Amube Acilongwe A Leza

Mulakonzya Kujana “Luzibo lwa Leza”

JEHOVA LEZA wapa kuti cikonzyeke kulindiswe kujana cintu ciyandisi, alimwi uyanda kuti tucijane. Cintu ciyandisi eeci tacipi lubono lwakumubili, pele ciyoopa kujana cimwi cintu calo citakonzyi kuulwa amali oonse aamunyika—kuliiba kwamumizeezo, kukkutila, alimwi abuumi bukkomanisya. Ino cintu ciyandisi eeci ncinzi? Majwi aa Mwami musongo Solomoni aalembedwe mulugwalo lwa Tusimpi 2:1-6 alapandulula.

Solomoni upandulula cintu ciyandisi eeci kuti ‘nduzibo lwa Leza’—nkokuti, kasimpe kajatikizya Leza kajanika mu Bbaibbele alimwi amakanze aakwe. (Kapango 5) Kuli mbazu zinji kujatikizya cintu ciyandisi eeci.

Njiisyo zyakasimpe. Ibbaibbele lilaingula mibuzyo mbuli yeeyi: Ino Leza nguni zyina lyakwe? (Intembauzyo 83:18) Ncinzi cicitika twafwa? (Intembauzyo 146:3, 4) Nkaambo nzi ncotuponena? (Matalikilo 1:26-28; Intembauzyo 115:16) Mubwini, bwiinguzi kumibuzyo eeyi bulayandika kapati.

Lulayo lwabusongo. Ibbaibbele lilatwaambila nzila mbotu mbotukonzya kupona. Ino inga mwacita buti kuti cikwati citamani? (Baefeso 5:28, 29, 33) Mbuti mbomukonzya kukomezya bana babikkila maano kuzyintu? (Deuteronomo 6:5-7; Baefeso 6:4) Mbuti mbomukonzya kujana lukkomano mubuumi? (Matayo 5:3; Luka 11:28) Alimwi, ino muyeeya buti—mbuti mbociyandika kujana lulayo lugwasya kumakani aaya?

Kuzyiba mbwabede Leza alimwi abube mbwajisi. Mu Bbaibbele momujanwa twaambo twamasimpe kujatikizya Leza. Ino uboneka buti? (Johane 1:18; 4:24) Sena ulatubikkila maano? (1 Petulo 5:6, 7) Ino mbube nzi bumwi bulibonya kapati mulinguwe? (Kulonga 34:6, 7; 1 Johane 4:8) Ino twaambo twamasimpe kujatikizya Mulengi wesu inga mwatweezyanisya anzi?

“Luzibo lwa Leza” masimpe ncintu ciyandisi cakumuuya. Ino inga mwacijana buti? Ikaambo kalajanika mukapango 4 mulugwalo lwa Tusimpi caandano 2, mwalo Solomoni mweezyanisya luzyibo oolu “[ku]zintu ziyandika zisisidwe.” Amuyeeye buyo kaambo aaka: Zyintu ziyandika zisisidwe tazikonzyi kuzwa abusena mpozisisidwe akuba mumaanza amuntu uukkede buyo. Tweelede kubeleka canguzu kutegwa tuzijane. Oobu mbocibede akuluzyibo lwa Leza. Eeci caamba kuti tweelede kubala Bbaibbele kutegwa tucijane cintu ciyandisi.

Solomoni ulapandulula ncotweelede kucita kutegwa tulujane “luzibo lwa Leza.” Majwi aakuti “na watambula majwi aangu” alimwi aakuti ‘kubika moyo wako’ atondezya kuti tweelede kuba amoyo mubombe. (Tupango 1, 2) Majwi aakuti “walilila,” “wabuyandaula,” alimwi aakuti ‘kubulangaula’ atondezya kuti tweelede kubeleka canguzu, kubikkila maano camoyo woonse. (Tupango 3, 4) Aboobo, kutegwa tujane cintu ciyandisi, tweelede kwiiya Bbaibbele cabusungu, kucita oobo camoyo woonse.—Luka 8:15.

Ikuti twacita oobo, Jehova uyootugwasya kujana cintu ciyandisi. Kapango 6 kaamba kuti “Jehova ulaabila busongo.” Leza alikke nguukonzya kutugwasya kumvwisya kasimpe kajanika mu Bbaibbele. (Johane 6:44; Milimo 16:14) Mulakonzya kuba masimpe kukaambo aaka: Ikuti naa mwavwuntauzya mu Jwi lya Leza, muyoojana “luzibo lwa Leza”—cintu ciyandisi iciyoomupa mpindu iitaambiki mubuumi bwanu.—Tusimpi 2:10-21. *

[Bupanduluzi buyungizidwe]