Wuhrẹ No Ẹme Ọghẹnẹ Ze

Ẹvẹ Uviuwou Ra O Sae rọ Wereva?

Uzoẹme nana u dhunu te enọ jọ nọ o rẹ sae jọnọ whọ nọ no ẹdẹjọ, u te je dhesẹ oria nọ whọ rẹ sae jọ ruẹ iyo na evaọ Ebaibol ra. O te were Isẹri Jihova re a lele owhẹ ta ẹme kpahe iyo na.

1. Fikieme orọo nọ a rẹ ro lele uzi u ro wuzou kẹ evawere uviuwou?

Jihova, Ọghẹnẹ evawere na ọ to orọo họ. Orọo u wuzou kẹ evawere uviuwou keme u re ru usu ọzae avọ aye kpekpe je fi obọ họ kẹ ai wo emamọ otọhotọ nọ a sae jọ yọrọ emọ. Ẹvẹ Ọghẹnẹ o rri orọo? Ọ gwọlọ nọ ọzae-avọ-aye a rẹ ro orọo lele uzi, gbe inọ orọo o rẹ jọ ribri. (Luk 2:1-5) Ọghẹnẹ ọ gwọlọ nọ ọzae-avọ-aye a re rri omọfa thọ ọrivẹ-orọo rai wa ha. (Ahwo Hibru 13:4) Nọ ọrivẹ-orọo jọ o te bruẹnwae ọvo Jihova ọ jọ kuvẹ nọ orọo o rẹ sae fa nọ ọdekọ ọ jẹ sae wariẹ rọo.—Se Matiu 19:3-6, 9.

2. Ẹvẹ u fo nọ ọzae-avọ-aye a re yerikugbe ohwohwo?

Jihova ọ ma ezae avọ eyae avọ ọvuọ onaa riẹ nọ a sai ro ru iruo kugbe je fi obọ họ kẹ ohwohwo. (Emuhọ 2:18) Wọhọ ọnọ o wuzou uwou, ọzae ọ rẹ karo evaọ ẹruorote ẹgwọlọ abọ-iwo uviuwou riẹ je wuhrẹ uviuwou na kpahe Ọghẹnẹ. O re wo uyoyou udidi kẹ aye riẹ. Ọzae-avọ-aye a re you jẹ rọ adhẹẹ kẹ ohwohwo. Nọ ezae avọ eyae kpobi a gba ha na, erọvrẹ nọ a re wo yọ ugogo oware jọ nọ o rẹ lẹliẹ evawere jọ orọo.—Se Ahwo Ẹfẹsọs 4:31, 32; 5:22-25, 33; 1 Pita 3:7.

3. Kọ u fo re whọ dhẹ no orọo nọ evawere e gbẹ riẹ hẹ?

Nọ whẹ avọ ọrivẹ-orọo ra wha te wo ẹbẹbẹ, wha daoma rọ uyoyou lele ohwohwo yeri. (1 Ahwo Kọrint 13:4, 5) Ẹme Ọghẹnẹ ọ fodẹ ẹhẹriẹ wọhọ edhere nọ a re ro ku ebẹbẹ orọo họ họ. Dede na, nọ ẹbẹbẹ na o te bi fi uzuazọ ọjọ họ ọza, Oleleikristi ọ rẹ jiroro na kẹ omariẹ sọ u fo re a hẹriẹ hayo re a gbẹ jọ kugbe.—Se 1 Ahwo Kọrint 7:10-13.

  4. Emọ, didi uzuazọ Ọghẹnẹ ọ gwọlọ kẹ owhai?

Jihova ọ gwọlọ nọ wha wereva. Ọ be kẹ owhai ohrẹ nọ o mai woma kpahe oghẹrẹ nọ wha rẹ rọ reawere oke uzoge rai. Ọ gwọlọ nọ wha wo erere no areghẹ gbe eware nọ esẹgbini rai a rọ ẹro ruẹ no ze. (Ahwo Kọlọsi 3:20) Jihova o bi muẹrohọ oware kpobi nọ wha bi ru rọ wha ujiro se odẹ riẹ.—Se Ọtausiuwoma Na 11:9–12:1; Matiu 19:13-15; 21:15, 16.

5. Esẹgbini, ẹvẹ emọ rai a sai ro wo evawere?

Wha ru iruo gaga re wha sae gwọlọ emuore gbe emuẹgọ kẹ emọ rai, gbe oria nọ a rẹ rria. (1 Timoti 5:8) Rekọ re emọ rai a sai wo evawere, o gwọlọ nọ wha re wuhrẹ ai epanọ a re ro wo uyoyou kẹ Ọghẹnẹ je wuhrẹ no Ẹme Ọghẹnẹ ze. (Ahwo Ẹfẹsọs 6:4) Nọ emọ ra a tẹ be ruẹ nọ who wo uyoyou kẹ Ọghẹnẹ, udu o rẹ sae wọ ai ru epọvo na re. Nọ uthubro ra o tẹ be hai no Ẹme Ọghẹnẹ ze, o rẹ sae kpọ iroro ọmọ ra họ uvi edhere.—Se Iziewariẹ 6:4-7; Itẹ 22:6.

U re fi obọ họ kẹ emọ nọ whọ tẹ be hae ta udu họ ae awọ je jiri ai. A gwọlọ ọkpọvio gbe ọwhọkuo re. Uwuhrẹ utioye na o rẹ thọ ai no iruemu nọ e rẹ sai ru nọ a gbe wo evawere he. (Itẹ 22:15) Ghele na, u fo re ọwhọkuo ọ gahrọ hayo jọ orọ omonwa ha.—Se Ahwo Kọlọsi 3:21.

Isẹri Jihova a kere ebe buobu no rọkẹ obufihọ esẹgbini gbe emọ. Ebaibol a kere ebe nana noze.—Se Olezi 19:7, 11.

Rọkẹ evuẹ efa, rri uzou avọ 14 orọ obe nana, Eme Ebaibol na O Gine Wuhrẹ? onọ Isẹri Jihova a kere.