalanga mutu ha shwa? (Samu 146:3, 4) Lu pilelañi? (Genese 1:26-28; Samu 115:16) Kaniti, likalabo kwa lipuzo zeo ki za butokwa luli, mi ha li konwi ku lekwa ka masheleñi.

Kelezo ye butali. Bibele i lu taluseza nzila ye nde ya ku pila ka yona bupilo. Mu kona ku ezañi kuli linyalo la mina li inelele? (Maefese 5:28, 29, 33) Mu kona ku hulisa cwañi bana ba ba itingwa? (Deuteronoma 6:5-7; Maefese 6:4) Mu kona ku fumana cwañi tabo mwa bupilo? (Mateu 5:3; Luka 11:28) Kaniti kelezo ye itingwa yeo ki ya butokwa luli, mi ha i konwi ku lekwa ka masheleñi.

Ku utwisisa butu bwa Mulimu. Bibele ki yona feela ye lu taluseza litaba ze nepahezi ka za Mulimu. Mulimu u cwañi? (Joani 1:18; 4:24) Kana wa lu tokomela? (1 Pitrosi 5:6, 7) Ki tufi to tuñwi kwa tulemeno twa hae to tu zwile mubano? (Exoda 34:6, 7; 1 Joani 4:8) Kaniti, litaba za niti ka za Mubupi wa luna ya pahami ki za butokwa luli, mi ha li konwi ku lekwa ka masheleñi.

“Ku ziba za Mulimu” ki sifumu sa butokwa hahulu luli. Mu kona ku fumana cwañi sifumu seo? Kalabo i fumaneha kwa Liproverbia kauhanyo 2 timana 4, ili ko Salumoni u bapanya zibo yeo ni “maluo a patilwe mwa mubu.” Kuli mu fumane maluo ao a patilwe mwa mubu, mu tokwa ku sebeza ka taata. Ki nto ye swana ni ku fumana zibo ya Mulimu. Mu tokwa ku batisisa mwa Bibele kuli mu kone ku ziba za Mulimu. Mu tokwa ku eza buikatazo bo butuna kuli mu zibe za Mulimu.

Salumoni u talusa ze lu tokwa ku eza kuli lu fumane ku “ziba za Mulimu.” Lipulelo za kuli “amuhela manzwi a ka” ni ya kuli “buluka milao ya ka ku wena” li bonisa kuli lu swanela ku tabela ku ituta za Mulimu. (Litimana 1, 2) Manzwi a kuli ha u ka “lilela,” “wa i bata,” ni wa “i pumbula” a bonisa kuli lu tokwa ku sebeza ka taata luli ili ku itusisa buikoneli bwa luna kuli lu zibe za Mulimu. (Litimana 3, 4) Kuli lu fumane maluo ao, lu tokwa ku ba baituti ba Bibele ba bande ili ku eza cwalo ka pilu ya luna kaufela.—Luka 8:15.

Haiba lu eza cwalo, Jehova u ka lu tusa ku fumana maluo ao a ku ziba za Mulimu. Timana 6 i bulela kuli, “Muñaa Bupilo ki Yena ya fana butali.” Ki Mulimu feela ya kona ku lu tusa ku utwisisa niti ye fumaneha mwa Bibele. (Joani 6:44; Likezo 16:14) Mwa kona ku kolwa kuli, haiba mu batisisa mwa Linzwi la Mulimu, mu ka fumana ku “ziba za Mulimu” ili sifumu se si ka mi tusa ku pila bupilo bo bunde ka ku fitisisa.—Liproverbia 2:10-21. *

[Litaluso za kwatasi]