Sambilileni Icebo ca kwa Lesa

Kuti Mwacita Shani pa Kuti Mube ne Nsansa mu Lupwa?

Ici cipande cilelanda pa mepusho ayo nalimo mufwaisha ukwishiba kabili cilemulanga na po mwingasanga amasuko muli Baibolo yenu. Inte sha kwa Yehova kuti batemwa nga nshi ukulanshanya na imwe ayo masuko.

1. Mulandu nshi icupo ca mucinshi cacindamina pa kuti mu lupwa mube insansa?

Yehova, Lesa wa nsansa, e watendeke icupo. Icupo ca mucinshi calicindama pa kuti mu lupwa mube insansa pantu icupo ca musango yu tacilenga abantu ukulaikala fye pamo lelo ciba cifulo icisuma ica kukushishamo abana bwino. Bushe Lesa amona shani icupo? Afwaya ukuti icupo cibelelele, no kuti umwaume no mwanakashi balembeshe icupo cabo. (Luka 2:1-5) Lesa afwaya umulume no mukashi ukuba aba cishinka mu cupo. (AbaHebere 13:4) Yehova asuminisha fye Abena Kristu ukulekana no kuupa nelyo ukuupwa na kabili nga ca kutila umo acita ubucende.—Belengeni Mateo 19:3-6, 9.

2. Bushe umulume no mukashi bafwile ukulasungana shani?

Yehova abumbile umwaume no mwanakashi pa kuti baleafwana mu cupo. (Ukutendeka 2:18) Apo umulume e mutwe wa lupwa, afwile ukupekanishisha aba mu lupwa lwakwe ifyo bakabila no kubasambilisha ifya kwa Lesa. Afwile ukutemwa sana umukashi wakwe ica kutila kuti aipeelesha no kufwilapo. Abaupana bafwile ukutemwana no kulacindikana. Apo abantu bonse balalufyanya, abaupana balingile ukulaelelana. Ukwelelana kwalicindama sana pa kuti mu cupo mube insansa.—Belengeni Abena Efese 4:31, 32; 5:22-25, 33; 1 Petro 3:7.

3. Bushe mufwile ukupaatukana mu cupo nga tamuli insansa?

Nga ca kutila namukwata amafya mu cupo, e lyo mufwile ukutemwana sana. (1 Abena Korinti 13:4, 5) Baibolo taikoselesha abaupana ukupaatukana nge nshila ya kupwishishamo amafya. Lelo, nga ca kutila ifintu fya-afya sana, Umwina Kristu kuti apingulapo nga ca kutila cili fye bwino ukupaatukana nelyo iyo.—Belengeni 1 Abena Korinti 7:10-13.

  4. Mwe bana, bushe Lesa afwaya ukuti mube shani?

Yehova afwaya ukuti mube ne nsansa. Alamupanda amano yene yene pa kuti muipakishe ubumi ilyo muli abaice. Afwaya ukuti mulekonka ukupanda amano ukwa bafyashi benu. (Abena Kolose 3:20) Yehova alasekelela nga muleumfwila abafyashi benu.—Belengeni Lukala Milandu 11:9–12:1; Mateo 19:13-15; 21:15, 16.

5. Mwe bafyashi, kuti mwacita shani pa kuti abana benu babe ne nsansa?

Mufwile ukulabombesha pa kuti mulepekanishisha abana benu ifya kulya, umwa kwikala, ne fya kufwala. (1 Timote 5:8) Lelo pa kuti abana benu babe ne nsansa, mufwile no kulabasambilisha ukutemwa Lesa no kulakonka ifyo alanda. (Abena Efese 6:4) Nga ca kutila mwe bafyashi mwalitemwa Lesa, abana nabo bakatemwa Lesa. Nga mulebafunda ukubomfya Icebo ca kwa Lesa, abana bakakula bwino.—Belengeni Amalango 6:4-7; Amapinda 22:6.

Abana balatemwa nga ca kutila mulebakoselesha no kubatasha. Lelo balakabila no kubalungika no kubasalapula. Ukubasalapula kulabacingilila ku fingabaletela amafya. (Amapinda 22:15) Nomba pa kubasalapula mulingile ukuba no mutembo.—Belengeni Abena Kolose 3:21.

Inte sha kwa Yehova balalemba ifitabo ifyalekanalekana ifingafwa abafyashi na bana. Ifi fitabo filanda pa fyaba mu Baibolo.—Belengeni Amalumbo 19:7, 11.

Nga mulefwaya ukwishibilapo na fimbi, belengeni icipandwa 14 muli citabo citila Bushe Cinshi Baibolo Isambilisha icalembwa ne Nte sha kwa Yehova.