Paibangat ed Salita na Dios

Panon a Magmaliw ya Maliket so Pamilya Yo?

Nabasa ed sayan artikulo iray maslak ya itetepet na totoo tan no iner ed Biblia so pakaromogay ebat. Maliket ya ipaliwawa ed sika na saray Tasi nen Jehova irayan ebat.

1. Akin a say panangasawa et importante pian magmaliw a maliket so panamaley?

Si Jehova, say maliket a Dios, so angiletneg ed panangasawa. Importante iya ed liket na pamilya lapud agka labat nawalaan na katambayan noagta sakey met iyan maligen a kipapasen ed pamabaleg na ananak. Antoy panmoria na Dios ed panangasawa? Labay ton permanente iya, legal ya nirehistro so kasal. (Lucas 2:1-5) Labay na Dios a say sanasawa so manmatoor ed sakey tan sakey. (Hebreos 13:4) Abuloyan labat nen Jehova iray Kristiano a mandiborsyo tan mangasawa lamet sano say asawa ra et akikalugoran.​—Basaen so Mateo 19:3-6, 9.

2. Panon so nepeg a pantrato na sanasawa ed sakey tan sakey?

Pinalsa nen Jehova so laki tan bii pian mantulongan. (Genesis 2:18) Bilang ulo na pamilya, say asawan laki so nepeg a mangitarya na materyal a pankaukolan na pamilya to tan say pambangat ed sikara nipaakar ed Dios. Sikatoy nepeg a masakripisyo lapud panangaro tod asawa to. Nepeg dan aroen tan respetoen so sakey tan sakey. Lapud amin ya sanasawa et imperpekto, importantin akaparaan iran mamerdona pian mansiansia iran maliket.​—Basaen so Efeso 4:31, 32; 5:22-25, 33; 1 Pedro 3:7.

3. Kasin misian kad asawam no agla maliket so panamaley yo?

No walay problema yon sanasawa, resolbien itan diad pangipanengneng na aroan. (1 Corinto 13:4, 5) Ag-irerekomenda na Salitay Dios so pansian bilang solusyon ed problema yo. Balet no grabe lay situasyon, nayarin desidien la na sakey a Kristiano no kasin misian odino andi.​—Basaen so 1 Corinto 7:10-13.

  4. Ananak, antoy labay na Dios parad sikayo?

Labay nen Jehova a magmaliw kan maliket. Iiter nen Jehova ed sika so sankaabigan ya bilin pian manliket kad inkatobonbalom. Labay ton minabang kad kakabatan tan eksperiensya na saray atateng mo. (Colosas 3:20) Iimanoen nen Jehova so amin ya gagawaen mo pian sikatoy napaliket mo.​—Basaen so Eclesiastes 11:9–12:1; Mateo 19:13-15; 21:15, 16.

5. Atateng, antoy gawaen yo pian magmaliw a maliket iray ananak yo?

Kaukolan a makuli kayon onanap parad naakan, ayaman, tan kawesen na ananak yo. (1 Timoteo 5:8) Balet pian sikaray magmaliw a maliket, kaukolan yo met iran ibangat ya aroen so Dios tan makaaral nipaakar ed sikato. (Efeso 6:4) Say ehemplo yo ed pangipanengneng na panangaro ed Dios so baleg a mangapektad puso na ananak yo. Sano saray bilin yo et base ed Salitay Dios, mangiter iya na positibon epekto ed panagnonot da.​—Basaen so Deuteronomio 6:4-7; Uliran 22:6.

Nagunggonaan iray ananak sano pasesegen tan komendaan yo ira. Kaukolan da met so panangipetek tan disiplina. Say ontan a panangipasal so manprotektad sikara ed kagagawan mangekal na liket da. (Uliran 22:15) Balet, say disiplina et agnepeg ya maruksa.​—Basaen so Colosas 3:21.

Saray Tasi nen Jehova so nan-publish na pigaran libro a makatulong ed saray atateng tan ananak. Sarayan libro et base ed Biblia.​—Basaen so Salmo 19:7, 11.

Parad kaaruman ya impormasyon, nengnengen so kapitulo 14 na sayan libro, Anto so Peteg ya Ibabangat na Biblia?, ya im-publish na saray Tasi nen Jehova.