Agsursuroka iti Sao ti Dios

Kasano nga Agbalin a Naragsak ti Pamiliam?

Idatag daytoy nga artikulo dagiti saludsod a nalabit nayimtuodmon. Ipakitana met ti pakabasaam kadagiti sungbat iti Bibliam. Maragsakan dagiti Saksi ni Jehova a mangilawlawag kenka kadagiti sungbat.

1. Apay a napateg ti panagkasar tapno agbalin a naragsak ti pamilia?

Ti naragsak a Dios a ni Jehova ti namunganay iti panagkasar wenno panagasawa. Napateg dayta tapno naragsak ti pamilia, ta saan laeng a mangipaay dayta iti katakunaynay no di ket iti pay natalged nga aglawlaw a pangpadakkelan kadagiti ubbing. Ania ti panangmatmat ti Dios iti panagasawa? Kayatna nga agbalin a permanente ti panagasawa, ken legal a nairehistro dayta. (Lucas 2:1-5) Kayat ti Dios nga agbalin a nasungdo dagiti agassawa. (Hebreo 13:4) Ipalubos ni Jehova a makidiborsio dagiti Kristiano ken makiasawada manen no nakikamalala ti asawada.​—Basaem ti Mateo 19:3-6, 9.

2. Kasano ti rumbeng a panangtrato iti asawa?

Pinarsua ni Jehova ti lalaki ken babai tapno agdanggayda kas agassawa. (Genesis 2:18) Kas ulo ti pamilia, rebbengen ti lalaki nga ipaay ti material ken naespirituan a kasapulan ti pamiliana. Masapul met a managsakripisio ti ayatna ken baketna. Rumbeng nga aginnayat ken agrinnaem dagiti agassawa. Nupay imperpektoda, napateg nga agpinnakawanda tapno naragsak ti panagasawada.​—Basaem ti Efeso 4:31, 32; 5:22-25, 33; 1 Pedro 3:7.

3. Suminaka kadin iti asawam no saan a naragsak ti panagasawayo?

No adda saanyo a pagkinnaawatan iti asawam, ikagumaanyo a tratuen ti maysa ken maysa buyogen ti ayat. (1 Corinto 13:4, 5) Saan nga iparegta ti Sao ti Dios ti panagsina kas solusion kadagiti parikut iti panagasawa. No nakaro ti parikut, mabalin nga ikeddeng ti Kristiano ti sumina wenno agtalinaed iti asawana.​—Basaem ti 1 Corinto 7:10-13.

  4. Dakayo nga annak, ania ti kayat ti Dios para kadakayo?

Kayat ti Dios a naragsakkayo. Nangipaay kadakayo iti kasayaatan a balakad tapno agbalin a naragsak ti kinaagtutuboyo. Kayatna a magunggonaankayo iti sirib ken kapadasan dagiti nagannakyo. (Colosas 3:20) Maragsakan ni Jehova no agtulnogkayo kadakuada.​—Basaem ti Eclesiastes 11:9–12:1; Mateo 19:13-15; 21:15, 16.

5. Dakayo a nagannak, kasano nga agbalin a naragsak dagiti annakyo?

Masapul nga ikagumaanyo ti agtrabaho tapno maipaayyo ti taraon, taeng, ken kawes dagiti annakyo. (1 Timoteo 5:8) Ngem tapno naragsak dagiti annakyo, masapul met nga isuroyo ida nga am-ammuen ken ayatenda ti Dios. (Efeso 6:4) Ti mapagulidanan a panagayatyo iti Dios adda dakkel nga epektona iti puso ti anakyo. No naibatay iti Sao ti Dios iti isursuroyo kadakuada, agbalindanto a naemma ken manakem. ​—Basaem ti Deuteronomio 6:4-7; Proverbio 22:6.

Nasayaat ti epektona no paregtaen ken komendaranyo dagiti ubbing. Masapul met a maatur ken madisiplinada tapno saanda a makaaramid iti banag a mamaglidayto kadakuada. (Proverbio 22:15) Ngem saan koma a naranggas ti maipataw a disiplina.​—Basaem ti Colosas 3:21.

Mangipabpablaak dagiti Saksi ni Jehova kadagiti libro a nairanta a tumulong kadagiti nagannak ken annak. Dagitoy a libro ket naibasar iti Biblia.​—Basaem ti Salmo 19:7, 11.

Para iti kanayonan nga impormasion, kitaem ti kapitulo 14 daytoy a libro, Ania a Talaga ti Isursuro ti Biblia? nga impablaak dagiti Saksi ni Jehova.