Pagkat-on Gikan sa Pulong sa Diyos

Sa Unsang Paagi Magmalipayon ang Imong Pamilya?

Kini nga artikulo nagpatunghag mga pangutana nga lagmit imong gisukna ug nagpakita kon asa nimo mabasa ang tubag niini sa Bibliya. Ang mga Saksi ni Jehova malipay sa pagpakighisgot niini kanimo.

1. Nganong ang kaminyoon hinungdanon sa kalipay sa pamilya?

Si Jehova, ang malipayong Diyos, maoy nagmugna sa kaminyoon. Hinungdanon kini sa kalipay sa pamilya kay pinaagi niini matagamtam ang panag-ubanay ug kini magtaganag luwas nga dapit diin matutoon ang mga anak. Unsay panglantaw sa Diyos sa kaminyoon? Buot niya nga kini nga panaghiusa sa lalaki ug babaye permanente ug narehistro. (Lucas 2:1-5) Gusto niya nga ang magtiayon magmaunongon sa usag usa. (Hebreohanon 13:4) Tugotan lang ni Jehova ang pagpakigbulag ug pagminyo pag-usab kon ang ilang kapikas nakapanapaw.—Basaha ang Mateo 19:3-6, 9.

2. Sa unsang paagi trataron sa magtiayon ang usag usa?

Gilalang ni Jehova ang lalaki ug babaye aron mahimong katimbang sa usag usa. (Genesis 2:18) Ingong ulo sa pamilya, ang bana angayng manguna sa pagtagana sa materyal ug espirituwal nga panginahanglan sa pamilya. Kinahanglang magpakita siyag masakripisyohong gugma sa iyang asawa. Ang magtiayon angayng magpakitag gugma ug pagtahod sa usag usa. Kay dili man hingpit, angay silang makakat-on sa pagpasaylo aron magmalipayon ang kaminyoon.—Basaha ang Efeso 4:31, 32; 5:22-25, 33; 1 Pedro 3:7.

3. Angay bang biyaan ang kapikas kon dili malipayon ang kaminyoon?

Kon kamo makasinatig mga problema, paningkamot sa pagpakitag gugma. (1 Corinto 13:4, 5) Ang Pulong sa Diyos wala mag-ingon nga panagbulag ang solusyon sa problema. Apan sa grabeng mga kahimtang, ang usa ka Kristohanon kinahanglang modesisyon kon angay bang makigbulag o dili.—Basaha ang 1 Corinto 7:10-13.

  4. Mga anak, unsay gusto sa Diyos nga inyong buhaton?

Buot ni Jehova nga kamo magmalipayon. Siya naghatag kaninyog kinamaayohang tambag kon sa unsang paagi magmalipayon. Buot niyang makabenepisyo mo sa kaalam ug kasinatian sa inyong ginikanan. (Colosas 3:20) Gipabilhan ni Jehova ang inyong paningkamot sa pagdayeg kaniya.—Basaha ang Ecclesiastes 11:9–12:1; Mateo 19:13-15; 21:15, 16.

5. Mga ginikanan, sa unsang paagi magmalipayon ang inyong mga anak?

Angay kamong magkugi aron makataganag pagkaon, balay, ug besti sa inyong mga anak. (1 Timoteo 5:8) Apan aron sila magmalipayon, angay usab ninyo silang tudloan sa paghigugma sa Diyos ug pagkat-on kaniya. (Efeso 6:4) Ang inyong panig-ingnan sa pagpakitag gugma sa Diyos dakog epekto sa kasingkasing sa inyong anak. Kon ang inyong instruksiyon gipasukad sa Pulong sa Diyos, kini may positibong impluwensiya sa hunahuna sa inyong anak.—Basaha ang Deuteronomio 6:4-7; Proverbio 22:6.

Ang mga anak makabenepisyo kon sila inyong dasigon ug komendahan. Kinahanglan sab silang tul-iron ug disiplinahon. Ang maong pagbansay manalipod nila batok sa panggawi nga makawala sa ilang kalipay. (Proverbio 22:15) Apan ang disiplina dili angayng himoon sa mabangis nga paagi.—Basaha ang Colosas 3:21.

Ang mga Saksi ni Jehova nagpatik ug mga librong gipasukad sa Bibliya nga gisulat aron matabangan ang mga ginikanan ug mga anak.—Basaha ang Salmo 19:7, 11.

Alang sa dugang impormasyon, tan-awa ang kapitulo 14 niining libroha, Unsay Tinuod nga Gitudlo sa Bibliya?, nga gipatik sa mga Saksi ni Jehova.