Mbaʼépa omboʼe la Biblia

Ko artíkulo nepytyvõta rembohovái hag̃ua la Biblia rupive umi mbaʼe reikuaaséva. Peteĩ testígo de Jehová ikatu ohesaʼỹijo nendive koʼã porandu.

1. Mbaʼérepa peteĩ paréha tekotevẽ omenda ovyʼa hag̃ua?

Jehová, pe Ñandejára ovyʼáva, omoñepyrũvaʼekue pe ñemenda. Ko mbaʼe ningo tekotevẽterei peteĩ família ovyʼa hag̃ua, ikatúgui pe kuimbaʼe ha kuña oñomoirũ ha omongakuaa porã ifamiliakuérape. Mbaʼéichapa Ñandejára ohecha pe ñemenda? Haʼe oipota peteĩ kuimbaʼe ha kuña omenda pe léi heʼiháicha ha oiko oñondive opa árare (Lucas 2:1-5). Jehová ndoipotái ména ha tembireko oñomoakãratĩ (Hebreos 13:4). Peteĩ kristiáno ikatu ojedivorsia ha omenda jey iména térã hembireko omoakãratĩramo añoite chupe. (Elee Mateo 19:3-6, 9.)

2. Mbaʼéichapa ojotratavaʼerã ména ha tembireko?

Jehová ningo ojapo kuimbaʼe ha kuñáme oñopytyvõ hag̃ua imatrimóniope (Génesis 2:18). Pe ména omoakãvaʼerã hogapy, upévare omoĩvaʼerã ifamíliape hemikotevẽ ha omboʼe chupekuéra Ñandejára rembipota. Oĩvaʼerã avei ojesakrifika hag̃uáicha hembireko rehehápe ohayhúgui chupe. Umi omendáva ningo ojoayhu ha ojorrespetavaʼerã. Ha mokõivéva iñimperfékto rupi oñoperdonakuaavaʼerã ovyʼaséramo. (Elee Efesios 4:31, 32; 5:22-25, 33, ha 1 Pedro 3:7.)

3. Ojopoivaʼerãpa umi omendáva ndovyʼáigui?

Umi omendáva iprovlémarõ, mokõivéva oñehaʼãvaʼerã ojotrata mborayhúpe (1 Corintios 13:4, 5). Ñandejára Ñeʼẽ ndeʼiriete umi omendáva ojopoivaʼerãha osolusiona hag̃ua iprovléma. Péro peteĩ kristiáno ikatu odesidi ojopoi ohasáramo peteĩ situasión ijetuʼuetereíva. (Elee 1 Corintios 7:10-13.)

 4. Mbaʼépa Ñandejára oipota mitãnguérape g̃uarã?

Jehová oipota mitãnguéra ovyʼa. Upévare omboʼe chupekuéra ikatu hag̃uáicha ovyʼa imitã aja. Oipota avei oñevenefisia itúva ha isy rembiasakue ha ikonsehokuéragui (Colosenses 3:20). Ha omombaʼeterei umi imitãva ojapóva omombaʼeguasu hag̃ua Chupe. (Elee Eclesiastés 11:9–12:1 ha Mateo 19:13-15; 21:15, 16.)

5. Mbaʼépa tuvakuéra ikatu ojapo ifamília ovyʼa hag̃ua?

Tuvakuéra ojapovaʼerã opa ikatúva omoĩ hag̃ua ifamíliape hoʼu, omonde ha oikomi hag̃ua (1 Timoteo 5:8). Péro ndahaʼéi upéva añónte ojapovaʼerã. Omboʼevaʼerã avei ifamíliape ohayhu ha ohaʼanga hag̃ua Ñandejárape (Efesios 6:4). Tuvakuéra ohayhuvaʼerã Ñandejárape, upéicha omoĩta ehémplo porã ifamíliape. Oñehekomboʼéramo mitãnguérape Ñandejára Ñeʼẽ heʼiháicha oipytyvõta chupekuéra opensa hag̃ua umi mbaʼe iporãvare. (Elee Deuteronomio 6:4-7 ha Proverbios 22:6.)

Mitãnguéra ningo oikotevẽ oñemokyreʼỹ ha ojeguerohory umi mbaʼe porã ojapóvare. Sapyʼánte tekotevẽ avei oñemoñeʼẽ ha ojekorrehi chupekuéra, upéicha ndojapomoʼãi umi mbaʼe operhudikátava chupekuéra (Proverbios 22:15). Upéicharõ jepe, tuvakuéra ndaipyʼahatãivaʼerã okorrehi jave ifamíliape. (Elee Colosenses 3:21.)

Testigos de Jehová ojapóma heta lívro oipytyvõ hag̃ua tuvakuéra ha ifamiliakuérape. Umíva oñemopyenda la Bíbliape. (Elee Salmo 19:7, 11.)

Reikuaasevéramo koʼã mbaʼe ikatu rehecha ko lívro, Mbaʼépa añetehápe omboʼe la Biblia?, ojapóva Testigos de Jehová, kapítulo 14-pe.