Ia Mafuta Atu i le Atua

E Mafai Ona E Maua “le Poto i le Atua”

UA TUUINA mai e Ieova le Atua se oloa tāua, ma e finagalo o ia ina ia tatou maua. E lē aumaia e lenei oloa tāua ʻoa faaletino, ae e mafai ona maua ai le filemu o le loto, le lotomalie, ma se olaga faamalieina, lea e lē mafai e tupe uma i le lalolagi ona faatau. O le ā lenei oloa tāua? O loo faamatala mai e upu a le tupu poto o Solomona i le Faataoto 2:1-6.

Ua faailoa mai e Solomona o lenei oloa tāua, o “le poto i le Atua,”—o lona uiga, o le upu moni e uiga i le Atua ma ana fuafuaga, e pei ona faailoa mai i le Tusi Paia. (Fuaiupu e 5) E tele ni vaega o lenei oloa tāua.

Aʻoaʻoga moni. O nisi nei o fesili e taliina i le Tusi Paia: O ai le suafa o le Atua? (Salamo 83:18) O le ā le mea e tupu i ē ua feoti? (Salamo 146:3, 4) Aiseā ua tatou iai i inei? (Kenese 1:26-28; Salamo 115:16) Faamata o le ā se aogā o lou iloaina o tali o nei fesili tāua?

Fautuaga aogā. O loo taʻua i le Tusi Paia le auala sili e ola ai. E faapefea ona e faatumauina se faaipoipoga? (Efeso 5:28, 29, 33) E faapefea ona e tausia aʻe ni fanau e maufaatuatuaina? (Teuteronome 6:5-7; Efeso 6:4) E faapefea ona e maua se olaga fiafia? (Mataio 5:3; Luka 11:28) O le ā la sou manatu, o le ā se aogā o fautuaga maufaatuatuaina e uiga i nei mataupu?

Malamalama i uiga o le Atua. O le Tusi Paia o le puna autū o faamatalaga saʻo aʻiaʻi e uiga i le Atua. E faapeʻī o ia? (Ioane 1:18; 4:24) Pe e manatu mamafa mai o ia iā i tatou? (1 Peteru 5:6, 7) O ā nisi o ona uiga mataʻina? (Esoto 34:6, 7; 1 Ioane 4:8) O le ā le tāua o lou iloaina o faamatalaga moni e uiga i Lē na faia i tatou?

O le mea moni lava ia, o “le poto i le Atua” o se oloa tāua faaleagaga. E faapefea ona e mauaina? Ua fesoasoani mai le fuaiupu e 4 o le Faataoto mataupu e 2, lea e faatusatusaina ai e Solomona lenei poto i se “oloa lilo.” Seʻi manatu i le mea lenei: E te lē nofonofo lava e maua faafuaseʻi se oloa lilo. E tatau ona faia ni taumafaiga ina ia maua ai. E faapena foʻi le poto i le Atua, lea e peiseaʻī o se oloa tāua, ua natia i le Tusi Paia. E tatau la ona tatou faia ni taumafaiga ina ia maua ai.

Ua faamatala mai e Solomona le mea e manaʻomia ona tatou faia ina ia “maua ai le poto i le Atua.” O faaupuga “talia aʻu upu” ma “faasaga atu foʻi lou loto,” ua faaalia mai ai e tatou te manaʻomia se loto talisapaia. (Fuaiupu e 1, 2) O faaupuga “valaau atu,” “saʻili pea,” ma le “suʻesuʻe i ai,” ua faaalia mai ai e manaʻomia ona tatou faaaogāina mea uma o loo iā i tatou, ma ia matuā naunau e maua lenā oloa. (Fuaiupu e 3, 4) Ina ia maua la le oloa tāua, e manaʻomia ona suʻesuʻeina le Tusi Paia ma le filigā, ma le loto faamaoni.—Luka 8:15.

Pe afai e tatou te faaalia lenei naunau moni, o le a fesoasoani mai Ieova ina ia maua lenā oloa tāua. Ua faapea mai le fuaiupu e 6, “o Ieova e na te foaʻi mai le atamai.” Ua na o le fesoasoani mai i le Atua, e mafai ai ona tatou malamalama atoatoa i upu moni o loo i le Tusi Paia. (Ioane 6:44; Galuega 16:14) E mafai ona e mautinoa i le mea lenei: Pe afai e te saʻili ma le faamaoni i le Afioga a le Atua, o le a e maua “le poto i le Atua”—o se oloa tāua o le a matuā faatamaoaigaina ai oe i se tulaga faaleagaga.—Faataoto 2:10-21. *

Faitauga Tusi Paia mo Oketopa:

▪ Faataoto 1-21

[Faaopoopoga i lalo]