O ka Hwetša “Tsebo ka ga Modimo”
Batamela Kgauswi le Modimo
O ka Hwetša “Tsebo ka ga Modimo”
JEHOFA MODIMO o dirile gore re kgone go hwetša letlotlo le bohlokwahlokwa, gomme o rata gore re le hwetše. Letlotlo le ga le tliše lehumo la dilo tše di bonagalago, eupša le tla feleletša ka selo se sengwe seo tšhelete ka moka ya mo lefaseng e ka se kgonego go se reka—khutšo ya ka gare, kgotsofalo le bophelo bjo bo thabišago. Letlotlo le ke’ng? Mantšu a Kgoši Solomone yo bohlale ao a ngwadilwego go Diema 2:1-6 a a le hlalosa.
Solomone o re letlotlo le ke “tsebo ka ga Modimo”—ke gore, therešo mabapi le Modimo le merero ya gagwe yeo e utolotšwego ka Beibeleng. (Temana 5) Letlotlo le le na le dikarolo tše mmalwa.
Dithuto tša therešo. Beibele e araba dipotšišo tše di swanago le tše: Leina la Modimo ke mang? (Psalme 83:18) Go direga’ng lehung? (Psalme 146:3, 4) Ke ka baka la’ng re le mo? (Genesi 1:26-28; Psalme 115:16) Ge e le gabotse, o be o ka lefiša bokae bakeng sa dikarabo tša dipotšišo tšeo tše bohlokwa?
Keletšo e bohlale. Beibele e re botša ka tsela e di phalago tšohle ya go phela. O ka dira bjang gore lenyalo e be leo le swarelelago? (Baefeso 5:28, 29, 33) O ka godiša bjang bana bao ba nago le boikarabelo? (Doiteronomio 6:5-7; Baefeso 6:4) O ka hwetša bjang lethabo bophelong? (Mateo 5:3; Luka 11:28) Le gona, o nagana’ng ka se—keletšo e ka botwago mabapi le ditaba tšeo e ka ba bokae?
Temogo ka seo Modimo a lego sona gotee le semelo sa gagwe. Beibele ke mothopo o mogolo wa tsebišo e nepagetšego ka Modimo. Ke motho wa mohuta mang? (Johane 1:18; 4:24) Na o na le taba le rena? (1 Petro 5:6, 7) Tše dingwe tša dika tša gagwe tše dikgolo ke dife? (Ekisodo 34:6, 7; 1 Johane 4:8) O be o ka re tsebišo ya therešo mabapi le Mmopi e bitša bokae?
“Tsebo ka ga Modimo” e tloga e le letlotlo la moya. O ka le hwetša bjang? Temana 4 ya Diema kgaolo 2 e re thuša go hwetša karabo, e lego moo Solomone a bapišago tsebo ye le “matlotlo a utilwego.” Nagana ka se: Letlotlo leo le utilwego le ka se fo tšwa moo le utilwego gona gomme la itsenya ka diatleng tša motho yo a sa dirego selo. Re swanetše go dira boiteko bja go le hwetša. Le hwetšwa ka tsebo ka ga Modimo. Ge e le gabotse, letlotlo le le utilwe ka Beibeleng. Re swanetše go dira boiteko e le gore re le hwetše.
Solomone o hlalosa seo re swanetšego go se dira gore re hwetše “tsebo ka ga Modimo.” Mantšu a rego “amogela mantšu a ka” le “pelo ya gago e rate” a bontšha gore re swanetše go ba le pelo e amogelago. (Ditemana 1, 2) Mantšu a rego “goeletša” le “tsoma” a bontšha gore re swanetše go dira maiteko gomme re bontšhe e le ka kgonthe gore re tšea mogato. (Ditemana 3, 4) Ka gona, gore re hwetše letlotlo leo, re swanetše go ithuta Beibele ka mafolofolo gomme re dire bjalo ka pelo ka moka.—Luka 8:15.
Ge e ba re bontšha go tšea mogato moo, Jehofa o tla re thuša go hwetša letlotlo leo. Temana 6 e re: “Jehofa o nea bohlale.” Ke feela ka thušo ya Modimo moo re ka kgonago go kwešiša ka botlalo ditherešo tšeo di lego ka Beibeleng. (Johane 6:44; Ditiro 16:14) O ka kgonthišega ka se: Ge e ba o tloga o tsoma ka Lentšung la Modimo, o tla hwetša “tsebo ka ga Modimo”—e lego letlotlo leo le tlago go humiša bophelo bja gago ka tsela e sa lekanywego.—Diema 2:10-21. *
Mmalo wa Beibele o šišintšwego bakeng sa October:
[Mongwalo wa tlase]
^ ser. 10 Dihlatse tša Jehofa lefaseng ka bophara di swara dithuto tše di sa lefelelwego tša legae tša Beibele le bao ba nyakago go kwešiša Beibele. Ke ka baka la’ng o sa ikgokaganye le tšona lefelong la geno goba o ngwalele atereseng e swanetšego yeo e lokeleditšwego go letlakala 4?
