Semena pabuipi ne Nzambi

Udi mua kupeta “dimanya dia malu a Nzambi”

YEHOWA NZAMBI mmutupeshe mushindu wa kupeta tshiuma tshia mushinga mukole ne mmusue bua tutshipete. Tshiuma etshi katshiena tshitupetesha bintu bia ku mubidi to, kadi netshitupeshe bintu bidi mabanji a pa buloba kaayi mua kusumba, mbuena kuamba ne: ditalala ne disanka mu nsombelu. Ntshiuma kayi atshi? Mêyi avua Solomo mufunde mu Nsumuinu 2:1-6 adi umvuija tshiuma etshi.

Solomo udi uleja ne: tshiuma etshi ‘ndimanya dia malu a Nzambi’ mbuena kuamba ne: bulelela budi butangila Nzambi ne dilongolola diende anu mudibi bileja mu Bible. (Mvese 5) Tshiuma etshi tshidi ne malu a bungi.

Malongesha malelela. Bible udi wandamuna nkonko bu mudi: Dîna dia Nzambi nnganyi? (Musambu 83:18) Patu muntu ufua utu uya kuepi? (Musambu 146:3, 4) Bua tshinyi tudi ne muoyo? (Genese 1:26-28; Musambu 115:16) Bushuwa, mandamuna a nkonko eyi adi ne mushinga wa bungi, ki mmuomu anyi?

Mibelu ya meji. Bible udi utuleja nsombelu muimpe utudi bua kuikala nende. Tshia kuenza ntshinyi bua dibaka kunengadi? (Efeso 5:28, 29, 33) Mmunyi muudi mua kukolesha bana bebe bimpe? (Dutelonome 6:5-7; Efeso 6:4) Mmunyi muudi mua kupeta disanka? (Matayo 5:3; Luka 11:28) Kuenaku umone kabidi ne: mandamuna a nkonko eyi adi ne mushinga wa bungi anyi?

Keba mua kumanya Nzambi bimpe. Bible ke mukanda munene udi utuambila malu malelela a Nzambi. Nzambi utu mushindu kayi? (Yone 1:18; 4:24) Utuku ututabalela anyi? (1 Petelo 5:6, 7) Nngikadilu kayi mitambe bunene idiye nayi? (Ekesode 34:6, 7; 1 Yone 4:8) Udi mua kuamba tshinyi bua mushinga udi nawu malongesha malelela adi atangila Mufuki wetu aa?

“Dimanya dia malu a Nzambi” didi bushuwa tshiuma tshia mushinga mukole. Mmunyi muudi mua kutshipeta? Diandamuna didi mu mukanda wa Nsumuinu nshapita 2 mvese 4 mudi Solomo ufuanyikija dimanya edi ne “biuma bisokoka.” Anji elabi meji: Biuma bisokoka bidi mua kudipatukila muaba udibi katuyi babikuatshile mudimu anyi? Tudi ne bua kuenza mudimu mukole bua kubipeta. Ke mudibi kabidi bua dimanya dia malu a Nzambi. Dimanya edi ndisokoka mu Bible. Bua tuetu kudipeta, tudi ne bua kuditatshisha bikole.

Solomo udi umvuija tshitudi mua kuenza bua kupeta “dimanya dia malu a Nzambi.” Mêyi a ne: ‘Biwitabuja mêyi anyi’ ne “kufila mutshima webe,” adi aleja ne: tudi ne bua kulongolola mutshima wetu. (Mvese 1, 2) Mêyi makuabu a ne: “Biwadidila,” ne “biwakukeba” adi aleja ne: tudi ne bua kudifila bikole ne muoyo mujima. (Mvese 3, 4) Bua kupeta tshiuma etshi, tudi ne bua kulonga Bible ne muoyo umue ne dijinga dia kutumikila tshidiye wamba.​—Luka 8:15.

Tuetu benze nunku, Yehowa neatuambuluishe bua kupeta tshiuma etshi. Mvese 6 udi wamba ne: ‘Yehowa udi upa bantu meji.’ Nzambi yeye mutuambuluishe, netumvue bimpe bulelela budi mu Bible. (Yone 6:44; Bienzedi 16:14) Nanku, ikala mujadike ne: wewe ukeba ne muoyo mujima mu Dîyi dia Nzambi, udi mua kupeta “dimanya dia malu a Nzambi,” mbuena kuamba ne: tshiuma tshidi mua kukupesha masanka bungi kabuyi kuamba.​—Nsumuinu 2:10-21. *

[Mêyi adi kuinshi]