Bâ ye so Bible afa

A hunda nyen si sewa ti mo aduti na ngia?

Article so ayeke sigigi na ahundango tënë so mo lingbi ti hunda tere ti mo na ni nga a yeke fa na mo ndo so mo lingbi ti wara akiringo tënë ni dä na yâ ti Bible ti mo. A yeke nzere mingi na aTémoin ti Jéhovah ti sara lisoro na mo na ndo ti akiringo tënë ni.

1. Ti tene sewa aduti na ngia, ngbanga ti nyen a hunda ti sara mariage si?

Jéhovah, Nzapa so ayeke na ngia, lo la lo bungbi koli na wali. Ye so lo sara so ayeke kota ye ndali ti nzoni ti sewa ni. Teti so li ti ala ayeke use, amolenge so ala yeke dü ayeke duti nzoni. Bango ndo ti Nzapa na ndo ti mariage ayeke so wa? Lo ye si koli na wali amû tere na lê ti ndia nga ala ninga na yâ ti mariage ti ala (Luc 2:1-5). Lo ye si ala duti be-ta-zo na mba (aHébreu 13:4). A-Chrétien alingbi ti sara divorce na ti kiri ti sara mbeni mariage gi tongana mbeni oko ti ala asara lango-sioni.​—Diko Matthieu 19:3-6, 9.

2. A yeke nzoni koli na wali asara ye na mba tongana nyen?

Jéhovah aleke koli na wali ti mû maboko na mba (Genèse 2:18). Teti so na yâ ti sewa koli la ayeke mokonzi, a lingbi lo mû aye ti mitele na sewa ti lo ni nga lo fa tënë ti Nzapa na ala. A lingbi lo ye wali ti lo na bê ti lo oko. A lingbi koli na wali aye tere na ala ne mba. Teti so ala use kue ayeke na siokpari na tere ti ala, a lingbi ala manda ti pardone mba si ala duti na ngia na yâ ti mariage ti ala.​—Diko aÉphésien 4:31, 32; 5:22-25, 33; 1 Pierre 3:7.

3. Tongana ala yeke na ngia pëpe, a yeke nzoni ti ke tere?

Tongana mango tere ayeke na popo ti ala pëpe, ala sara kue ti sara ye na ndoye na mba (1 aCorinthien 13:4, 5). Mbeti ti Nzapa atene pëpe so kangbingo tere la ayeke leke akpale ti mariage. Me, tongana ye ni ayeke tâ ngangu mingi, mbeni Chrétien alingbi ti bâ wala a yeke nzoni ti kangbi tere wala pëpe.​—Diko 1 aCorinthien 7:10-13.

  4. Amolenge, Nzapa aye si ala duti tongana nyen?

Jéhovah aye si ala duti na ngia. A yeke na mbage ti lo si ala lingbi ti wara tâ nzoni wango ti duti na ngia na lâ ti maseka ti ala. Lo ye si ala manda ye na lege ti ndara so ababâ na amama ti ala ayeke na ni (aColossien 3:20). Ye kue so ala yeke sara ti gonda Jéhovah, a nzere na lo mingi.​—Diko Zo-ti-fa-tene 12:1-3; Matthieu 19:13-15; 21:15, 16.

5. Ala lingbi ti sara nyen ti tene amolenge ti ala aduti na ngia?

Ababâ na amama, a lingbi ala sara kua ngangu ti mû kobe na bongo na amolenge ti ala, nga ti wara ndo ti lango na ala (1 Timothée 5:8). Me ti tene amolenge ti ala aduti na ngia, a yeke nga nzoni ti fa na ala ti ye Nzapa na ti zia lege na lo ti fa ye na ala (aÉphésien 6:4). Yengo so ala yeke ye na Nzapa ayeke ndu bê ti amolenge ti ala mingi. Tongana fango ye so ala yeke fa na amolenge ti ala aluti na ndo ti Bible, a yeke sara si amolenge ni ayeke gbu li ti ala na ndo ti anzoni ye.​—Diko Deutéronome 6:4-7; aProverbe 22:6.

Tongana ala gonda amolenge ti ala ndali ti aye so ala sara, a yeke sara nzoni na ala mingi. Me a lingbi a se ala nga, tongaso si ala tï pëpe na yâ ti asarango ye so alingbi ti ga na ala vundu (aProverbe 22:15). Ye oko, zia si ala se amolenge ti ala ni na ngangu pëpe.​—Diko aColossien 3:21.

A-Témoin ti Jéhovah asigigi na gbâ ti ambeti na ndo ti sewa ti mû maboko na ababâ na amama nga na amolenge. Atënë ti yâ ni aluti na ndo ti Bible.​—Diko Psaume 19:8, 12.

Ti hinga ye mingi na ndo ni, bâ chapitre 14 ti buku so, Bible afa nyen biani?, so aTémoin ti Jéhovah asigigi na ni.