Puonjri Kuom Wach Nyasaye

Ang’o Manyalo Konyo Joodi Obed Mamor?

Sulani wuoyo kuom penjo manyalo bedo ni isegapenjo, kendo onyisi kuonde minyalo yudoe dwoko mag penjogo e Muma mari. Joneno mag Jehova nyalo hero ahinya wuoyo kodi e wi dwokogi.

1. Ang’o momiyo riwo kend e nyim sirkal konyo e miyo joot obed mamor?

Jehova Nyasaye mamor, ema nochako riwruok mar kend. Riwo kend en gima konyo ok mana nikech omiyo jogo mokendore obed machiegni, to bende omiyo nyithindo dongo ka giyudo rit mowinjore. Nyasaye neno nade wach kend? Odwaro mondo kend obed riwruok mosiko, ma dichwo gi dhako oriwo e nyim sirkal. (Luka 2:1-5) Nyasaye dwaro ni dichwo gi dhako omakre chuth e winjruokgi ji ariyo. (Jo Hibrania 13:4) Jehova oyie ni Jokristo nyalo ketho kend chuth ma gidonj e kend machielo mana ka achiel kuomgi odonjo e terruok.—Som Mathayo 19:3-6, 9.

2. Dichwo gi dhako onego onyisre kido mage?

Jehova nochweyo dichwo gi dhako mondo gikonyre e ngima mar kend. (Chakruok 2:18) Ka en wi ot, dichwo onego okaw okang’ mokwongo mar chiwo dwaro mag ringruok ne joode kendo puonjogi kuom Nyasaye. Onego ochiwre e nyiso hera ne chiege. Dichwo gi dhako onego onyis hera motegno e kindgi ji ariyo, kendo gimire luor ng’ato gi nyawadgi. To nikech chwo koda mon duto gin joma ne onyuol e richo, bedo ng’at maweyo ne nyawadgi kethone en gima duong’ ahinya e miyo kend obed mamor.—Som Jo Efeso 4:31, 32; 5:22-25, 33; 1 Petro 3:7.

3. Be onego iwe jaodi kapo ni kend maru ok mori?

Kapo ni in gi jaodi uyudo pek moko e kend maru, timuru kinda umed nyisoru hera. (1 Jo Korintho 13:4, 5) Muma ok jiw ni ka dichwo gi dhako yudo pek moko e kend margi to gipog dak. Kata kamano, e chal matek ahinya, Jakristo owuon ema nyaka ng’ad kabe ochuno ni gipog dak kata ooyo.—Som 1 Jo Korintho 7:10-13.

  4. Un nyithindo, Nyasaye dwaronu ngima machalo nade?

Jehova dwaro mondo ubed mamor. Omiyou puonj maber moloyo kuom kaka unyalo yudo mor e kinde ma un rowere. Odwaro mondo ukonyru kuom rieko ma jonyuolu ni godo. (Jo Kolosai 3:20) Jehova mor ahinya gi gimoro amora ma utimo mondo upakego.—Som Eklesiastes 11:9–12:1; Mathayo 19:13-15; 21:15, 16.

5. Un jonyuol, nyithindu nyalo bedo mamor nade?

Onego utim matek mondo umi nyithindu chiemo, kar dak, koda lewni. (1 Timotheo 5:8) Kata kamano, mondo nyithindu obed mamor gadier, dwarore ni upuonjgi hero Nyasaye kendo ujiwgi gimed puonjore kuome. (Jo Efeso 6:4) Ranyisi miketo e nyiso hera ne Nyasaye nyalo mulo chuny nyathini ahinya. Kitiyo gi Wach Nyasaye kaka mise, puonj ma imiyo nyathini nyalo miyo odong gi paro makare.—Som Rapar mar Chik 6:4-7; Ngeche 22:6.

Nyithindo dhi maber moloyo sama ijiwogi kendo ipuoyogi. Bende, dwarore ni oriegi kendo omigi kum. Tiegogi kamano konyogi kik gidonj e timbe mabiro kelonegi kuyo. (Ngeche 22:15) Kata kamano, ok onego omigi kum e yo mager kata makwiny.—Som Jo Kolosai 3:21.

Joneno mag Jehova osegoyo buge sie mag konyo jonyuol koda nyithindo. Bugego chiwo puonj motenore kuom Muma.​—Som Zaburi 19:7, 11.

Mondo iyud weche momedore, ne sula mar 14 e bugni, Ang’o Ma Muma puonjo Kuom Adier? mogo gi Joneno mag Jehova.