Atamela ho Molimo

U ka Fumana “Tsebo ea Molimo”

JEHOVA MOLIMO o behile letlotlo la bohlokoa haholo moo re ka khonang ho le fumana teng ’me o batla hore re le fumane. Letlotlo lena ha le re fe maruo a lefatše lena, empa le tla re fa ntho e ke keng ea rekoa ka chelete leha e le efe lefatšeng—khotso ea kelello, thabo le bophelo bo khotsofatsang. Letlotlo lee ke eng? Mantsoe a Morena Solomone ea bohlale a tlalehiloeng ho Liproverbia 2:1-6 a fana ka karabo.

Solomone o re letlotlo lena ke “tsebo ea Molimo”—ho bolelang hore, ke ’nete e mabapi le Molimo le merero ea hae e senoloang ka Bibeleng. (Temana ea 5) Letlotlo lena le na le litšobotsi tse ’maloa.

Lithuto tsa ’nete. Bibele e araba lipotso tse kang tsena: Lebitso la Molimo ke mang? (Pesaleme ea 83:18) Ho etsahala’ng ha re e-shoa? (Pesaleme ea 146:3, 4) Re phelela eng? (Genese 1:26-28; Pesaleme ea 115:16) U ne u tla ntša bokae ho reka karabo ea lipotso tsee tsa bohlokoa?

Keletso e bohlale. Bibele e re bolella tsela e molemo ka ho fetisisa ea ho phela. Ke joang u ka etsang hore lenyalo la hao le tšoarelle? (Baefese 5:28, 29, 33) Ke joang u ka hōlisang bana ka tsela eo ba tla ba le boikarabelo? (Deuteronoma 6:5-7; Baefese 6:4) Ke joang u ka fumanang thabo bophelong? (Matheu 5:3; Luka 11:28) Re sa pheta hape, u nahana joang—likeletso tsa bohlokoa tse mabapi le litaba tsee u ka li reka ka bokae?

Ho tseba sebōpeho sa Molimo le botho ba hae. Bibele ke oona mohloli o ka sehloohong o fanang ka boitsebiso ka Molimo. Molimo o joang? (Johanne 1:18; 4:24) Na oa re tsotella? (1 Petrose 5:6, 7) Litšobotsi tse ling tsa hae tse ikhethang ke life? (Exoda 34:6, 7; 1 Johanne 4:8) U ne u ka re ho tseba ’nete ka Mōpi oa rōna e ka ba bokae?

Ka sebele “tsebo ea Molimo” ke letlotlo la moea. U ka e fumana joang? Leseli la karabo ea potso eo le fumaneha temaneng ea 4 ea Liproverbia khaolo ea 2, moo Solomone a bapisang tsebo ena le “matlotlo a patiloeng.” Ak’u nahane hantle ka taba ena: Letlotlo le patiloeng le ke ke la tsoa moo le patiloeng teng eaba le ipeha ka matsohong a motho. Re lokela ho sebetsa ka matla e le hore re le fumane. Ho joalo le ka tsebo ea Molimo. Letlotlo lena ha e le hantle, le patiloe ka Bibeleng. E le hore re le fumane, re lokela ho sebetsa ka matla.

Solomone o hlalosa hore na re lokela ho etsa’ng e le hore re fumane “tsebo ea Molimo.” Mantsoe a reng “amohela lipolelo tsa ka” le a reng “u sekamisetse pelo ea hao” a bontša hore re lokela ho ikemisetsa ho utloa. (Temana ea 1, 2) Mantsoe a reng “haeba u hoeletsa,” “u ntse u li batla” le a reng “u ntse u li batlisisa,” a bontša hore re lokela ho ikitlaetsa ka matla, re bontše ka tieo hore re ikemiselitse. (Temana ea 3, 4) Ka hona, e le hore re fumane letlotlo leo, re lokela ho ithuta Bibele ka matla, re etse joalo ka lipelo tse ikemiselitseng.—Luka 8:15.

Haeba re nka bohato ba ho etsa joalo, Jehova o tla re thusa ho le fumana. Temana ea 6 e re, “Jehova o fana ka bohlale.” Ke ka thuso ea Molimo feela re ka khonang ho utloisisa linnete tse ka Bibeleng. (Johanne 6:44; Liketso 16:14) U ka kholiseha ka taba ena: Haeba u ikemiselitse ho batlisisa ka Lentsoeng la Molimo, u tla fumana “tsebo ea Molimo”—letlotlo le tla u ruisa bophelong ka tsela e ke keng ea lekanngoa.—Liproverbia 2:10-21. *

Litemana tsa Bibele Tseo U ka li Balang ka October:

▪ Liproverbia 1–21

[Mongolo o botlaaseng ba leqephe]