Sud Machiegni gi Nyasaye

Inyalo Yudo “Rieko Ming’eyogo Nyasaye”

JEHOVA NYASAYE oketo e nyimwa mwandu moro ma neng’one duong’ ahinya, kendo chunye gombo gadier ni wayud mwanduno. Mwanduno ok kel mewo mar gik ringruok, to okelo gima pesa duto manie piny ok nyal nyiewo—kuwe mar chuny, bedo ng’at ma gigene orome, koda ngima mamor. Mwanduni en ang’o? Weche mondik e bug Ngeche 2:1-6 mag Ruoth Suleman jal mariek, lero gima mwanduno en.

Suleman lero ni mwanduno en “rieko ming’eyogo Nyasaye”—ma en adiera e wi Nyasaye koda dwaro mage moler ei Muma. (Kwan matindo 5) Mwanduni oting’o weche mang’eny mopogore opogore.

Puonj madier. Muma dwoko penjo kaka magi: Nying Nyasaye en ng’a? (Zaburi 83:18) Ang’o matimore ka ng’ato otho? (Zaburi 146:3, 4) Ang’o momiyo Nyasaye nochweyowa? (Chakruok 1:26-28; Zaburi 115:16) Donge ng’eyo dwoko mag penjogi en gima dwarore ahinya?

Puonj makelo rieko. Muma nyisowa yo maber moloyo mar dak. Ang’o minyalo timo mondo kend mari osiki? (Jo Efeso 5:28, 29, 33) Inyalo timo nade mondo nyithindi odong ka ging’eyo kawo ting’? (Rapar mar Chik 6:5-7; Jo Efeso 6:4) Ere kaka inyalo yudo mor e ngima? (Mathayo 5:3; Luka 11:28) Ineno nade—donge yudo puonj minyalo geno kuom wechegi nyalo konyi kama duong’?

Ng’eyo matut chal mar Nyasaye koda kite. Muma e kama wayudoe weche madier e wi Nyasaye moloyo kamoro amora. Nyasaye chalo nade? (Johana 1:18; 4:24) Be odewowa? (1 Petro 5:6, 7) Moko kuom kido mage makende gin mage? (Wuok 34:6, 7; 1 Johana 4:8) Dabed ni pesa ema ikwayo, weche madier e wi Jachwechwa inyalo nyiew gi pesa maromo nade?

“Rieko ming’eyogo Nyasaye” en mwandu maduong’ gadier. Inyalo timo nang’o mondo iyude? Wach manyalo konyi yudore e Ngeche sula mar 2 kwan matindo 4, kama Suleman pimoe ng’eyoni gi “mwandu mopand.” Par ane wachni: Mwandu mopand ok bi kende, nyaka ng’ato owuon oti matek. Nyaka watim kinda mondo wayude. Kamano bende e kaka onego watim mondo wayud rieko mar Nyasaye. E yor ranyisi, riekoni opand ei Muma. Mondo wayude, dwarore ni waket kinda.

Suleman leronwa gima onego watim mondo wayud “rieko ming’eyogo Nyasaye.” Weche kaka “diwinj wechena” koda “ket chunyi” nyiso ni onego wabed gi chuny marwako puonj. (Kwan matindo 1, 2) Weche kaka “ka diyuagi,” “kidwaro,” koda “kimanye” nyiso ni onego watim kinda ahinya wan wawegi. (Kwan matindo 3, 4) Omiyo, mondo wayud mwanduno dwarore ni wapuonjre Muma adimba, kendo watim kamano gi chuny maler.—Luka 8:15.

Ka watimo kinda ma kamano, Jehova biro konyowa yudo mwanduno. Kwan matindo 6 wacho ni, “Jehova ochiwo rieko.” Nyasaye kende ema nyalo konyowa ng’eyo chuth adiera mayudore ei Muma. (Johana 6:44; Tich Joote 16:14) Inyalo bedo gadier kuom wachni: Ka ipuonjori Wach Nyasaye gi chuny maler, ibiro yudo “rieko ming’eyogo Nyasaye”—mwandu mabiro konyo ngimani chuth.—Ngeche 2:10-21. *

[Weche Moler Piny]