Kuata Ukamba La Suku

O Pondola Oku “Sanga Ukũlĩhĩso wa Suku”

YEHOVA Suku wa tu kapela kovaso ukuasi umue wa velapo kuenda o yongola okuti tu sanga ukuasi waco. Owo ka u nena ovipako, pole, u nena ombembua yovutima, esanju, kuenda ekalo liwa okuti olombongo viosi violuali ka vi pondola oku ci landa. Ukuasi waco u lomboloka nye? Olondaka via Soma Salomone vi sangiwa kelivulu Liolosapo 2:1-6, vi eca elomboluilo liaco.

Salomone wa tukula ukuasi waco hati, “ukũlĩhĩso wa Suku” una u lomboloka ocili catiamẽla ku Suku kuenda kocipango caye ndomo ca situluiwa Vembimbiliya. (Ocinimbu 5) Pole, kuli ovina vikuavo viatiamẽla kukuasi waco.

Alongiso Ocili. Embimbiliya li eca atambululo kapulilo amue ndeci: Onduko ya Suku helie? (Osamo 83:18) Nye ci pita lomunu eci a fa? (Osamo 146:3, 4) Momo lie tu kasilili voluali? (Efetikilo 1:26-28; Osamo 115:16) Ondando yipi nda wa feta poku sanga atambululo kapulilo ava a velapo?

Alungulo a Sunguluka. Embimbiliya li tu sapuila ndomo tu pondola oku ambata ciwa omuenyo wetu. Nye o sukila oku linga oco olohuela viove vi amameko? (Va Efeso 5:28, 29, 33) Ndamupi o longisa omãla vove oco va kule lolondunge? O sanga ndati esanju komuenyo? (Mateo 5:3; Luka 11:28) Sokolola vali, ondando yipi nda wa feta poku sanga atambululo kapulilo ava a velapo?

Oku Kũlĩha Ekalo Lia Suku Kuenda Ovituwa Viaye. Embimbiliya olio ono ya velapo yulandu wosi watiamẽla ku Suku. Ndamupi a tuwa? (Yoano 1:18; 4:24) Anga hẽ o kuete ocikembe letu? (1 Petulu 5:6, 7) Vipi ovituwa viaye via velapo? (Etundilo 34:6, 7; 1 Yoano 4:8) Ove nda wa popia ndoco: Yipi ondando yulandu owu wocili catiamẽla Kululiki wetu?

Ocili okuti, “ukũlĩhĩso wa Suku” ukuasi umue wespiritu. Tu pondola oku u sanga ndati? Kocinimbu 4, Salomone wa sokisa ukũlĩhĩso waco ‘ndukuasi wa selekiwa.’ Sokolola ndoco: Ukuasi wosi wa selekiwa, ka u tundi pocitumãlo u kasi kuenje wiya povaka etu. Oco tu u kuate, tu sukila oku likolisilako oku u sanda. Cimuamue haico catiamẽla kukũlĩhĩso wa Suku. Ukuasi waco wa selekiwa Vembimbiliya. Oco tu u sange, tu sukilavo oku likolisilako calua.

Salomone wa lombolola eci tu sukila oku linga oco tu sange “ukũlĩhĩso wa Suku.” Olondaka viokuti, “tava kolondaka viange” kuenda “tiamisa utima wove,” vi lekisa okuti tu sukila oku kuata utima wa sunguluka. (Ovinimbu 1, 2) Olondaka viokuti oku “sandiliya,” oku “sanda sanda” kuenda oku “vanjiliya,” vi lekisa okuti tu sukila oku likolisilako calua loku kuata onjongole yoku ci linga. (Ovinimbu 3, 4) Oco tu sange ukuasi waco, tu sukila oku kuata ombili yoku lilongisa Embimbiliya lutima wa sunguluka.—Luka 8:15.

Nda tua fetika oku ci linga, Yehova o tu kuatisa oku sanga ukuasi waco. Ocinimbu 6, ci popia hati: “Yehova eye ukuakueca olondunge.” Suku eye lika o pondola oku tu kuatisa oku sanga ocili ci sangiwa Vembimbiliya. (Yoano 6:44; Ovilinga 16:14) Omo liaco, kolela okuti nda wa konomuisa Ondaka ya Suku, o ka sanga “ukũlĩhiso wa Suku,” una u ku kuatisa oku kuata esanju komuenyo.—Olosapo 2:10-21. *

[Etosi Pombuelo Yemẽla]