Mu Itute Linzwi La Mulimu

Lubasi Lwa Mina lu Kona ku ba Cwañi ni Tabo?

Taba ye i nyakisisa lipuzo ze ne mu kana mu ipuzize mi i bonisa ko mu kona ku fumana likalabo mwa Bibele ya mina. Lipaki za Jehova ba ka tabela ku nyakisisa ni mina likalabo ze.

1. Ki kabakalañi linyalo ha li li la butokwa kuli ku be ni tabo mwa lubasi?

Jehova, Mulimu ya tabile, ki yena musimululi wa linyalo. Linyalo ki la butokwa kuli ku be ni tabo mwa lubasi bakeñisa kuli kwandaa ku tiisa feela silikani, banana ba kona ku utiwa hande. Mulimu u nga cwañi linyalo? U bata kuli linyalo li inelele, yona swalisano ya ka mulao ye mwahalaa muuna ni musali. (Luka 2:1-5) Mulimu u bata kuli baana ba ba nyezi ni basali ba ba nyezwi ba sepahale yo muñwi ku yo muñwi. (Maheberu 13:4) Jehova u lumeleza Bakreste ku kena mwa telekano ni ku nyala sinca haiba feela yo muñwi mwa linyalo a eza bubuki.—Mu bale Mateu 19:3-6, 9.

2. Batu ba ba nyalani ba swanela ku pilisana cwañi?

Jehova naa bupile baana ni basali kuli ba sebelisane hamoho mwa linyalo. (Genese 2:18) Ka ku ba toho ya lubasi, muuna ya nyezi u swanela ku babalela lubasi lwa hae kwa mubili ni ku luta lubasi lwa hae ka za Mulimu. U swanela ku lata musalaa hae hahulu. Batu ba ba nyalani ba swanela ku latana ni ku kutekana. Bakeñisa kuli batu ba ba mwa linyalo kaufela ha ba si ka petahala, ku swalelana ki kwa butokwa hahulu bakeñisa kuli ku tusa batu ba ba mwa linyalo ku ba ni tabo.—Mu bale Maefese 4:31, 32; 5:22-25, 33; 1 Pitrosi 3:7.

3. Kana mwa swanela ku siya bakumina ha ku si na tabo mwa linyalo la mina?

Haiba kuli mina ni bakumina mu kopana ni butata bo bu shutana-shutana, mu like ka taata ku pilisana ka lilato. (1 Makorinte 13:4, 5) Linzwi la Mulimu ha li yemeli kauhano ku ba tatululo kwa butata bo bu shutana-shutana bwa mwa linyalo. Nihakulicwalo, mwa miinelo ye tatafezi, Mukreste u na ni ku atula haiba kwa swanela ku kauhana kamba kutokwa.—Mu bale 1 Makorinte 7:10-13.

  4. Mulimu u bata kuli mina banana mu fumaneñi?

Jehova u bata kuli mu be ni tabo. U mi fa kelezo ye nde ka ku fitisisa ye mi tusa ku ikola bunca bwa mina. U bata kuli mu tusiwe ki butali ni yeloseli ya bashemi ba mina. (Makolose 3:20) Jehova wa itebuha ha mu utwa ze ba bulela bashemi ba mina.—Mu bale Muekelesia 11:9–12:1; Mateu 19:13-15; 21:15, 16.

5. Bashemi, kiñi ze ba tokwa bana ba mina kuli ba be ni tabo?

Mu swanela ku beleka ka taata kuli mu fumanele bana ba mina lico, malobalo, ni liapalo. (1 Timotea 5:8) Kono kuli bana ba mina ba fumane tabo, mu swanela hape ku ba luta ku lata Mulimu ni ku ba luta ku mu likanyisa Mulimu. (Maefese 6:4) Haiba mina mu lata hahulu Mulimu, ku ka ba bunolo kuli bana ba mina ni bona ba eze nto ye swana. Haiba mu laela bana ba mina ka ku itusisa Linzwi la Mulimu, bana ba mina ba ka hula hande.—Mu bale Deuteronoma 6:4-7; Liproverbia 22:6.

Banana ba tusiwanga haiba mu ba susueza ni ku ba babaza. Hape ba tokwa ku ba sikulula ni ku ba fa kelezo. Ku luta bana ka nzila yeo ku ba sileleza kuli ba si ke ba ikutwa ku tokwa tabo. (Liproverbia 22:15) Nihakulicwalo, bashemi ha ba swaneli ku halifa hahulu kamba ku bonisa situhu ha ba eleza bana ba bona.—Mu bale Makolose 3:21.

Lipaki za Jehova ba zwelapili ku hatisa libuka ze shutana-shutana ili zeo sihulu li ñolezwi ku tusa bashemi ni banana. Litaba ze ñozwi mwa libuka ze li zwa mwa Bibele.—Mu bale Samu 19:7, 11.

Kuli mu fumane litaba ze ñata ka za taba ye, mu bone kauhanyo 14 ya buka ya Bibele I Lutañi Luli? ye hatisizwe ki Lipaki za Jehova