Teki leri fu Gado Wortu

Fa yu osofamiri kan de koloku?

Na artikel disi e poti prakseri na sani di yu ben kan aksi yusrefi èn a e sori pe yu kan feni den piki na ini yu Bijbel. Yehovah Kotoigi ben o breiti fu taki nanga yu fu den piki disi.

1. Fu san ede wan man nanga wan uma musu trow fu man de koloku leki osofamiri?

Yehovah, a koloku Gado, seti a trowlibi. A de tumusi prenspari taki wan man nanga wan uma trow fu man abi wan koloku osofamiri libi. Na so den kan abi wan patna èn sani o waka bun nanga den pikin di den o kisi. Fa Gado e si a trowlibi? A wani taki wan man nanga wan uma musu trow na lanti èn den musu tan nanga makandra fu ala ten (Lukas 2:1-5). Gado no wani taki masra nanga wefi du sani di o meki taki den no frutrow makandra moro (Hebrewsma 13:4). Yehovah e gi pasi taki Kresten broko trow èn trow baka, soso te a trowpatna fu den du sutadu.​—Leisi Mateyus 19:3-6, 9.

2. Fa masra nanga wefi musu libi nanga makandra?

Yehovah ben meki man nanga uma fu wroko nanga makandra so taki a trowlibi waka bun (Genesis 2:18). Leki osofamiri edeman, wan masra abi a frantwortu fu sorgu gi en osofamiri èn fu gi den leri fu Gado. A musu de klariklari fu gi ensrefi fu a bun fu en wefi. Masra nanga wefi musu sori lobi nanga lespeki gi makandra. Fu di ala masra nanga wefi na sondu sma, meki den musu leri fu gi makandra pardon, fu di dati o yepi den fu abi wan koloku trowlibi.​—Leisi Efeisesma 4:31, 32; 5:22-25, 33; 1 Petrus 3:7.

3. Yu musu gowe libi yu trowpatna te yu no de koloku na ini a trowlibi?

Efu yu nanga yu patna abi problema na ini a trowlibi, dan du muiti fu sori lobi gi makandra fu meki sani waka bun (1 Korentesma 13:4, 5). Gado Wortu no e gi sma deki-ati fu prati te den e kisi problema na ini a trowlibi. Ma na ini seryusu situwâsi, wan Kresten kan bosroiti efu a moro bun fu prati noso fu tan na makandra.​—Leisi 1 Korentesma 7:10-13.

  4. Un pikin, san Gado wani gi unu?

Yehovah wani taki yu de koloku. A e gi yu a moro bun rai fa fu nyan bun fu den yongu yari fu yu. A wani taki yu kisi wini fu a koni nanga na ondrofeni fu yu papa nanga mama (Kolosesma 3:20). Yehovah e warderi iniwan sani di yu e du fu gi en grani.​—Leisi Preikiman 11:9–12:1; Mateyus 19:13-15; 21:15, 16.

5. Papa nanga mama, fa unu kan yepi den pikin fu unu fu de koloku?

Un musu wroko tranga fu gi un pikin nyanyan, wan presi fu tan, nanga krosi fu weri (1 Timoteyus 5:8). Ma efu unu wani taki den pikin fu unu de koloku, dan un musu leri den fu lobi Gado èn fu teki leri fu en (Efeisesma 6:4). Te unu e sori lobi gi Gado, dan na eksempre fu unu kan abi furu krakti tapu na ati fu den pikin fu unu. Boiti dati, te unu e gi un pikin leri di e kruderi nanga Gado Wortu, dan dati kan yepi den fu abi wan bun denki fu sani.​—Leisi Deuteronomium 6:4-7; Odo 22:6.

Pikin e kisi wini te unu e gi den deki-ati èn te unu e prèise den. Den musu kisi piri-ai nanga trangaleri tu. Dati o yepi den fu no tyari densrefi na wan fasi di o meki taki den no de koloku (Odo 22:15). Ma noiti un musu strafu den na wan ogri-ati fasi.​—Leisi Kolosesma 3:21.

Yehovah Kotoigi tyari difrenti buku kon na doro di skrifi spesrutu fu yepi papa nanga mama èn den pikin fu den. Den sani di skrifi na ini den buku disi e kruderi nanga Bijbel.​—Leisi Psalm 19:7, 11.

Efu yu wani sabi moro fu a tori disi, dan luku kapitel 14 fu a buku disi, San Bijbel e leri wi trutru?, di Yehovah Kotoigi tyari kon na doro.