Aʻoaʻoga a le Tusi Paia

E Faapefea Ona Maua e Lou Aiga le Fiafia?

O loo talanoaina i lenei mataupu fesili atonu e te fia malamalama i ai, ma mau o le Tusi Paia e maua ai tali. E fiafia Molimau a Ieova e tou te talanoa i tali o na fesili.

1. Aiseā e tāua ai le faaipoipo i le mauaina o se aiga fiafia?

Na amataina faaipoipoga e Ieova, o le Atua fiafia. E tāua le faaipoipo i le fiafia o se aiga, auā e lē gata e maua ai se faauōga māfana, ae o se siʻomaga malupuipuia foʻi e tausia aʻe ai le fanau. O le ā le silafaga a le Atua i faaipoipoga? E finagalo o ia ina ia avea o se faatasiga e tumau, ma e lesitalaina faaletulafono i le va o se tamāloa ma se fafine. (Luka 2:1-5) E finagalo le Atua i tane ma avā, ina ia faamaoni le tasi i le isi. (Eperu 13:4) E faatoʻā faatagaina e Ieova Kerisiano e teteʻa ma toe faaipoipo, pe afai e mulilua se tasi o le paaga faaipoipo.—Faitau le Mataio 19:3-6, 9.

2. O le ā le auala e tatau ona feutagaʻi ai le tane ma le āva?

Na faia e Ieova tane ma avā ina ia galulue soosootauʻau. (Kenese 2:18) I le avea ai ma ulu o le aiga, e taulamua le tane i le tausia o le itu faaletino o lona aiga, ma le aʻoaʻoina o i latou e uiga i le Atua. O lona alofa e na te lē manatu ai mo lona lava lelei, ae o le lelei foʻi o lana avā. E tatau i tane ma avā ona faaaloalo le tasi i le isi. Ona e lē lelei atoatoa uma tane ma avā, e tāua ai la ona lotofaamagalo, ina ia fiafia ai pea le la faaipoipoga.—Faitau le Efeso 4:31, 32; 5:22-25, 33; 1 Peteru 3:7.

3. Pe e tatau ona e tuua lau paaga faaipoipo, pe afai ua e lē fiafia i lau faaipoipoga?

Pe afai ua tulaʻi mai ni faafitauli i le va o oulua ma lau paaga, ia taumafai e feagai ma le isi i le alofa. (1 Korinito 13:4, 5) E lē o faapea mai le Afioga a le Atua, o le nonofo eseese, o se auala lea e foʻia ai faafitauli i le faaipoipoga. Peitaʻi, pe a tulaʻi mai faafitauli matuiā, o le a filifili lava e le Kerisiano pe e talafeagai ona nonofo eseese pe e leai.—Faitau le 1 Korinito 7:10-13.

 4. Fanau e, o le ā le finagalo o le Atua mo oe?

E finagalo Ieova ina ia e fiafia. E na te aumaia fautuaga e sili ona lelei i le auala e te maua ai le fiafia i lou olaga talavou. O lona finagalo ina ia e maua aogā mai le tomai ma le poto masani o ou mātua. (Kolose 3:20) E talisapaia e Ieova so o se mea e te faia ina ia avatu ai le viiga iā te ia.—Faitau le Failauga 11:9–12:1; Mataio 19:13-15; 21:15, 16.

5. Matua e, e faapefea ona maua e lau fanau se olaga fiafia?

E tatau ona e galue malosi ina ia saunia meataumafa, fale, ma lavalava mo lau fanau. (1 Timoteo 5:8) Peitaʻi, ina ia maua e lau fanau le fiafia, e tatau foʻi ona e aʻoaʻoina i latou ina ia alolofa i le Atua, ma ia aʻoaʻoina ni lesona mai iā te Ia. (Efeso 6:4) O lau faaaʻoaʻoga i le faaalia o le alofa i le Atua, e mafai ona iai se aafiaga telē i le loto o lau tama. Pe a faavae au faatonuga i le Afioga a le Atua, e mafai ona fesoasoani i lau tama ina ia iloa le mea tonu e tatau ona fai.—Faitau le Teuteronome 6:4-7; Faataoto 22:6.

E maua e lau fanau aogā, pe a e faalaeiau ma faamālō atu iā te i latou. E latou te manaʻomia foʻi faasaʻoga ma aʻoaʻiga. O le faia faapea, o le a puipuia ai i latou mai i amioga e ono mou atu ai lo latou fiafia. (Faataoto 22:15) Peitaʻi, e lē tatau ona avatu aʻoaʻiga i se auala inainā pe sauā.—Faitau le Kolose 3:21.

Ua lomia e Molimau a Ieova le tele o tusi e fesoasoani faapitoa ai i mātua ma fanau. E faavae mai faamatalaga o loo i nei tusi mai i le Tusi Paia.—Faitau le Salamo 19:7, 11.

Mo nisi faamatalaga, tagaʻi i le mataupu e 14 o lenei tusi, O ā Aʻoaʻoga Moni a le Tusi Paia? ua lomia e Molimau a Ieova.