Ga nduru na Nzapa

Mo lingbi ti wara “lege ti hinga Nzapa”

JÉHOVAH NZAPA azia mbeni mosoro so zo alingbi ti fa ngere ni pëpe na mbeni ndo so e lingbi ti wara ni, na lo ye si e wara ni. Mosoro ni so ayeke sara si e wara gbâ ti akungba pëpe, me a yeke ga na e mbeni ye so anginza kue ti ndo ti dunia so alingbi ti vo ni pëpe so ti tene siriri ti bê, dutingo na ngia na yâ ti ye so e yeke na ni nga na mbeni fini so amû ngia na e. Mosoro ni so ayeke nyen? Atënë ti Gbia Salomon so ayeke na ndara mingi so lo sû na aProverbe 2:1-6 afa ni.

Na versê 5, Salomon afa so mosoro so ayeke “lege ti hinga Nzapa” so ti tene, tâ tënë na ndo ti Nzapa nga na aye so lo ye ti sara so a sara tënë ni na yâ ti Bible. Ambage ti mosoro ni so ayeke mingi.

Tâ fango ye. Bible amû kiringo tënë na mara ti ahundango ndo tongana ati so: Iri ti Nzapa ayeke nyen? (Psaume 83:19; Genèse 22:14). Nyen la ayeke si na zo tongana lo kui? (Psaume 146:3, 4). Ngbanga ti nyen e yeke na ndo ti sese? (Genèse 1:26-28; Psaume 115:16). Biani, akiringo tënë na ahundango ndo so ayeke ye so ngere ni ayeke kota mingi.

Anzoni wango. Kode ti dutingo na fini so Bible ayeke fa na e la ayeke nzoni ni. Mo lingbi ti sara tongana nyen ti tene mariage ti mo aninga? (aÉphésien 5:28, 29, 33). Tongana nyen ti bata amolenge si ala ga anzoni kota zo ande? (Deutéronome 6:5-7; aÉphésien 6:4). Tongana nyen ti wara ngia na yâ ti fini ti mo? (Matthieu 5:3; Luc 11:28). Ge nga kue, mo pensé so awango ti ndara na akiringo tënë na mara ti ahundango ndo tongaso so zo alingbi ti zia bê ti lo dä, ngere ni ayeke kota mingi pëpe?

A zi lê ti e na ndo ti Nzapa nga na asarango ye ti tere ti lo. Bible ayeke kozo ye so ayeke mû na e tâ sango na ndo ti Nzapa. Lo yeke tongana nyen? (Jean 1:18; 4:24). Lo yeke bi bê ti lo na e la? (1 Pierre 5:6, 7). Ambeni pendere sarango ye ti tere ti lo ayeke so wa? (Exode 34:6, 7; 1 Jean 4:8). Mo pensé, ti wara atâ tënë so na ndo ti Wasarango e, ngere ni ayeke oke?

Biani, “lege ti hinga Nzapa” ayeke mosoro na lege ti yingo. Mo lingbi ti wara ni tongana nyen? Mbeni lege ti wara ni ayeke na versê 4 ti aProverbe chapitre 2. Na yâ ni, Salomon ahaka hingango ye na “mosoro so ahonde”. Gbu li ti mo si: Mbeni mosoro so ahonde alingbi ti sigigi na bê ti lo wani pëpe. A lingbi e sara kua ngangu si e wara ni. A yeke legeoko tongaso na ti hingango ye na ndo ti Nzapa. Tongaso, ti wara hingango ye na ndo ti Nzapa a lingbi zo agi ni na yâ ti Bible. Ti wara ni, a lingbi e sara ngangu.

Salomon afa ye so a lingbi e sara ti wara “lege ti hinga Nzapa.” Na versê 1, 2 tënë, “mo mä tënë ti mbi” na “mo zia bê ti mo na” afa so a lingbi e duti azo ti mango tënë. Na versê 3, 4 tënë, “gi” so asigigi fani ota na yâ ni aye ti fa so a lingbi e wani e mû ngoi ti e, e mû li ni kozo ti sara ye. Tongaso, ti wara mosoro ni, a lingbi e manda Bible ngangu, e sara ni na bê ti e kue.​—Luc 8:15.

Tongana e mû li ni kozo ti sara tongaso, Jéhovah ayeke mû maboko na e ti wara mosoro so. Versê 6 ni atene, “L’Éternel amû ndara”. A yeke gi na ngangu ti Nzapa la e lingbi ti gbu nda ti atâ tënë ti Bible kue (Jean 6:44; Kusala 16:14). Kite ayeke pëpe so tongana na bê ti mo kue mo gi na yâ ti Mbeti ti Nzapa, mo lingbi ti wara “lege ti hinga Nzapa”, so ti tene mbeni mosoro so asara si fini ti mo asi singo na aye ti nzoni.​—aProverbe 2:10-21. *

[Kete tënë na gbe ni]