Kon krosibei na Gado

Yu kan „kon leri sabi Gado”

YEHOVAH GADO gi wi na okasi fu feni wan warti gudu èn a wani taki wi feni a gudu disi trutru. A gudu disi no abi fu du nanga moni noso tra diri sani, ma a abi fu du nanga sani di nowan moni na grontapu man bai. Te wi abi a gudu disi, dan wi o abi wan korostu firi, wi o breiti nanga den sani di wi abi, èn wi o abi wan koloku libi. San na a gudu disi? Den wortu fu a koni Kownu Salomo di skrifi na Odo 2:1-6 e tyari dati kon na krin.

Salomo e sori taki wi o abi a gudu disi te wi e „kon leri sabi Gado”. Disi wani taki dati wi o kon sabi den tru tori fu Gado èn den sani di a abi na prakseri fu du, soleki fa Bijbel e sori (vers 5). A gudu disi abi fu du nanga difrenti sani.

Tru leri. Bijbel e gi piki tapu den sortu aksi disi: San na a nen fu Gado? (Psalm 83:18) San e pasa nanga wi te wi dede? (Psalm 146:3, 4) Fu san ede wi de na grontapu? (Genesis 1:26-28; Psalm 115:16) Yu denki taki yu ben o man pai wan moni fu kisi piki tapu den sortu prenspari aksi dati?

Koni rai. Bijbel e sori wi san na a moro bun fasi fu libi. San yu kan du fu abi wan koloku trowlibi? (Efeisesma 5:28, 29, 33) Fa yu kan kweki pikin fu tron sma di man tyari frantwortu? (Deuteronomium 6:5-7; Efeisesma 6:4) San yu kan du fu de koloku? (Mateyus 5:3; Lukas 11:28) Aksi yusrefi baka: O prenspari a de fu kisi bun rai te a abi fu du nanga den sortu tori disi?

Kon sabi fa Gado de èn sortu fasi a abi. Bijbel na a moro prenspari buku di e taki fu den tru tori fu Gado. Fa Gado de? (Yohanes 1:18; 4:24) A e broko en ede nanga wi? (1 Petrus 5:6, 7) San na wan tu fu den tumusi moi fasi fu en? (Eksodes 34:6, 7; 1 Yohanes 4:8) O prenspari yu denki taki den tru tori fu wi Mekiman de?

Te wi „kon leri sabi Gado”, dan dati na wan gudu trutru. Fa yu kan feni a gudu dati? Wi kan kon sabi dati te wi e luku vers 4 fu Odo kapitel 2, pe Salomo e agersi a sabi disi nanga „gudu di kibri”. Prakseri a sani disi: Wan gudu di kibri no o dyompo kon na ini yu anu te yu no e du noti. Yu abi fu du muiti fu feni a gudu. Na so a de tu nanga a sabi fu Gado. Fu taki en leti, a gudu disi kibri na ini Bijbel. Sobun, wi musu du muiti fu feni en.

Salomo e sori wi san wi musu du fu „kon leri sabi Gado”. Den wortu „gi yesi na den sani di mi taigi yu” èn „opo yu ati” e sori taki wi musu de klariklari fu gi yesi (vers 1, 2). Den wortu „bari kari” èn „tan suku” wani taki dati wi musu du tranga muiti fu sori taki wi wani feni a gudu disi (vers 3, 4). Sobun, efu wi wani feni a gudu dati, dan wi musu studeri Bijbel fayafaya èn wi musu du dati nanga wan krin ati.​—Lukas 8:15.

Te wi e sori taki wi wani feni a gudu dati, dan Yehovah o yepi wi. „Na Yehovah srefi e gi sma koni”, na so vers 6 e taki. Soso te Gado e yepi wi, wi o man frustan den tru tori na ini Bijbel dorodoro (Yohanes 6:44; Tori fu den apostel 16:14). Yu kan abi a dyaranti disi: Te yu e ondrosuku Gado Wortu nanga wan krin ati, dan yu o „kon leri sabi Gado”. Na so yu o abi wan gudu di o meki yu libi waka heri bun.​—Odo 2:10-21. *

A bun fu leisi a pisi disi fu Bijbel na ini oktober:

▪ Odo 1-21

[Futuwortu]