Tjhidela KuZimu

Ungafumana “Ilwazi NgoZimu”

UJEHOVA UZIMU wenze kwakghoneka ngathi ukufumana umnotho ongekhe sakwazi ukuwuthenga, begodu ufuna bona siwufumane. Umnotho lo awulethi ukunjinga ngezinto eziphathekako, kodwana uzokufumana into iphasi engekhe likwazi ukuyithenga ngemali—ukuthula kwangaphakathi, ukwaneliseka nokuphila okwanelisako. Uyini umnotho lo? Amezwi weKosi ehlakaniphileko uSolomoni atlolwe kuZiyema 2:1-6 ayahlathulula.

USolomoni uhlathulula umnotho lo bona ‘lilwazi ngoZimu’—okutjho iqiniso ngoZimu nangeemnqophwakhe njengombana ivezwe eBhayibhilini. (iVesi 5) Kuneengcenye ezimbalwa zomnotho lo.

Iimfundiso zeqiniso. IBhayibhili iphendula iimbuzo enjengale: Ngubani ibizo lakaZimu? (IRhalani 83:18) Kwenzekani ekufeni? (IRhalani 146:3, 4) Kubayini silapha? (Genesisi 1:26-28; IRhalani 115:16) Ungazibiza malini iimpendulo zeembuzo eqakatheke kangaka?

Isiluleko esihlakaniphileko. IBhayibhili isitjela ngendlela yokuphila engcono khulu. Ungawenza njani umtjhado uhlale ngokungapheliko? (Kwebe-Efesu 5:28, 29, 33) Ungabakhulisa njani abantwana abavuthiweko? (Duteronomi 6:5-7; Kwebe-Efesu 6:4) Ungalifumana njani ithabo ekuphileni? (Matewu 5:3; Luka 11:28) Ucabangani godu—siqakatheke kangangani isiluleko esingathenjwa eendabeni ezinjengalezi?

Ilwazi ngeemfanelo zakaZimu nobuntu bakhe. IBhayibhili imthombo omkhulu welwazi elinembileko ngoZimu. Unjani? (Jwanisi 1:18; 4:24) Unendaba nathi? (1 KaPitrosi 5:6, 7) Ngiziphi ezinye iimfanelo zakhe eziveleleko? (Eksodosi 34:6, 7; 1 KaJwanisi 4:8) Ungathi ilwazi leqiniso ngoMbumbi wethu libiza malini?

“Ilwazi ngoZimu” kwamambala limnotho ongokomoya. Ungalifumana njani? Umtlhala usevesini 4 leZiyema isahluko 2, lapho uSolomoni amadanisa khona ilwazeli ‘nomnotho ofihliweko.’ Cabanga ngalokhu: Umnotho ofihliweko angekhe weqe lapho ufihlwe khona bese uzibeka ezandleni ezingenzi litho. Kufuze senze umzamo wokuwufumana. Kunjalo nangelwazi ngoZimu. Eqinisweni, ilwazeli lifihlwe eBhayibhilini. Bona silifumane kufuze senze umzamo.

USolomoni wahlathulula bona kufuze senzeni ukufumana “ilwazi ngoZimu.” Amezwi athi, “Newumukela amezwami,” “unamathelisa ihliziywakho” atjengisa bona sitlhoga ihliziyo eyamukelako. (iVesi 1, 2) Amezwi athi, “Uyarhuwelela,” “uragela phambili uzuma,” nathi “uragela phambili ukufuna” atjho bona kufuze sisebenze budisi nangamandla sitjengisa umzamo. (iVesi 3, 4) Bona sifumane umnotho lo, kufuze sikhuthalele ukufunda iBhayibhili, senze njalo ngehliziyo ethembekileko.—Luka 8:15.

Nengabe sitjengisa ukukhuthala okunjalo, uJehova uzosisiza bona sifumane umnotho lo. “UJehova ngokwakhe upha ukuhlakanipha,” kutjho ivesi 6. Kungesizo lakaZimu kwaphela bona sikwazi ukuzwisisa iqiniso leBhayibhili ngokuzeleko. (Jwanisi 6:44; IZenzo 16:14) Naku ongaqiniseka ngakho: Nengabe uphendlisisa iLizwi lakaZimu ngokuthembeka, uzokufumana “ilwazi ngoZimu”—umnotho ozokwenza uthabele ukuphila ngendlela enganakumadaniswa.—Iziyema 2:10-21. *

[Umtlolo waphasi]